Read Zeme Naga MIKA 5 Bible Online

MIKA 5 - Zeme Naga bible

MIKA 5

¹Jerusalemme gau, chuna hereikangme je kelauwang’ndui zu lau, anui je tuaguâ la de lei; Israelme gu besuitewpeu bia ge penui ne hetui ne lak kai bei de lei.

²Kane Hei nang Bethlehem Ephratha, Juda zat ruage cheilangbe chang leusede ning dagene a hangge Israelme ruage besuitewpeu pat ku lei, pa patbe pîbang â, ’ndâ gechîngme ting ’ndâgene bam di de lei.

³Chidaze henalung ra ’nraka’nsuapui ne henalungkeu mak tâne pa ne penui je sâu ’ndu lei; dezai pe puiname ’nsakkaidiakme Israelme chaname dage penui wang dai gu lei.

⁴Zai Tingwang ranchi gene pa sapchu lu pe gu melidung je pa ne guî gu lei, Tingwang pe Rapeu ji dibe ziegeneu; zai penui je ’nggum bei ze penui yi ze bam gu lei, chipau ting gene seu ze tingmik deulangbe chang ze pa â pengêudi ze bam gu lei.

⁵Pa ne desieyibe teiwang gu lei, anui ram ge Assiriame wang ze anui gu heguangki penui pî hichang dezai, pechu ’nggi ra melireîme hangsena, zai heguangme hangdesat je anui langpat kai gu lei;

⁶penui ne Assiriaram ze hiazutkie ne samram ze bam gu lei, zai Nimrod ram dei ze penui gu hiazutkie ne dei’nsia gu lei; anui ram ge Assiriame ne gut ze, anui gu ramrai penui pî katau dezai pa ne anui je lupat kai gu lei.

⁷Chidezai Jakobbe kibaume ka’nsakme je miramme zat misongga bamme ruagene Tingwang dagene kezikdui wangkeu gum, zai timpeizeu ge tingruikeu gai gum ze bam gu lei, chize â ziemmena je kuâ ta de lei, zai ziemmena name hangge du kuâsua ta de lei.

⁸Mâkaupoine tatpat ze mâ-mâ-chupkauchibe chi ’nrêu ge hekaubena ruage bambe gum, melidung ruage bambe gum ze Jakobbe kibaume chai’nsakpatme â, heramzatme ruage bam gu lei.

⁹Ning teureime peireige ning ba huachu gai gu lei, zai ning teureime leine je tew’ngga ’ndu lei.

¹⁰Zai chipau ting dezai, Tingwang ne acheu rang ze, Ning dagene ning gu hekun ramme I ne tew’ngga ’ndu lei, zai ning gu timriang ramme tew’nsia ’ndu lei;

¹¹zai ning ramdei gu namdi ramme I ne tew’nsia ’ndu, zai ning gu keriengdi ramme leine tewkau kam ’ndu lei;

¹²zai ning ramdei gu namdi ramme I ne tew’nsia ’ndu, zai hedachakbe ge teibe ramme I ne ning ba gene tew’ngga ’ndu lei, zai ning dage kemeu gekungme bam dai ra mak lei;

¹³zai ning gu mâ-luîtewbe ramme benai ning gu tingchu sumgaibe ramme I ne tew’ngga ’ndu lei, zai ning ba tatew je nang kellum ta du lei;

¹⁴zai ning dagene ning gu Asherah luî ramme ze I ne puitua ’ndu lei, zai ning gu namdi ramme tew’nsia ’ndu lei.

¹⁵Zai hekuâpheumakme zat ramme peireige a râtabe benai a lumpumbe ne hekûmlube tew gai gu lei.