Read Zeme Naga MIKA 6 Bible Online

MIKA 6 - Zeme Naga bible

MIKA 6

¹Tingwang ne sam rangliabe ’ngking le lau: Chu lau, kedeiloa kedibe ramme suage ning tûdeu ze salia be lau, zai peloa ramme ne ning kuâ peize seu le lau.

²Ningnui kedeiloa kedibe ramme, ningnui kedei gu pedimpung ka’ntipbe ramme gau, Tingwang ne kahekangbe sam ’ngking le lau; Tingwang ne pe gu ziemmena je hekang ze lamui, zai pa ne Israelme je hemia ze bam gu lei.

³“Hei, a gu ziemmename gau, ningnui peireige I ne ’ndaikau tew bei lau? ’Ndaikau ge ningnui je I ne tewlei-’nggaka gai bei se lau! Achu kak kai lau!

⁴Ijipram gene ningnui je I ne nguapat kai bei, zai kebang changbe gene ningnui je ripat kai bei de zeî lau; ningnui suage Mosabe, Aaronbe zai Miriamle je I lang gai bei de zeî lau.

⁵Hei, a gu ziemmename gau, Moab wangpeu Balakbe ne ningnui peireige kesiatew ra ka’nningbe chî bam lau, zai Beorbe na Balaambe ne pechu samkakbe tak Shittim gene Gilgal ge tâwangchangbe ramme ningnui chî le lau, chidezai Tingwang gu tewka’nringbe tatew ningnui chî le ra hangge zeu.”

⁶“Tingwang masuage ’ndaikau I tei lu wang ze, Hera hulangpeu suage I kei’ngkumkeu ra lau? Rûkambe-râtewbe, getumpoine kum kat kau tei lu I pe dage wang ra mei?

⁷Tingwang ne meli’nsei chang suadu kie ze mei, taudui geuki chang kereu suadu kiebe peireige pa pe suiyi gu mei? I hedieka’ngkabe hangge a na meraibe I pei ra mei, a keringbe hemuidibe hangge a pum rachî I pei ra mei?”

⁸Hei ziemmena gau, ’ndaikau yi mei be ningchu pa teilia bei de zeî lau; zai Tingwang ne ning dagene ’ndaikau ka’nnang mei be zeu, kane pelingtewrabe, zai ka’nggiabe je ’nchârabe, zai ning Rapeu dage kecheiluîtew ze kangzangtewrabe mak te lau?

⁹Tingwang ne namdi je kelau gai de lei— kaningchingbe bambe kau â ning ji je pa hing gu lei: “’Ngking le lau, Hei pezatme zai namdi ge ka’nduime gau!

¹⁰Ziemmena kesiame ki ge kesiatewbe heurâ bambe, zai mâ-ka’ndeube ge gechâm nan ze ’nchugaibe ngaukatenetbe ze I ’ngngaîchi duî semei?

¹¹Ka’ndeube tâumakbe, zai ka’nchube karasa tewbe kau ze pelingtewbe hangge riam gai ra semei?

¹²Ning gu lungyime â kedungteube ne pui lei; ning dage kelakyime â karasa penui sa lei, zai penui mui ge penui lei ne choa lei.

¹³Chipauziegene ningchu I ne lakkagetie de lei; ning gu hemui ziegene ningchu I sâu gai ’ndi de lei.

¹⁴Nang teu-teu sede ’nggeu ra mak lei, zai ning bungpui ge ’njei ze bam bam gu lei; nang mâ hekâm’mmi gu, kane nang hekâmgim ra mak lei, zai nang hekâmgaibe ze hiazutkie mui ge I ne pei gai ’ndu lei.

¹⁵Nang ling gai gu, kane gat ra mak lei; Olib chî ramme nang nei gu, kane chi taudui nang ’nnuk ra mak lei; grepchî nang nei gu, kane wain nang sak ra mak lei.

¹⁶Omri gu samria ramme benai Ahab ki tâtewbe ramme leine nang teibe ziegeneu; zai penui gu laddeibe sam ramme ge nang tat ze bambe ziegene ningchu I sâu gai ’ndu lei, chige bamme hangge teihenuitewbe hang nang chang gu lei; chidaze a gu ziemmename ji siabe â, nang ne pung gu lei,” ze acheu zeu.