Read Zeme Naga HABAKKUK 2 Bible Online

HABAKKUK 2 - Zeme Naga bible

HABAKKUK 2

¹A gu hekêtkaibeki ge I sap ku, zai keriengdi peireige I kuâ bam gu lei; ’ndaitew lei ze pa achu rang gai gu mei, zai I a lungneube sam ’ndaitew lei ze pechu kak dai ra mei be I piekua bam gu lei.

²Chidadege Tingwang ne achu kak ze acheu rang gai lei, “Ningchu I liâbeibe ze tingchudepei ge raw’nchichiak kai lau, chidezai pakkelua-desang ze patpeu ne kia lu chî le ra hangge zeu.

³Chi keliâbe ze â panehî wangchangrabe mai hangge teiliabe kau rei lei; kane aize a nâlangbe mai hangge rangliabe kau, zai mâdau de helimakbe sam lei. Wangchang rî bi sede kuâ le lau. Chize wangchang sing gu de lei; mâtiege dai ra mak ku de lei.

⁴Gechî-keditewme je pie gai ni lau, penui keringbe â pelingtewbe ga lei, kane pelingtewbe kau â pa keneibe gene ring gu lei.

⁵Chipau peireige du keheube â, mi je duaichibe kau lei, zai kechî-keditewbe kau â gesutchi lak lei. Kechaiberam gum ze penui muiki ’ngngaletla ze bam lei; zai Kechaibe gum ze mâdau de pe lungwângchang mak lei. Heram zat ramme leine je penui hangge gekumwangkandui lei, zai ziemmena leine je penui hang kaigekua gai lei,” ze acheu zeu.

⁶Chigumbe kau ziemmena je ’nteumena ne kerai ze, zai teihekî ze penui peireige acheu gu lei, “Nang ning gu makbe ne ning heu hang kaikagekuabe kau gau, ning peireige mi duângga de lei! miramme dage nang hepuk kai ze beching luteube gene ’ndaitie ge keheube nang ngau ra lau?” ze acheu zeu.

⁷Ning gu hekumpungme zualepchu mak ra semei, zai penui zuachu lu hingkedun ra tew gai mak ra semei? Chidezai ningnui â penui ne sut-tattime chang gu lei.

⁸Pezat misonggame je nang ne gechim’nsia kam ’ndi daze, zai ziemmena jai tewpat, zai kedeirei je tewkeleu, zai namdi ramme benai pelung ge bamme leine je tew’nsiagai’ndibe ziegene, chime suage ’nsakpatme ne ningnui je gechimmia ’ndu lei.

⁹Kesiabe lam gene pelâp-pegîe ning ki-heu hangge ngaube kau, zai ningchu mâ de tew’nsiadaichi lak ra kehu ’mbe ning chip puagaibe kau gau, ning peireige mi duângga-desang de lei.

¹⁰Ziemmena misonggame je tew’nggakam’ndibe ziegene ning ki hangge heji siabe nang ne tew gai ’ndi de lei. Nang keringbe peireige tâ-kesiabe nang tew gai de lei.

¹¹Tingchu ramme ’nsangdu ’mbie gene penui kuâ’nrung gu, zai heki’ngra ramme ruagene padappai ne chipau kuâ kak ku lei.

¹²Nang hejai tewpatbe tâ tewbe gene namdi tei’nsapchugaibe kau, zai tâ-kesiatewbe gene namdi ’nranggaibe kau gau, nang ning duângga-desang gu lei!

¹³Pie le lau, hemimelei hetak hangge ziemmena tâtewgaibe chang di, zai heram zat ramme leine peruânggabe hangge tâtew ranleiseigaibe ze Tingwang baudime Wangpeu ne tewgaibeibe gene mak semei?

¹⁴Acheusede sungkling ge hedui ne sungpuigit bambe gum ze Tingwang ngeudibe je gechîbe ne kedeirei puigit bam gu lei.

¹⁵Ning kiningme je sak ra peibe kau, zai ning gu wainbung kelatpat kai ze penui meneu dezai penui pumrua bambe ngau le ra wain guîbe kau gau, nang ning duângga-desang gu lei.

¹⁶Pengeudibe nang ngaurabe kelei ge ka’ngngambe ne ningchu ’nzuigit ze bam gu lei; nang du sakmeneu lu ze ning pumrua bam lau. Tingwang gu hezat’mbia ba ge hepiak bambe ze ning lam tat-keliawang dai gu lei; dezai ning ngeudibe je ka’ngngambe ne naîchim ’ndu lei.

¹⁷Lebanon tew’nsiagai’ndibe zene ning lung ge chûmgit ze bam gu, zai hekaubena ramme je tew’nggakeukam’ndibe ne ningchu tewhingrim ze bam gu lei; ziemmena gu hejai tewpat, zai kedeirei je tewka’nsiabe ziegene, zai namdi ramme benai pelung ge bambe ramme ze tew’nggakam’ndibe ziegeneu.

¹⁸Heraluîtewbe ’ndaikautau hangge kegiebe la lau? Chize tewpeu ne chiampatbe kau hegeî ne heraluîtewbe, kechoabe geteiliabe kau zangno? Chize â peluîtewbe runne zangno, penui mui gene sam ’nsangdu sapatchilakbe kau dezei lau!

¹⁹Hechingdâng je, “’Nrakchu zu lau” acheu, zai tingchukâng pe kuâneu-makbe kau je, “Zuachu zu lau,” kacheube kau gau, nang ning duângga-desang gu lei; heraluîtewbe ne ningchu geteiliachi gu semei? Pie le lau, chi heraluîtewbe ze gechâk benai gepût ne luazunlube kau de lei, sede chige keringbe chuilu mâ de ga lei.

²⁰Kane Tingwang â pe ki ka’nchibe ge bam lei, kedeirei ge ziemmena leine ne peize pe suage ’nsimrim ze bam lau.