Read Zeme Naga ZEKARIA 8 Bible Online

ZEKARIA 8 - Zeme Naga bible

ZEKARIA 8

¹Zai Tingwang baudime Rapeu gu sam a dage wangkeu ze,

²“Tingwang baudime Rapeu ne acheu ze rang lei: Zaion peireige I ne a lunggailak-desang lei, zai pe ziegene a râta’nteu nan ze a lunggailak-desang lei.

³Tingwang ne aigum ze rang lei: I ne Zaion ’mbe helatwang dai ze Jerusalem zuilung ge bam gu lei, zai Jerusalem ze lungsangtewchibe namdi, zai Tingwang baudime Rapeu gu peloa, peloa ka’nchibe ze kû gu lei.

⁴Tingwang baudime Rapeu ne aigum ze rang lei: Gechîngme chipau, chipaime gechîng tui teiperiu lu Jerusalem keloa’ndi ramme ge ’ntaudam bam dai gu lei.

⁵Zai namdi gu puidi ramme ge rehang-heleume ramme ne ’ntapedum bam gu lei.

⁶Tingwang baudime Rapeu ne aigum ze rang lei: Aipau ting ge aize aime baudime, ’nsakkaibeime bau ne ’nningchi lak ze bambeibe ziegene I du chige ’nningchi lak ze bamrabe kau mei? ze Tingwang baudime Rapeu ne kacheu lei.

⁷Tingwang baudime Rapeu ne aigum ze rang lei: Pie le lau, I ne a gu ziemmename je tingbia ’mbia gu heram benai tingrun ’mbia gu heram gene tew’nringpat kai gu lei;

⁸zai I ne penui je Jerusalem zuilung ge lung ra nguawang gai gu lei; chidezai penui ne a gume chang gu zai I ne penui Rapeu chang gu lei, lungsangtewbe benai kapelingbe geneu,” kacheu de lei.

⁹Tingwang baudime Rapeu ne aigum ze rang lei: “Kellumki tewchurabe hangge Tingwang baudime Rapeu ki gu pedimchukâng kaibe mai gene seu ze chuna ting ge ningnui kemeume mui gene aipau sam ramme seulume, peize ningnui ba ranchi ze bam lau.

¹⁰Tingtie besua’ngka ge â ziemmena pa benai mârekaune hangge tâtewbe hezie hî ngau mak ze bam de lei, zai ziemmena tat ze wangme hangge heteureime dagene zeûne ze bambe lungkatemibe du chî mak ze bam de lei; ziemmena ne pekang karai kat-kat je ’nggi ra I ne ziemmena leine je tew gai bei dadegeu.

¹¹Kane chuna â tingtie ge gum ze aime ’nsakpatme je I ngua ra mak lei, ze Tingwang baudime Rapeu ne kacheu de lei.

¹²Penui gu mâ-himlei ramme puakpat ku lei, grepchîria ze pechîhuâ misongga pat ku lei, zai kedei zene mâ-hîmra perachî pat ra pei gu lei, zai tinggîm ne pe gu kezikdui pei gu lei; dezai airamme leine ze aime ring’nsakpatme ne nguaheu ra pei gai gu lei.

¹³Zai heramzatme ruage ningnui peireige deset kai ze penui ne ningnui je teisa ze sa’nsia bam daze, Hei Juda benai Israel kibaume gau, I ne ningnui je tew’nring gai gu, zai ningnui ze ’nnamgaibe chang gu lei, Hing se lau, kane peize ningnui ba ranchi ze bam lau,” ze acheu zeu.

¹⁴Tingwang baudime Rapeu ne aigum ze rang lei: “Ningnui peume ne a rata tew ze bambe ting ge ningnui peireige I kesiabe tew gai ra ’nningpat kai de lei, zai I ne mâ de ’nggia ta di de lei ze Tingwang baudime Rapeu ne kacheu de lei,

¹⁵chigum ze chuna ting ge Jerusalem benai Juda ki peireige keyibe tew gai ra I ne ’nning gai kadai de lei; hing ze bam se lau.

¹⁶Airamme ze ningnui ne tewrabe zat ramme de lei: Kat-kat je samsang ne ’mpau lau, ningnui gu samrambe bâm ramme ge samrambe ka’nzeibe peize bam lau, zai desieyichirabe hangge tew gai lau,

¹⁷kat-kat peireige kesiatew ra ningnui lung ge ’nning se lau, deuzie ne sam kadeseube je ’nchâ se lau, airamme leine ze I ne ngaugailak daseu, ze Tingwang ne kacheu de lei,” ze acheu zeu.

¹⁸Zai Tingwang baudime Rapeu gu sam a dage wang de lei,

¹⁹“Tingwang ne aigum ze rang lei: Pamedaibe kêu ge teseureibe, zai pamengeube kêu ge teseureibe, zai pasenabe kêu ge teseureibe, zai pakereube kêu ge teseureibe ze Juda kibaume hangge misuiyibe benai mi suiyika’ntabe nehî ramme hangge, zai lung’ntakediâubambe nehî hangge lu gai ra lei; chipauziegene kehungbe, samsang zai desieyibe je ’nchâ lau.

²⁰“Tingwang baudime Rapeu ne aigum ze rang lei: Ziemmena zat ramme, zai misonggabe namdi ramme ge lungme ramme wang gu rei lei;

²¹namdi kat ge lungme ne kêdabe namdi ge tat lu ze, ‘Kei lei, Tingwang ngauka’nggiabe kie ra, zai Tingwang baudime Rapeu je peu ra tatchu kei lei; I â tat ku de lei,’ ze kacheu de lei.

²²Ziemmena zat misonggame benai peranchime heramzatme ne Tingwang baudime Rapeu je peu ra, zai Tingwang ngauka’nggiabe kie ra Jerusalem ’mbe wang kam gu lei.

²³Tingwang baudime Rapeu ne acheu ze rang lei: Chipau ting dezai pezat gechâm hekuâ gechâmme leine ruagene ziemmena hangkereume ne, ‘Hera â ningnui dage la lei, kacheube kuâ anui seu lu daze anui ne ningnui dage tat ra pei lau,’ acheu ze Juda’mpeu paî zam gu lei,” ze acheu zeu.