Read Zeme Naga NAHUM 3 Bible Online

NAHUM 3 - Zeme Naga bible

NAHUM 3

¹Hejai tewpatbe namdi ze lunghereu gu lei, karasasabe benai hereichâ ne puigit ze sutteube sau ra mak lei!

²Hetui kakezitbe kuâ, timriang pigua ka’ngkuabe kuâ, hekun ka’nsakbe ’ncheu, zai timgriang kesaukeriangbe zeu!

³Hekun chingchuame ne hekun chingchua lu ze, hiazutkie kezap pelik-lik, zai hengeu kedetpelik-lik, ze ziemmena misonggame je tewchat, kechaipum ramme ’ngkuagit ze, kechaipum ramme gakeu dai mak— kechaipum ramme peireige penui ’nrap lu kau de lei!

⁴Zai hepumzuateume hepum zuateube tâ tewbe seikamlakbe, ngauyibe benai heduaî tewchibe ramme, pa hepumzuateube tâ tewbe zene pezat je zuateu zai pe gu ’ngnguiheu ne ziemmena je tewkebangmi gai de lei.

⁵Baudime gu Tingwang ne acheu ze rang lei, Pie le lau, ningchu I ka’nggi lei, ning ju peirei ’mbe ning nî kehuachu gai gu lei; nang pumlâng bambe ze pezatme suage teilia gu, zai nang helêukeudibe ze kedeirei heguangme suage I teilia gu lei.

⁶Mâ-kahebâbe katenetbe ze ning dage I tuâ gai gu lei, zai ’ngngam ze bam ra I tew gai gu lei, zai ningchu ne pierim bamrabe zat hang tew gai gu lei.

⁷Zai ningchu piegaime leine ne ning dagene pak’mbia lu ze, Ninebi keloa siakeu de lei; châu ne pechu puîhap kai ra lau? ’ndai’nggene pe hangge tumgairame je I peu gai ra lau? ze penui acheu gu lei.

⁸Nail ge bambe Thebes sua nang â yibi mei, hedui ne pechu luaguâ bei, sungkling ne keriengdi chang bei, ’nggeuki ne pechu kerie gum ze riegua bei gum zeu?

⁹Ethiopia benai Ijip zene pe ranchi chang lei, peranchi ze bam bam gu lei; Put benai Libiame ne pechu ka’ngngâme chang de lei.

¹⁰Chigum sedu pechu â teitat ti de lei, kebang chang di de lei; puidi leine ge penui name ’ngngiêne ramme je getaudesuirui gai ’ndi de lei; pe gu ziemmena kedime hangge hedachak te lei, zai pe gu ziemmena kedime leine je â, hegeî’ngkap ’nta gai ’nde lei.

¹¹Nang du meneu gu lei, nang ’nningbîng bam gu lei; ning teureime dagene ’mbai ra nang peu gu lei.

¹²Ning gu keriengdi leine ’mbeuchîbang pechî meipatraibe gum lei— kechuî’ngngai gai dizai â, geteupeu mui ge kêugaichi lei.

¹³Pie le lau, ning gu hereikangme â, ’mpuimi ramme riâ lei. Ning teureime hangge ning ram keriekemui â latrang la de lei; ning gu hegeî’ngkamcha ramme hemi ne rû ’ngga kam de lei.

¹⁴Ningchu tuaguâ ze bam tâne hangge hedui tuak le lau, ning gu kerie tew’ntip le lau; depungdei bambe ge tat lau, timdeu kebutlube kutgetie lau, zai hegam rube-’mmang tei’ntip le lau!

¹⁵Chige du hemi ne ningchu rûchat ku, zai hiazutkie ne ningchu dâng ’ndu lei. Tîngkau ne mâ-helei ramme teu kam ’ndi gum ze ai ne ningchu teu kam ’ndu lei. Tîngkau, heriâmtîngkau ramme gum ze ningnui je tewpung le lau!

¹⁶Ning gu helîkahedetme ze tinggîm ge hegi ramme suadu kie ze nang tewpung gai ze bam lei. Kane tîngkau ramme gum penui kan huarang gai lu chuna â liamtat kam di de lei.

¹⁷Ning gu heguangsinme â tîngkau ramme gum, ning gu leisirawme â, lungbe tîngkaudung (tingkai) kahegeibe mai ge kerie-tû ramme ge kuppuigit bambe gum lei— naimik pat ze lum gai dege â, penui liamtat kam di lei; penui ’ndai’ngge tat kai di mei be mî de chî mak lei.

¹⁸Ning gu melireîme â jeikeu di de lei, Hei Assiria heguang gau; ning gu samramme jeikeu kam de lei. Ning gu ziemmena ramme â, mî ne penui je gekumwang’nduirabe kau ga ze kedeiloa ’ntûm hube ge rarip la de lei.

¹⁹Ning jâm tew’mmigairabe ga lei, ning jâm ze tew’nteu di de lei. Ning rasam seume leine penui suigut ne penui ba gekeu la de lei. Nang katîmphibe tâ tewtat bambe liegaimakbe kau chauge la ze lau?