Read Zeme Naga ZEKARIA 2 Bible Online

ZEKARIA 2 - Zeme Naga bible

ZEKARIA 2

¹Zai a mik rak’ndingchu gai de lei, zai ni pie le lau, ziemmena pe ba ge mâ-ka’ndeube ria teipeu je I ngau lei!

²Chidadege I ne, “Nang ’ndai’ngge tat lau?” ze kacheu de lei. Dadege pa ne achu, “Jerusalem pedit benai petâ ze ’ndaibe riâ mei be ’ndeu ra lei,” ze kacheu de lei.

³Zai pie le lau, achu ka’mpaupeu, angel’mpeu tatwang de lei, dadege angel’mpeu kêdapeu pechu hedau ra tatwang de lei,

⁴zai pe suage, “Paktat lu chi rehang’mpeu mâria teipeu je, ‘Ziemmena benai kaurui ne puidibe ziegene Jerusalem ze keloa ramme ne bampuigit nan ze kerie riegua ta di de lei.

⁵Hemi ne kerie rieguabe hang I zene chang ra de lei, zai I zene pelungki ge pengêudibe hang chang ra de lei,’ ze rang gai du lau,” ze kacheu de lei.

⁶Chau! chau! Tingpî ’mbia gu heram gene pat te zu lau, ze Tingwang ne kacheu de lei; tingsung kedibe gu tingkai medai gum ze ningnui je langrarip kai lei, ze Tingwang ne kacheu de lei.

⁷Chau! ’Mbia de lau, Zaion, nang Babilon’mpui dage bambe kau gau.

⁸Tingwang baudime Rapeu ne aigum ze rang lei, pa pengêudibe bambe luigumbe gene ningnui je rik ze tewkakeleume heramzatme dage achu lang gai bei de lei, ningnui je ’nggi ze deîtaugaibe kau â, I ne ka’nzâbe je pa deîtaugaibe chang lei:

⁹“Pie le lau, I ne penui peireige a ba kezap kai gu de lei, chidezai tingkat ge penui guâ ’nggua gai ze bamme ne penui gu sut dai gu lei. Chipau châng dezai Tingwang baudime Rapeu ne achu lang gai lei be ningnui chî gu lei.

¹⁰Hei, Zaion ’mpuimi gau, heleutew ze ning suiyi du lau; pie le lau ni, ning dage I bam ra hang wang lamui de lei ze Tingwang ne kacheu de lei.

¹¹Zai chipau mai ge heram ramme misonggame ne Tingwang dage penui run runne wangherua gai kam gu lei; chidezai I ne penui ruage bam gu lei, zai Tingwang baudime Rapeu ne achu ningnui dage lang gai lei be ningnui chî gu lei.

¹²Dezai ka’nchibe heram ge Juda ze Tingwang ne pe gu heram chang ze ’nram gu lei, zai Jerusalem je kelângpat kai dai gu lei,” kacheu de lei.

¹³Tingwang suage ziemmena leine ne rim bam zu lau; pebâm ka’nchibe gene perunne zuachu de daseu.