Read Zeme Naga ZEPHANIA 1 Bible Online

ZEPHANIA 1 - Zeme Naga bible

ZEPHANIA 1

¹Judame gu heguang Amonbe na Josiabe ne kaheguangbe ting ge Tingwang gu sam Zephaniabe, Kusibe na, Gedaliabe na, Amariabe na Hezekiabe na dage wangchangbe ze aize de lei.

²Tingwang ne acheu ze rang gai de lei, “Kedeirei ge bambe zat leine je I ne tew’ngga kam gu lei,” ze acheu zeu.

³I ne ziemmena zat leine, zai mârekaune leine, ’nruine tinggîm ge liamruabe zat leine benai sungkling ge hekâ zat leine je tew’ngga kam ’ndu lei. Pelungriaksiame je I ne tewkau gai gu lei. Kedeirei ge ziemmename je I ne tew’ngga ’ndu lei, I, Tingwang ne kacheu de lei.

⁴Judabe benai Jerusalem ge lungme leine peireige a bahuâ kai gu lei; Baal je herâtewbe ge teibe ramme ga’nzâu mak bambe ramme I ne tew’nsia kam gai gu, zai chi heraluîtewbe je kakellumbe gu tingkume ji ramme du I ne tew’ngga kam ’ndu lei.

⁵Tinggîm ge bambe zat ramme je heki’mpûm ramme gene kakellumme leine, zai Tingwang je kellum zai pe ji gene deseutew lu, sede Milkombe ji teiteri ze deseutewme leine;

⁶zai Tingwang chai suibe gene helatdaidime leine, Tingwang je peumakme benai pe dagene ’mmêtmakme leine je I ne tew’ngga gu lei.

⁷Tingwang Hera masuage rim ze bam lau! Tingwang gu naimikpui â na di daseu. Pe gume zene pekau chang ze herâtewbe peipat kai ra Tingwang ne kedâ lu de lei, zai pa ’nnâgaime je pa ne tew’nchi gai ’nde lei.

⁸Zai Tingwang gu herâtewbe naimikpui ge rezieteime benai heguang na ’mpeumi ramme je, zai hesangme ram gu hepuâyibe ne keru ze bamme leine je I ne tewsâ gu lei.

⁹Chipau mai gîmsing ge kûngduaki geze ’mbupkeleulia ze bambe kau ramme, penui paume ki (besuitewme) ge ’nggî-kahegeibe benai chua ze duaibe ’mpuî gene keheube ngau ra tâtewme je I ne tewsâ gu lei.

¹⁰Tingwang ne rang ze, chipau mai ge â Hekâ Kemuiki gene hapka’nrungbe kuâ seu gu, Pakenabe bâm ge hapkadesuibe bam gu, zai peloa ramme ’mbia gene sukriamgaidibe kuâ seu gu lei, kacheu de lei.

¹¹Mortar ge lungme gau, hap’nrung zu lau, helîkahedetme leine chai’ngga kam di, zai gepût ka’nchume leine ’ngga kam di daseu.

¹²Chipau ting geze hemibung tei lu Jerusalem ge I peurua gu, zai penui ditpuîbung ze penui lung gene, “Tingwang ne mâ de keyibe tew gai ra mak lei, zai kesiabe du tew gai ra mak lei,” kacheube kau ziemmena ramme je I ne tewsâ gu lei.

¹³Penui heurâ ramme sut-tat kam ’ndu, zai penui ki ramme du gechim’nsia kam ’ndu lei. Penui ki ramme tew gai leusedu chige penui lung ra ngau ra mak lei, zai grepchî merie penui tew ze bam sede chigene pezau sak ra ngau ra mak lei.

¹⁴Tingwang gu pengêudibe naimikpui â na de lei, na de lei, wangkelua mui de lei; chipau mai ze â hereu-kadesangbe mai chang gu lei, chidezai heteureime gekuume ’nsangdu hap’nrungkung bam gu lei.

¹⁵Chipau mai ze â mi lumpumbe mai, kahereube benai mi duânggabe mai, tewka’nsiabe benai tewka’nggabe mai, kemuîbe benai desungra ze bamrabe mai, tingmâu ze muîgitbe mai,

¹⁶keriengdi ne riegualube namdi ramme benai hekêtkaibeki ramme ge hegeîluîkie ka’mmutbe benai herei’ncheu kuâ ne puigitbe mai chang gu lei.

¹⁷Ziemmename peireige hereu-kadesangbe I ne teiwang gai gu lei, chidezai penui ’nteumena pemikchitbe kau gum ze kemitrua bam ra hangge zeu. Penui ne a mikngau ge hemuigai’ndibe ziegene hedui gum ze penui jai luapat ku, zai penui pum ramme du kedei ge tiamnampak ze tuâ bam gu lei.

¹⁸Tingwang lumpum teiliabe mai ge â, penui gu gepût ramme benai gechâk ramme ne du penui je tew’nringdaichi lak te lei. Pe lumpumbe gu hemi getaube ne kedeirei rû’ngga kam gai gu lei. Kedeirei ge lungme leine je tew’ngga’nzâu gai ra, luakat ze ’nggalap kai ra pa ne tew gai gu lei.