Read Zeme Naga ZEKARIA 7 Bible Online

ZEKARIA 7 - Zeme Naga bible

ZEKARIA 7

¹Heguang Dariabe kaheguangbe pamedaibe kum gu pasekuibe kêu (chize Kisleb kêu) ge hezie pamedaibe mai ge Zekariabe dage Tingwang gu sam wangkeu de lei.

²Zai Bethel ge bamme ne Sharezerbe benai Regem-melekbe zai penai gu ziemmena ramme je Hera ngauka’nggiabe kie ra,

³zai Tingwang baudime Rapeu ki ge tingkume benai kemeume je, “Tingkum misongga ze I ne tewtattibe luigum ze pamengeube kêu ge desui ze teseurei ra kau mei?” ze kacheube sam ’nneu gai ra lang gai de lei.

⁴Chidadege â Tingwang baudime Rapeu gu sam a dage wangkeu de lei:

⁵“Heram ge ziemmena kebamme leine benai tingkume je salia lau. Acheutiege kum riaksena tat-hangbe lungge ningnui ne hekêu pamengeube kêu ge benai pasenabe kêu ge desui ze teseureibe luage a hanggene ningnui teseureibe kau mei?

⁶Zai ningnui ne teu ze sak ze bambe luage ningnui hanggene teu ze sak mak mei?

⁷Jerusalem ze ziemmena ne lungpuigit bambe ting zai lung’ntua-desang ze pechu namdi ramme ne bamguâ ze tingpî ’mbia heram ge benai bekâmram ge lungpuigit ze bambe ting ge aipau sam ramme ze tingtie kemeume ne paugai’ndibe sam ramme mak ti lau?” ze acheu zeu.

⁸Dadege Zekariabe dage Tingwang gu sam wangkeu ze,

⁹“Tingwang baudime Rapeu ne aigum ze rang lei, samram’mmi lau, kat-kat sikina hangge kehungbe benai ka’nggiabe teilia lau,

¹⁰kemîpuime, penui peugame, tingkat bamgaileume mei nune kelaksiame mei je geted se lau; zai ningnui ruage peize mî ne du pe sikina peireige pe lung gene kesiatew ra ’nning se lau,” kacheu de lei.

¹¹Kane penui ne seugailak ze ’nnuklap kai lu penui kun seumakrabe tak hangge tew ze bam de lei.

¹²Penui lung ze kegitsiak ze bam di-di lei, makchai â, Tingwang baudime Rapeu ne tingtie kemeume dagezene pe gu Herui ne langgai’ndibe hingde benai sam ramme penui seu gu dadegeu. Chipauziegene Tingwang baudime Rapeu dagene helumpumbe wangkeu de lei.

¹³“I kû bei ze penui seumakbe ziegene penui ku bei ze I du seu mak te lei,” ze Tingwang baudime Rapeu ne kacheu de lei,

¹⁴“zai penui chimakme, heramzatme ruage tingkai-natri gene penui je I ne teikezitrarip kai bei de lei. Chigum ze mî du chige tat’ngguak ta di heram ze putzîng bam di de lei, zai heram misuiyiberam ze putzîng bam de ra tew gai bei de lei,” kacheu de lei.