Read Zeme Naga ZEKARIA 1 Bible Online

ZEKARIA 1 - Zeme Naga bible

ZEKARIA 1

¹Dariabe kaheguangbe pakenabe kum hekêu padesatbe kêu ge Iddobe chapeu zai Berekiabe na kemeu’mpeu Zekariabe dage Tingwang gu sam wangchang de lei, acheu sa ze,

²“Ning paume dage Tingwang â pe râta-desang la de lei.

³Chipauziegene Tingwang baudime Rapeu ne aigum ze rang lei: A lam helatwang lau, ze Tingwang baudime Rapeu ne kacheu de lei, ze penui je salia lau. Chidezai I ne ningnui lam helatwang dai gu lei ze baudime gu Tingwang ne kacheu de lei.

⁴Ningnui paume gum bam se lau, tingtie ge kemeume ne acheu ze sa ze, ‘Tingwang baudime Rapeu ne aigum ze rang lei, ningnui tebamtak kesiabe benai ningnui tatew tak kesiabe gene helatwang dai de lau,’ ze paugaibeime gum zeu. Kane penui ne a kuâ seu mak zai mâ-hangge du chak kai mak tai de lei, ze Tingwang ne kacheu de lei.

⁵Ningnui paume penui ’ndaige la lau? Zai kemeume penui betingbeta ring bam mei?

⁶Kane a guâ ka’ngguame, kemeume ramme je a sam ramme benai a gu hingde rawgaibe ramme I diegaibe ze ningnui paume ramme peireige deîtau gai mak tai semei? Chigum ze penui lung heli di ze, Tingwang baudime Rapeu ne anui kebambe benai tâtewbe ’mpuî leine ge nguatatew gu lei be pa ne ’nninggailube luigum ze anui dage nguatatew de lei, ze kacheu de zeî lau,” ze acheu zeu.

⁷Dariabe kaheguangbe pakenabe kum ge Shebat kêu, chize hekêu pakereu ze katbe kêu gu hezie ’ngkai ze medai mai ge Iddobe chapeu zai Berekiabe na kemeu’mpeu Zekariabe dage Tingwang gu sam wang de lei; dadege Zekariabe ne,

⁸“Tingmuî ge I ngau lei, pie le lau, ziemmena hangkat ne hekun kegiebe chua de lei! Pebakchuak ge Murtel chingbang zeu ge pa sap bam lei; dadege pe chaige hekun kegiebe, gietikriabe, zai kehâbe ramme bam lei.

⁹Chidadege I ne ‘A pau gau, airamme ’ndaikau rei lau?’ kacheu de lei. Tinggîm angel’mpeu achu ka’mpaupeu ne achu, ‘Chiramme ’ndaikau mei be I ningchu teilia gu lei,’ kacheu de lei.

¹⁰Chidadege Murtel chingbang zeu ge sappeu ne kak ze, ‘Airamme ze â kedeirei reî ze tatrua ra Tingwang ne langgaibe kau ramme de lei,’ kacheu de lei.

¹¹Dadege Tingwang gu angel’mpeu, Murtel chingbang zeu ruage sappeu je penui ne kak ze, ‘Anui ne kedeirei pieruatui gai de lei, zai pie le lau, kedeirei luî yi la kam lei,’ ze kacheu de lei.

¹²Chidadege Tingwang gu tinggîm angel’mpeu ne, ‘Hei baudime gu Tingwang gau, nang ne ai kum sena riâ ning lung siagai’ndime Jerusalem benai Juda gu namdi ramme peireige ’ndaitie riâ ngau’nggia gai mak ze bam gai ra rei lau?’ ze kacheu de lei.

¹³Dadege angel’mpeu achu ka’mpaupeu je Tingwang ne ’nggia ze tumbe sam ne kak kai de lei.

¹⁴Chigum ze achu ka’mpaupeu angel’mpeu ne achu, ‘Ning rankai ze sarua gai du lau, Tingwang baudime Rapeu ne aigum ze rang lei: Jerusalem benai Zaion peireige I a lunggailak-desang de lei.

¹⁵Zai heram ramme temichai ze bamme je I a râta-desang de lei; I â kecheîne runne a lungsia lei, kane mi duânggabe, pausiabe hangge penui ne kai gai sua lei.

¹⁶Chipauziegene Tingwang ne I ngauka’nggiabe gene Jerusalem ge helatwang gai de lei, ze aigum ze kacheu de lei; a ki chige tewchu gai gu, zai Jerusalem peireige mâ-ka’ndeube riâ ze gîngpat kai gu de lei, ze Tingwang baudime Rapeu ne kacheu de lei.

¹⁷Ning rankai ze paugaidairabe ze Tingwang ne aigum ze rang lei: A gu namdi ramme lung’ntua-desangchu gu lei, zai Tingwang ne Zaion je tum gai dai gu lei, zai Jerusalem je kelâng gai dai gu lei,’ kacheu lei,” ze kacheu de lei.

¹⁸Dadege I a mik rak’ndingchu gai de lei, zai ni pie le lau, mâkie medai I ngau lei!

¹⁹Chidadege achu ka’mpaupeu angel’mpeu je I ne, “Airamme ze ’ndaikau rei lau?” kacheu de lei. Dadege pa ne achu, “Airamme ze â Juda ge, Israel ge zai Jerusalem ge kairaripkai’ndibe mâkie ramme de lei,” ze kak lei.

²⁰Chidadege â Tingwang ne hegeî kahekime hangmedai je achu ngualia de lei.

²¹Dadege I ne, “Aime bau ze ’ndaikau tew ra wangbe kau lau?” ze kacheu de lei; pa ne achu, “Aime bau ze â Juda ge langraripkai’ndibe mâkie ramme de lei, chidezai ziemmena mî du pe peî ze ’ngngûchu mak ra hangge zeu; aime â Juda je hûtimra gai ra heramzatme gu mâkie ramme ’nduasûn gai lu ze bamme je tuâkeu gai ze penui je tewgechimrim gai ra wangme bau de lei,” ze kak lei.