Read Zeme Naga HABAKKUK 3 Bible Online

HABAKKUK 3 - Zeme Naga bible

HABAKKUK 3

¹Kemeu’mpeu Habakkukbe kakellumbe sam Shigionoth ge raw gai gum zeu.

²Hei Tingwang gau, ning tatew kedibe ramme I seu lu de lei, zai ning tatew peireige I hingkedun bam lei, Hei Tingwang gau, anui heiting ge chize tewrechi gai dai lau; anui ting ge chize teilia gai dai lau; ning lumpumbe luage du anui je nang ka’nggiabe ’ngngaî se lau.

³Temanram gene Hera wang de lei, chi ka’nchibe Rapeu ze Paran Loa gene wang de lei. Pa pengêudibe ne ting kehube chûmpuigit bam de lei; zai kedeirei ge pechu toabe ne puigit bam de lei.

⁴Pe gu ’mbi ze â naimik gum bam de lei; pe ba gene kebabe ’mbi zuapat te lei; chi pe gu rezie tei’mbaibambe ba geneu.

⁵Pe sua ’mbe herarîtchibe ne raîtat, zai kechaibe ne pe chai suichaphang kadai de lei.

⁶Pa sapgîngmanggaibeibe ne kedeirei kechuî’ngngailia gai bei de lei; pa ne pie gai bei de lei, zai heram zat ramme kelippin bam de lei; betunmakbe deiloa’ntûm ramme tewpângrarip ’ndi de lei, ’ndâting ge pa tatbe ’mpuîki ramme ge betunmakbe deiloa ramme ’ntaumitkeu di de lei.

⁷Kusanme gu hetiamki ramme betedka’nsîbe kangge bambe I ngau de lei, Midianram gu hetiamki kemui lîmnambe paî ramme kelippin bam de lei.

⁸Hei Tingwang gau, ning lumpumbe ze ’nggeuki ramme peireige mei? Ning râtabe ze ’nggeuki ramme peireige mei, nune ning gu hekun ramme chingchua lu hereingam-zeza ze tatbe luage, sungkling peireige ning râta mei?

⁹Ning gu hetubaimpi nang ne teilia’nchiepuang gai de lei, ning gu bai’mpi ’mpatkairabe luîrun ze bam de lei. Nang ne ’nggeuki ramme gene kedei ze ’nzipâng gai de lei.

¹⁰Peloa’ntûm kedibe ramme ningchu ngau lu kakedun de lei; ’nggeuki ramme ge heduidi-katung bam di de lei; sungkling pe kuâ ’nrakung bam de lei, zai pe ba ramme getua’ngngutau chu lei.

¹¹Naimik benai hekêu du penai bâm ge gînggit ze bam di de lei; ning gu bai’mpitu gi-plikpat bei, ning gu hengeu ze peling ze bambeibe ziegeneu.

¹²Ning lumpumbe gene nang â, kedei huakpedakda tat ti de lei, ning rata ne heramzat ramme je kutchim kam ’ndi de lei.

¹³Ning gu ziemmena je tew’nring gai ra nang zuapat te lei, nang ne taudui ’nnukkai’ndime je ’nripat ra hangge zeu. Nang ne helungriaksiabeki ruagene pe peî ze chaîkeniakniang ’ndi de lei, bepîbang gene chu ze heki’mpûm riâ tew’nsia kam ’ndi de lei.

¹⁴Nang ne hereimuiteipeu je pe gu bai’mpi tu gîmsing ne duakpelarit kai bei de lei, penui â anui je hûtimrarip kai ra hangge natrichibe gum wang de lei; kelaksia ze ’mbailiakbambe kau ramme je teu kam le ra hanggene penui â, ’njei-kahereibe kau gum ze wang de lei.

¹⁵Ning gu hekun ramme ne nang ne sungkling chaîkeniak kai bei de lei, zai sungkling huakpehûp-rum gai bei de lei.

¹⁶I seu lu ze a lung gene hingkedun di de lei, chipau kuâ seu lu ze a muitai kelip ti de lei; a pum ze a jiesia kenuihuak kai di de lei, zai a pikiâm du kenukpin di de lei. Anui je ka’nggime peireige tewsabe wangrabe mai hangge a kuâneu mak ze I piekua lei.

¹⁷’Mbeuchîbang bepâ pa mak sede, zai grepchî hiâm ge pechî ’nchikeu mak sede; olib bang gene pechî ’nchikeu ta di sede, zai helu ramme gene hetak hang ngau ta di sede, melidung ze meli rielung gene deî’ngga kam ’ndi sede, zai getumki ramme ge getumdung ’ngga kam di sede,

¹⁸Tingwang ge a suî’nta gu lei; achu tewka’nringbe Rapeu ge a suiyi gu lei.

¹⁹Hera Tingwang â a hangge a ranchibe lei, heti pî gum ze pa ne a pî tew gai bei de lei; zai kehube bâm ramme ge I dekirua ra pa ne tew gai bei de lei. Heleu kanguapeu dage a gu pereubambe ’nrabung ramme zeneu.