Read Zeme Naga MIKA 1 Bible Online

MIKA 1 - Zeme Naga bible

MIKA 1

¹Juda gu heguangme, Jothambe, Ahazbe zai Hezekiabe ne heguang sapbe ting ge Moresheth’mpeu Mikabe dage Tingwang gu sam wangkeu de lei, Samaria benai Jerusalem hangge pa mâ-ngau de lei.

²Ningnui ’nteumena pezatme leine gau, ’ngking le lau; Hei kedeireime benai pelung ge bamme leine gau, seu le lau; zai Tingwang HERA ne pe gu kellumki ka’nchibe gene peize ningnui rasam sakkitewbe chang lau.

³Pie le lau, Tingwang â pe bâm gene pat mui de lei, kedei pebâm kehube ramme ge wangkeu lu ze tatrua gu lei.

⁴Hemi taige tega ’nnung gai di gum, pebâm siabe gene hedui luakeu gum ze, ramloa kehube ramme pe kangge ’nnungbuak kai du lei, zai pechuak ramme hekâu chang kam du lei.

⁵Airamme leine ze Jakob gu hedieka’ngkabe ziegene benai Israel ki gu hemui ramme ziegene chang lei. Jakob gu hedieka’ngkabe ze ’ndaikau lau? Chize Samaria mak semei? Zai Juda ki gu hemui ze ’ndaikau lau? Chize Jerusalem mak semei?

⁶Chidaze Samaria je ’nduloa ge mâ-kaika’nduibe bâm gum tew gai bu lei, grepchî merie tewbe bâm hang tew gai gu lei; zai pe gu tingchu ramme peningkâm ’mbe kelattua ’ndu lei, pe gu pedimpung ramme ngau ra lat kai bu lei.

⁷Pe gu mâ-luî ramme lakpângdesuirui ’ndu lei, pa hiwangbe ramme hemi ne rû ’ndu lei, zai pe gu heraluî ramme deî’ngga kam ’ndu lei; pe pum zuateupui dagene pa gekuaka’ndui daze pe pum zuateupui dage chiramme ze tat kai dai gu lei.

⁸Aipauziegene I desui ze hap’nrung gu de lei; paî luaktua lu ze a pumrua I tatrua gu lei; Munserung gum ze hap’nrung gu lei; ostrikruî ramme gum ze I ’nra gu lei.

⁹Pe jâm ze tew’mmichi lak lei; zai chize Juda ge wangchang de lei, a gu ziemmename gu keriekemui, Jerusalem riâ wangchang de lei.

¹⁰Gath ge chize salia gai se lau, zai hap du hap kai se lau; Beth-le-aphra ge timbuimoîne zeu ge ningnui runne kelarua zu lau.

¹¹Shaphir ge lungme gau, ningnui ’mpuî ra ’mbe ningnui pumrua ’ngngam ze tat zu lau; Zaanan ge lungme â zuapat se lau; Beth-ezel hapbe zene pa sapbe bâm ze ningnui dagene teitat tu lei.

¹²Maroth ge lungme â mâ-keyibe ze lêulak-desang bam lei, Tingwang dagene mâ-kesiabe Jerusalem keriekemui ge wangkeuchang ze bambeibe ziegeneu.

¹³Lakis ge lungme gau, hekun peranchibe ze timriang ramme ge keî gai lau; Zaion na heleu’mpui gu hemui pîbang ze â ningnui de lei, Israelme hedieka’ngkabe ramme â, ningnui dagene chang daseu.

¹⁴Chidaze Moresheth-gath dage rimnarabe kela nang pei gai ra lei; Akzib kibaume â, Israel gu heguangme hangge kechoabe chang gu lei.

¹⁵Maresha ge lungme gau, ningnui dage heteureipeu I ne teiwang gai dai gu lei; Israelme ngeudibe â Adullam ge wangchang gu lei.

¹⁶Ningnui peîtam chiap ne lau, ningnui name je ka’nchâbe ziegene ningnui peîtam gutduak ne lau; Lawai gum ze ningnui peîtam gutpû ne lau, ningnui name je ningnui dagene nîmtat tu daseu.