Read Zeme Naga ZEKARIA 10 Bible Online

ZEKARIA 10 - Zeme Naga bible

ZEKARIA 10

¹Tingwang dagene tingruibe kie zu lau, keriakting gu tingruibe ting ge hedui tingsît tewgaipeu, ziemmename haimena je penui gu helu ge mâ-himlei hangge tingsim peipeu jeu.

²Teraphim (hera ramme) ne peruânggabe sam dam, zai heduaîchime ne mâ-kemak-makbe ramme ngau; hemang ’ndichime ne deuzie mang ramme ’mmi, zai ’nta perua ne ziemmena suî tewka’mmi lei. Chipauziegene ziemmena ramme meli gum ze kezitrua lei; melireîpeu gabe ziegene penui je deîhereu ze bam lei.

³“Melireîme peireige I ne a lumpumsie la de lei, zai I ne kanguame ramme je tewsâ gu lei; Tingwang baudime Rapeu ne pe gu melidung, Juda kibaume je ’nningkatinggeu lei, zai herei ge hekun peranchibe kau gum ze bam ra penui je tew gai gu lei.

⁴Penui dagene pemik-chukâng zuapat ku lei, penui dagene hetiam paîria gingbe gu pa’ntung ze pat ku lei, penui dagene herei gu bai’mpi pat ku lei, penui dagene samrampeu singbe pat ku lei.

⁵Penui ’nteumena ne herei ge ziemmena peranchime gum ze bam gu lei, keloaning timdeu zeu ge heteureime je kedîmrua gu lei; Tingwang penui dage bambeibe ziegene penui ne herei’nggi gu, zai penui ne hekunchingchuame je tewkau kam gai gu lei.

⁶“Juda kibaume ran I ne tew’nchi gai gu lei, zai Josep kibaume je I ne tew’nringpat kai gu lei. Penui peireige I ngauka’nggiabe ziegene I ne penui je nguawang gai dai gu lei, zai penui je I ne tuâpatkaimakbe kau ramme run ze bam gu lei; I ne penui Rapeu Tingwang changbe ziegene I ne penui je penui kuâ kak kai gu lei.

⁷Ephraim ne herei ge peranchipeu gum chang gu lei, wain ne puîka’ntabe gum ze penui lung’ntaza ze bam gu lei. Penui chaname chize ngau lu penui suiyi’nta gu lei, Tingwang dage penui lung suiyibe ’nsumchai ze bam gu lei.

⁸“I ne mâge â penui je chî ra hang tewlia gai lu ze penui je nguagut kai gu lei, I ne penui je ’nripat kai ’ndi daseu, zai penui tingtie bambe kie ze bam gu lei.

⁹I ne penui je heramzatme ruage kumrarip kai bei ze bam sede kedeube heram ramme gene penui achu chibam gu lei, zai penui chaname je ngualung gu, zai helatwang dai gu lei.

¹⁰I ne penui kiram ’mbe penui je Ijip gene nguawang gai gu lei, zai Assiria gene penui je gekumwangherua gai gu lei; zai I ne penui je Gilead benai Lebanon ’mbe nguawang gai bam gu lei, penui hangge bâm bam tâne gezeu.

¹¹Penui Ijipram sungkling ka ze tat ku lei, zai sungkling heduiteleu ramme je lak’mbia gai gu lei, zai Nail geuki gechukbe ze changpû gai du lei, Assiriame kakengangbe ze kêusui ze bam du lei, zai Ijip gu langsiutui ze tat tu lei.

¹²Tingwang gene I ne penui je penui ran tew’nchi gai gu lei, zai pe ji gene penui tat bam gu lei,” ze Tingwang ne kacheu de lei.