Read Zeme Naga ZEKARIA 4 Bible Online

ZEKARIA 4 - Zeme Naga bible

ZEKARIA 4

¹Zai angel’mpeu achu ka’mpaupeu a dage wang gai kadai de lei, zai ziemmena je pa kejeibe gene ’ngkia gai bei gum ze achu ’ngkia’nrakhak kai de lei.

²Dadege pa ne achu, “Nang ’ndaikau ngau lau?” kacheu de lei. Dadege I ne, “Gechâk ’nnia gu hemibung-kaira bepeirei ge mâkuak bambe benai chige hemibung sena zai chi hemibung sena kat-kat ge kachâlei muiki sena bam lei.

³Zai chipau hiage olib chingbang kena bam lei, kat ze mâkuak gene hezat’mbia ge bam, zai kêdabe kat ze heku’mbia ge bambe I ngau lei,” ze acheu bei de lei.

⁴Dadege achu ka’mpaupeu angel’mpeu je I ne, “A pau gau, airamme ze ’ndaikau rei lau?” ze kacheu de lei.

⁵Chidadege achu ka’mpaupeu angel’mpeu ne achu kak ze, “Airamme ze ’ndaikau mei be nang â chî mak mei?” ze kacheu de lei. I ne, “A pau gau, I â chî me lei,” acheu bei de lei.

⁶Dadege pa ne achu, “Aize Tingwang sam Zerubbabelbe hangge peibe de lei: A ranchi ne mak, a rimchi ne du mak, kane a gu Herui ne lei, ze Tingwang baudime Rapeu ne kacheu de lei.

⁷Ningchu â ningdaulak lei, Hei peloa kedibe gau? Zerubbabelbe suagene nang zene bekâmtenaibe pebâm yibe hangge chang gu lei; zai pa ne, ‘Peluiyi-desang lei, peluîyi-desang lei,’ acheu ’ngkiak ze bepeirei chukâng teiwang gai gu lei,” ze kacheu de lei.

⁸Chipau peireige du Tingwang gu sam a dage wangkeu ze,

⁹“Zerubbabelbe ba gene aipau ki gu pedimchukâng kai gai ’nde lei; chize pe ba gene tew du tew kam gai gu lei. Chidezai Tingwang baudime Rapeu ne achu ningnui dage lang gai lei be nang ne chî gu lei.

¹⁰Heki dîmchu’nchui gai-du-makbe tingnaimikpui ngaume leine ne penui suiyi’nta gu lei, zai Zerubbabelbe ba gene tingchu kuaisi ze tewbambe ngau gu lei. “Airamme sena ze kedeirei pelane ruatuibe Tingwang mik lei.”

¹¹Chidadege â I ne pechu, “Hemibung-kaira gene hezat’mbia benai heku’mbia ge olib chingbang kena bambe ze ’ndaikau rei lau?” acheu bei de lei.

¹²Zai pakenabe ge I ne pechu, “Mâ-châdui ruîpatbe gechâk ne tewbe beki putkapelabe heria hiage bambe olib chingbang keî kena ze ’ndaikau rei lau?” ze acheu bei de lei.

¹³Pa ne achu, “Airamme ze ’ndaikau mei be nang â chî mak mei?” ze kacheu de lei. I ne, “A pau gau, chî me lei,” ze acheu bei de lei.

¹⁴Chidadege pa ne, “Ai hangna ze â kedeirei leine gu Tingwang guâ ’nggua ra kelâng ze ’nnukkai’ndibe kena de lei,” ze kacheu de lei.