Read Zeme Naga HABAKKUK 1 Bible Online

HABAKKUK 1 - Zeme Naga bible

HABAKKUK 1

¹Kemeu’mpeu Habakkukbe ne ngaube Hera gu keliâbe.

²Hei Tingwang gau, ’ngngâ gai ra hangge ’ndaitie ge I kû bei ze nang ’ngking gai mak ze bam ra lau? Makchai, “’Nggî-hegei la de lei!” ze ningchu pau gai bei ze nang tew’nring gai mak bam ra lau?

³’Ndaitew ze tâ-kesiabe tewbe achu teilia, zai kakeleube ramme ngau bam ra pei lau? Tewka’nsiabe benai tewkakeleube a masuage bam bam lei; ’nggî-kahegeibe benai desiesiabe zuachu la de lei.

⁴Chipauziegene hingde ze peran-ga di, zai samramka’nzeibe zuapat ta di de lei. Ziemmena kesiame ne pelingtewme je ’nzuichim lei, chipauziegene samrambe ka’ngkuibe zuapat lei.

⁵Heramzatme ramme je pie gai ni lau, zai ngau gai ni lau; ningdaulakluisui ze bam lau. Ningnui suage ranglia gai bei sede ningnui ’nnumtewmakrabe tâ ningnui ting ge I ne tâ kat tew gai gu lei.

⁶Pie le lau, Kaldiame lumpumsiabe, zai ka’nchapbe kau zat, kedeirei dit luî gechimpedakdatat ze miramme dei ramme sutruabe kau zat je I ne tei’nsapchu gai gu lei.

⁷Penui ze â mi kiâkumakbe zai mi kehingbe kau lei; penui samrambe benai penui ngeudibe â penui gene zuapat lei.

⁸Penui gu hekun ramme â keriakkau suadu ’nzet lei, hegî ting gu henei ramme suadu peraksia lei; eu lei, penui gu hekun ramme ne herei guagut lei. Penui gu hekunchingchuame kedeu ’mbene wang lei; kelie ne teu ra pa hetak luî ge liamzuai keube gum ze penui du liamwang lei.

⁹Penui ’nteumena ’nggî-hegeirabe hangge wang lei; tewrabe ma ze penui sua ’mbe gipedakda gut lei. Deseî je gum ze penui bang hangge ruika’ndui lei.

¹⁰Penui â heguangme je keraichai ze bam, zai samramme rezieteime je teihenuitew lei. Keriengdi ramme je penui ka’nnui lei; chize sut le ra hangge kedeitum kebau’ngnguchu lu ze bam lei.

¹¹Chidadege tingkai gum ze penui â guipelarittat ti de lei, penui hedie’ngka zai kahemui lei, penui ranchibe ze penui rapeu chang lei!

¹²Hei Tingwang a Rapeu, Ka’nchibe Hera gau, nang ze betunmakbe Hera mak semei? Anui chai ra mak lei. Hei Tingwang gau, samram gai ra hangge nang ne penui je ’nchet kai ’ndi de lei; Hei tingchutum kedibe gau, tewsâ ra hangge nang ne penui ze beichu gai bei de lei.

¹³Kesiabe ngaurabe mik hangge ning mik â ’nchi’nteu’ndibe kau de lei; zai tâ-kesiabetewbe nang â piechi lak lei; ’ndaitew ze pejaîsiame je nang pie bam, zai helungriaksiame ne penui suane ka’nchime je deî’nggakam’ndibe luage nang ning kuâneu mak bam lau?

¹⁴Ziemmena je nang ne sungkling gu hekâ benai mâkâupui ramme, penui peireige kanguapeu gabe gum ze bam ra tew gai bei de lei.

¹⁵Hereime ne kakuai ne penui je hekâ je gum ze zupat kam ’ndi de lei; pe gu chîakrak ne penui je ’nrakpat kam ’ndi lei; zai penui gu chîakrak ge penui je kai’ndui gai lei; chidadege pa pe suiyi zai ’ntakediâu bam lei.

¹⁶Chipauziegene penui chiâkrak je kellum ze herâtewbe pei gai de lei; zai pe gu chîakrak hangge mâ-perîmyibe rû gai lei. Chigene penui dam hang misongga ngau, zai teu kam lak bam ra pei bei daseu.

¹⁷Chidaze penui gu chîakrak tew’nrua’nsui ze, zai ngauka’nggiabe ga ze heram zat ramme je tew’ngga’nsuî bam ra de semei?