Read Zeme Naga ZEKARIA 14 Bible Online

ZEKARIA 14 - Zeme Naga bible

ZEKARIA 14

¹Pie le lau, ningnui dagene hereichâ hang sutlube kerua ramme ze ningnui ruage timzidairabe mai Tingwang gu tingnaimikpui ze wang’nna mui de lei.

²Jerusalem je herei’nggi ra I ne heramzatme leine je nguawang’ndui gai gu lei, zai namdi ze lu ’ndu zai heki ramme gechup ku zai ’mpuimi ramme je tew’nsia gu lei; namdi pa’mpime je â keli bei ze tat ku lei, kane kêdame ramme je â namdi gene lutua ra mak lei.

³Chidezai Tingwang herei mai ge pa kaherei gum ze pa ne tat ze heramzatme ramme peireige herei gu lei.

⁴Chipau mai ge tingbia ’mbia ge Jerusalem suage bambe Olib Loa ge pe pî ne sap ze bam gu lei; zai Olib Loa ze tingbia ’mbia gene tingrun ’mbia riâ chang ze bekâm kedibe kena hangge pângpat tu lei; chidezai kedeiloa gu pa’mpi riâ ze tingpeî ’mbia hanggesin gu zai kêdabe kat ze tingpî ’mbia wangkeugesin gu lei.

⁵A gu kedeiloa kak bekâm gene ningnui paktat ku lei, chipau bâm ze â Azel deîtauchang daseu; zai Juda gu heguang Uzziabe ting ge kedei-kaketeibe gene ningnui pak ’ngka ge gum ze ningnui pak ku lei. Chidezai Tingwang ningnui Rapeu ne pe gu angelme je ngua lu wang gu lei.

⁶Chipau mai ge kahegeibe benai kebunkeube bam ra mak lei.

⁷Zai tîngna tingmuî bam ta di, mai kat luî ze bam bam gu lei, hegî hî ge du kebabe bam bam du dadegeu, aize â Tingwang ne chikuadibe tingnaimikpui de lei.

⁸Chipau mai ge Jerusalem gene hedui keringbe luapat kû zai chi pa’mpi dui ze tingbia ’mbia gu sungkling ’mbe lua gai gu zai kêdabe pa’mpi dui ze tingrun ’mbia gu sungkling ’mbe lua gai gu lei; chize hetating benai tinglumting ge luasau mak peluî ze lua bam gu lei.

⁹Zai Tingwang ne kedeirei leine gu Tingwang chang ze bam gu lei; chipau mai ge Tingwang kat runne bam gu zai pe ji du kat runne bam gu lei.

¹⁰Geba gene chu ze Jerusalem gene tingpî ’mbia Rimmon riâ chang ze heram ramme leine ze bekâm kat hangge chang kam gai du lei. Kane Jerusalem â Benjamin gu Kemui gene tingtie ’ngka gu kemui, Helabe Kemui riâ zai Hananel gu heki kehube gene heguang gu wain niakbe bâm riâ changbe ge bamchâmcheî ze bam du lei.

¹¹Zai ziemmena ne lungpuigit ze bam gu lei, desetkaibe bam dai ra mak daseu.

¹²Aipau herarît zat zene Jerusalem peireige kahereime je Tingwang ne tewhereugairabe kau de lei: Penui saplaleube luagene penui chie tiamwang gu, penui mik kuîlung ’mbene penui mikcheu tiam gu zai penui mui lung ’mbene penui lei tiamwang gu lei.

¹³Chipau mai ge tew’nnakeugairabe ze Tingwang dagene penui peireige langkeu gai gu lei, chidezai kat-kat ba bia ze herat ku lei;

¹⁴Juda ’nsangnedu Jerusalem peireige ’nggi gu lei. Heramzatme lungguâ ze mâ-mâ ge bamme leine gu heurâ ramme gechâk, gepût, paîheni misongga ze kehiauwang’ndui gai gu lei.

¹⁵Zai aigumbe herarît zat zene hekun ramme, kunpa ramme, put-hu ramme, hekunmerângne zai kêdadabe kaurui ramme penui gu tejeîki ramme ge bambe leine peireige keu gai ze bam gu lei.

¹⁶Chidezai Jerusalem je ’nggi ra wangme heramzatme ruage ring’nsakpatme ramme zene Tingwang baudime Rapeu je kellum ra, zai hetiamki-ngi hengî ra patingkum-gepat tâne Jerusalem ’mbe hang bam gu lei.

¹⁷Zai kedeirei ge heki-kelak ramme ne Tingwang baudime Rapeu je kellum ra Jerusalem ’mbe hang mak tizai â, penui peireige tingruikeu gai ra mak lei.

¹⁸Zai Ijipme ki-kelak ramme ne hang ze penui runne penui je chige peipatliâ gai mak tizai â, hetiamki-ngi kahengîbe ge heramzatme hangmakme peireige Tingwang ne tewkahereube herarît, chize ne penui peireige wang gu lei.

¹⁹Hetiamki-ngi kahengîbe ge hangmakme Ijip benai heramzatme leine peireige aize ne tewsabe hang peirabe kau de lei.

²⁰Chipau mai ge hekun ne pungbe ’mbang ramme ge “Tingwang hangge Ka’nchibe” acheu ze raw gai gu lei. Zai Tingwang ki ge heli bambe ramme ze herâtewbe-kaira suage mâkuak poine ramme bambe riâ hangchang gu lei;

²¹zai Jerusalem benai Juda ge bambe heli ramme leine ze Tingwang baudime Rapeu hangge ka’nchibe chang ze bam gu lei, chidezai herâtewbe pualiame leine ne wang ze chiramme lu lu, chigene herâtewbe mei ji lang ra hangge zeu. Zai chipau mai ge Tingwang baudime Rapeu ki ge helîkahedetme bam ta du de lei.