Read Zeme Naga HAGGAI 2 Bible Online

HAGGAI 2 - Zeme Naga bible

HAGGAI 2

¹Heguang Dariabe ne kaheguangbe pakenabe kum ge, pasenabe kêu gu hezie ’ngkai ze kat mai ge kemeu’mpeu Haggaibe dagene Tingwang gu sam wang ze acheu sa ze,

²“Chunage Shealtielbe na Zerubbabelbe Judaram ge laksaibe benai Jehozadakbe na tingku dilangpeu Joshuabe dage zai ziemmena ka’nsakme leine dage salia ze,

³Aipau ki ze ’ndâge pengêudi ze bambe lua ngaume ningnui ruage châu la lau? ‘Chunage ’ndaigum ningnui ne ngau gai lau? Ningnui mikngau ge mâ de makbe hangge ningnui ngau gai mei?

⁴“Hei, Zerubbabel gau, chuna â kuugiereu ze bam du lau”, ze Tingwang ne kacheu de lei; Hei Jehozadakbe na, tingku dilangpeu Joshuabe gau, kuugiereu ze bam du lau; heram gu ziemmena leine gau, kuugiereu ze bam du lau, ze Tingwang ne kacheu de lei; tatew zu lau, ningnui dage I la lei.

⁵Ijipram gene ningnui zuapatbe ting ge I ne samhatkaibe luigum zeu, ze baudime gu Tingwang ne kacheu de lei. Ningnui ruage a gu Herui lamui lei; hing se lau.

⁶Baudime gu Tingwang ne acheu rang lei: Luakat beting keduîne hang tingkehube benai kedei, zai sungkling benai heramloa kechangbe ze I tew’ngngai gai gu lei;

⁷zai heramzat leine je gechuî’ngngai gai gu lei, zai pezat leine gu heurâ wang gu lei, zai aipau ki ze I ne pengêudi-desang ze tewpuiting gai gu lei, ze baudime gu Tingwang ne kacheu de lei.

⁸Chi gepût ze a gu lei, zai gechâk ze a gu lei, ze baudime gu Tingwang ne kacheu de lei.

⁹Aipau ki ngeudibe ze keraîbe ting sua â kenâbe ting ge pengêudi’nteu gu lei, ze baudime gu Tingwang ne kacheu de lei; zai aipau bâm ge desieyibe benai lungyibe I pei gai gu lei,’ ze salia lau,” ze kacheu de lei.

¹⁰Dariabe kaheguangbe pakenabe kum gu hekêu pasekuibe kêu gu hezie ’ngkai ze medai mai ge kemeu’mpeu Haggaibe dagene Tingwang gu sam wang de lei,

¹¹“Baudime gu Tingwang ne aigum ze rang lei: Aipau sam ka’nneube ze tingkume je ’nneu gai ni lau,

¹²‘Mige ne pa mechuatiebe tûn ge hemeikâng ka’nchibe ’nggumpuabeibe gene pa mechuatûn ne tingku mei nune, mâ-sualube mei nune, wain mei nune, mâ-châ mei nune mâ-teube zat leine ge mei ze deîtau gai dizai â, chize ’nchi gu mei?’ zeu,” ze kacheu de lei. Tingkume ne kak ze, “’Nchi ra mak lei,” ze kacheu de lei.

¹³Dadege Haggaibe ne, “Mihangkat kechaipum deîtaubeibe ne ’nchimakpeu ne airamme ruage kat deîtau bei dezai chize hebâ du mei?” ze kacheu de lei. Tingkume ne, “Chize hebâ de lei,” ze kak lei.

¹⁴Dadege Haggaibe ne, “Aime bau, zai aipau zatme ne a suage chigum ze bam de lei, ze Tingwang ne rang lei; zai penui ba gene mâ-tâtewbe leine chigum chang gai di de lei; zai penui mâ-mâ chige peipatbe leine ’nchi mak lei.

¹⁵“Chunage kellum zu lau, nemai gene chu ze bechâng ge ’ndaikau wangchang gu mei be ’nninggai’mmi ne lau. Tingwang gu kellumki ge tingchukâng peireige tingchukâng kairabe suage ningnui ’ndaigum mâ ’nning gai lau?

¹⁶Mige chêutum ge hedun ’ngkai ngau ra ’nnum ze tat da, kane chige hedun kereu runne lei, wain ka’ndeube bung rengeu ngau ra ’nnumtew ze tat da, kane bung ’ngkai runne ngau lei.

¹⁷Ningnui tâtewgaibe perachî patrabe leine ge tingruikeu gai mak, kezai benai desak ramme keu gai ze ningnui je I ne tewsâ de lei, kane a lam’mbe ningnui helatwang mak seu, ze Tingwang ne kacheu de lei.

¹⁸Aipau pasekuibe kêu gu hezie ’ngkai ze medai mai ge nemai gene chu ze bechâng-chângge ’nning ra lei. Tingwang gu kellumki gu pedim kaibe mai gene seu ze ningnui ’nning gai ni lau:

¹⁹Mâ-helei ’nseu ge larei mei? Grepchîria, ’mbeuchîbang, turiechî bang, zai olib bang mâ de ’nchi mak rei mei? Nemai gene seu ze ningnui je I ’nnam gai gu de lei,” kacheu lei.

²⁰Dadege chipau kêu gu hezie ngkai ze medai mai ge Haggaibe dage Tingwang gu sam pakenabe wangchang de lei,

²¹“Judaram laksaibe Zerubbabelbe je salia lau, I ne kedei benai tingkehube tew’ngngai gai gu de lei,

²²zai heguangram gu heguang-bamrâ I ne tuâkeu gai gu de lei; zai heramzatme gu heguangram ramme gu peranchibe ze I ne tew’nsia gai gu de lei, zai hekun-timriang ramme benai chige chuame je I ne tewkeu gai gu de lei; zai hekun ramme benai penui je chuame ’ngngaikeu gu lei, ziemmena penui puiname gu hiazutkie gene kâukeu gu lei.

²³Chipau mai dezai, Hei Zerubbabel a guâ ka’ngguapeu, Shealtielbe na gau, ningchu I tei gu lei, ze baudime gu Tingwang ne kacheu de lei; zai ningchu heji taugaibe baroine gum ze I ne tew gai gu lei; ningchu I ne kelâng gai ’ndi daseu,” ze baudime gu Tingwang ne kacheu de lei.