Read Zeme Naga ZEKARIA 11 Bible Online

ZEKARIA 11 - Zeme Naga bible

ZEKARIA 11

¹Hei Lebanon gau, ning gu ’ngkam ramme lat kai zu lau, chidezai ning gu kedarbang ramme hemi ne peize rûbuak ne ra hangge zeu!

²Hei chingkeleu bang gau, ning laîpat ze heu-desang zu lau, kedarbang ze kâukeu di daseu, hingbang yi-kadesangbe bang ramme sia kam di daseu! Bashan gu ’mpubang ramme gau, ningnui laîpat ze heu-desang zu lau, ’nreûzeu kedibe gechimkau kam ’ndi daseu!

³Hai, melireîme ne penui laîpat ze kadesuibe kuâ ze ’ngking gai ni lau, penui gu hereubuâ yibe ramme tew’nsiakam’ndibe ziegeneu! Hai, ni, duilui ramme ’nra la de lei, Jordan ’nrêukang ze ’nduchui bamdibe ziegeneu!

⁴Tingwang a Rapeu ne aigum ze rang lei: “Bichat’nderabe meli ramme gu melireîpeu I chang di de lei.

⁵Hemei luirame bau ne pekaupui ze tewchat te lei, zai tewsâ gai mak tai de lei; zai penui hemei zuame bau ne, ‘Tingwang je toa lau, I lungyipat te lei,’ kacheu de lei; zai penui gu melireîpeu singme ne penui peireige ngau’nggia gai mak te lei.

⁶Aipau heram ge lung ze bamme peireige I ne ngau’nggia ta du dadegeu ze Tingwang ne kacheu de lei. Pie le lau, ziemmena ramme je pe gu-gu heguang zai pe gu-gu melireîpeu dage kau gai ra I ne tew gai gu lei; zai penui ne heram peireige tewnei-neibe tak tew gu lei, zai penui ba gene I ne mi je du lupat kai ra mak lei,” ze acheu zeu.

⁷Chigum ze besiemakbe tewme, zuakakelime hangge bichatkairabe meli ramme gu melireîpeu I ne chang di de lei. Zai I ne hetui kena tei de lei; hetui kat ji hangge I ne Ngauka’nchâbe acheu ze ’ntak kai lei, zai kêdabe hetui kat ji hangge I ne Pebâu kaheruabe acheu ze ’ntak kai lei. Dadege I ne meli ramme je kateleu de lei.

⁸Melireîme hangchum je kêu kat lung gene I ne tew’nsia gai ’ndi de lei. Kane penui je I liekualak-desang bam di de lei, zai penui ne du achu ngaugailak luisui di de lei.

⁹Chidadege I ne sa ze, “I ne ningnui gu melireîpeu chang ra mak lei. Chairabe kau je peize chai de zu lau; tew’nsia’nderabe kau je peize tew’nsia ’ndu lau; zai ’nsakpatme ne peize kat-kat karai ji keduaiteu zu lau,” acheu bei de lei.

¹⁰Dadege I ne ziemmename zat leine dage samhat penui dage tewgaibe ze tew-peduâng gai ’nde ra hangge a gu hetui, ‘Ngauka’nchâbe,’ tei lu, chize tewbet kai ’ndi de lei.

¹¹Chigum ze chipau mai ge a gu samhat ze tew-peduâng gai ’ndi de lei, dadege besiemakbe tewme meli zuakakelime, achu pie ze bamme bau zene chize Tingwang gu sam de lei be chî di de lei.

¹²Chidadege I ne penui je, “Ningnui ne betâu de lei bei zai â, a hî hangge chak kai lau; kane chize mak lei zai â, penui je reî’mmi lau,” acheu bei de lei. Dadege penui ne a hî hangge gepût shekel himreu ’nchupat kai bei de lei.

¹³Chidadege Tingwang ne achu, “Chiramme ze keruaki ge suk kai ne lau,” kacheu de lei, penui ne a hang chakkaibe mî ramme zeu. Chigum ze I ne gepût shekel himreu ze tei lu Tingwang ki gu kellumki lungge suk kai bei de lei.

¹⁴Chidadege I ne a gu kêdabe hetui kat, ‘Pebau kaheruabe’ ze tew’mpak kai ze Juda benai Israel kakge besikina hegupgit bambe ze tew-peduâng gai bei de lei.

¹⁵Chidadege â Tingwang ne achu, “Melireîbe kau ’ntakau gu kerua ramme lu dai rî lau.

¹⁶Pie le lau, heram lungge meli reîtelamchibe kau, zai meli gadibe je ’nninghereumakbe kau, meli kahejambe teleugailakbe kau, meli keyibe ramme tei’mmimakbe kau, kane peleuyi-yibe tewchat ze teu ze pe pî’nchîn tewpângchibe kau je I kai gu lei.

¹⁷Melireîpeu ’nta kau, meli ramme je sâudiakkaichibe kau hangge mi duângga gu lei! Hiazutkie ne peize pe ba benai pe mik hezat’mbia mik bi be lau! Peize pe ba ’ngkeîkelak kai de lau, pe mik hezat’mbia mik ze peize chitprempem bam de lau!” ze kacheu de lei.