Read Zeme Naga MIKA 7 Bible Online

MIKA 7 - Zeme Naga bible

MIKA 7

¹A duângga-desang de lei! Tinglum ting gu hêchi raikam’ndibe ting ge bam gum, zai grepchî rai’nzâu ’ndi gum ze bam di de lei: pechîhût teurabe mâ de ga di de lei, ’mbeuchî meiraibe ze a keringbe ne teugainei-kadesangbe ga di de lei.

²Hera je ka’nchâbe ziemmena â kedeirei ge ga de lei, zai ziemmename ruage kapelingbe kau mî de ga de lei; penui ’nteumena ne hejai tewpat ra kuâ la kam lei, zai penui sikina je ’mpia ne rap ra tew la kam lei.

³Tâ-kesiabe tew ra penui ba ne mâ-chiamchi-desang lei; heguangme benai samramme ne henim luteu ra penui kie lei, zai ziemmena kedime penui ka’nchiebe kesiabe salia lei; chigum ze penui kahezuâ de lei.

⁴Penui ruage ziemmena yilangbe ze du hetupet riâ lei, zai penui ruage pelingtewchilangpeu ze du hetubang suadu sia lei. Penui je hekêtkaime gu tingnaimikpui penui je dei’nsiarabe mai wang mui de lei; chuna penui duânggabe wangchang gu de lei.

⁵Mi kining’mpeu je ’nnum’mmi se lau, zai mi kangme je du ’nnumtew se lau; nang samsabe ze ning ga ge jeibepui dagene ’ntîng le lau;

⁶pe na ne pe peu je ngauka’nna lei, pe na ’mpuimi ne pe pui je duîzuttew lei, zai pe mupui ne pe nai je ka’nggi lei; ziemmena teureime ze â pe ki-kelak gîm ze de lei.

⁷Kane I â Tingwang lam pie gu lei, achu tewka’nringbe Hera je I â kuâ bam gu lei; a Rapeu ne achu ’ngking gai gu lei.

⁸Hei, a teurei kau gau, a peireige ning suiyi’nta se lau; I kau sede zuachu dai gu lei; kemuîbe ge I ka’ntaube luage Tingwang ne a hangge kebabe chang gu lei.

⁹Tingwang peireige I hemuigai’ndibe ziegene pe lunggailakbe ze I ne pung gu lei, a deu pa ne sagaihâ ze, a hangge samrambe pa ne ram gai mak tâne hangge zeu. Kebabe ge pa ne achu nguapat kai gu lei; zai pa ne ripatkaibe I ngau gu lei.

¹⁰Chidezai a teurei kau, “Ning Rapeu Tingwang ’ndaige la lau?” ze achu kacheupui ne chize ngau lu ka’ngngambe ne pechu ruichim ’ndu lei. A mik ne pechu I pie gu lei; chuna â puidi ge timdeu kutgetie bambe gum ze pechu kutgetie bam gu de lei.

¹¹Ning gu kerie rierabe mai wang gu lei! Chipau mai dezai heramrai ze tew’ndipat kai gu lei.

¹²Chipau mai dezai Assiriaram gene Ijipram riâ, zai Ijipram gene ’Nggeuki riâ, zai sungkling gene sungkling riâ, zai kedeiloa kedibe gene kedeiloa kedibe riâ, chipau bâm ramme gene ning dage penui zuawang gu lei.

¹³Kane chipauram ge lungme ziegene benai penui tatew rachî ziegene kedei ze sâu gai gu lei.

¹⁴Ning gu ziemmena je ning gu hetui ne gekum ze reî lau, ning heurâ melidung zai merie deiloa zuilung ge hênamkang ge penui runne bamzîng ze ’ndâ ge gum ze, Bashan benai Gilead ge deteu ze peize bam wak lau.

¹⁵Ijipram gene nang zuapatbe mai ge gum ze, penui je tâningdaulakbe zat ramme I ne teilia gu lei.

¹⁶Pezat leine ne ngau lu penui ranchi leine peireige ’ngngam gai du lei; penui ba ne penui mui keba gu lei; zai penui kun du pang du lei;

¹⁷Henêu gum ze kedeimoîne penui ’nniak ku lei, kedei ge buaruabe kau ramme gum zeu; penui bambeki peranchibe bâm ramme gene kedun ze penui wang gu lei, Tingwang anui Rapeu dage hing ze penui wang gu lei, zai ning ziegene penui hing gu lei.

¹⁸Pe gume ’nsakpatme hangge hemui lun ze hedieka’ngkabe kelunbepeu, nang gumbe kau Hera châu la lau? Kehungbe ka’ntipbe je pa ka’nchâbe ziegene betingbeta pa â pe râta bam mak lei.

¹⁹Anui peireige pa ka’nggiabe bam dai gu lei, anui tâ-kesiabe tewbe pe pî kangge kaichim gai ’ndu lei. Anui gu hemui leine sungkling gechuk ’mbe nang ne tuâ gai ’ndu lei.

²⁰Gechîng rehei ting gene nang ne anui peume dage sam hatkai’ndibe luigum ze Jakob dage lungsangtewbe nang ne teilia gai gu lei, zai hungka’ntipbe ze Abraham dage tewlia gai gu lei.