Read Zeme Naga MALAKI 1 Bible Online

MALAKI 1 - Zeme Naga bible

MALAKI 1

¹Israelme dage Tingwang gu kemeu sam Malakibe ne rawgaibe.

²Tingwang ne, “Ningnui je I hung ze la lei,” kacheu de lei. Kane ningnui ne, “’Ndaigum ze nang ne anui je hung ze la lau?” ze kacheu lei. Tingwang ne, “Esaube ze Jakobbe ’mpampatpeu mak mei?” ze kacheu de lei. “Sede Jakobbe je I ne hung ze la lei,

³kane Esaube je I ngaugailak lei; Esaube gu kedeiloa ramme perua bam ra I tew gai ’nde lei, zai pe heurâ tingkangram gu munserung ramme hangge sâu gai ’nde lei,” ze kacheu de lei.

⁴Edom ne, “Anui bambe bâm tewpâng gai bei de lei, sede siadibe ze anui tew’nsapchu dai gu lei,” kacheu zai â, baudime gu Tingwang ne, “Peize tew zu lau, sede penui tewgaibe I ne tew’nsia bam gu lei, miramme ne penui je ziemmena kesiame ram, betingbeta penui peireige Tingwang lumpum bam-bambe zat te lei,” ze acheu gai mak tâne gezeu.

⁵Aize ningnui mik sing ne ngau gu lei, dezai ningnui ne, “Israelme gu heramrai ’nzûtat ze Tingwang â pengêudi lei!” ze acheu gu lei.

⁶“Pe na ne pe peu ngeu-tew’ndi ze bam lei, zai ka’ngguapeu ne pe pau ngeu-tew’ndi ze bam lei. Acheuzaine I pe peu da, ’ndaige a ngeutew’ndigaibe la lau? Zai I pe pau chang zai â ’ndaige achu kehingbe la lau? Hei Tingkume a ji je naîlatewme gau, ze baudime gu Tingwang ne ningnui je kacheu de lei. Ningnui ne, ‘’Ndaigum ze ning ji je anui ne naîlatew gai bei lau,’ ze kacheu de lei.

⁷A gu herâtewbe-kaira ge kahebâbe hetak ne ningnui peipat kai lei. Zai ningnui ne, ‘’Ndaigum ze anui ne tewhebâ gai bei lau?’ ze kacheu de lei. Tingwang gu herâtewbe-kaira ningnui ne naîlatewduibe hang ’nninggaibe gene de lei.

⁸Herâtewbe ge hekaune pemikchitbe ne peibe ze kesiabe mak mei? Zai bepîsiabe benai ka’nrâbe ne peibe ze kesiabe mak mei? Chize ning ram ge laksaibe je pei be lau; ningchu pa ’nchâ gu mei, zai pe suiyi gu mei? ze baudime gu Tingwang ne kacheu de lei.

⁹‘Chunage Hera ne anui je ngau’nggia ra pe suigut tew ra ningnui peu zu lau.’ Chigumbe kela liâgaibe ningnui ba sing ne peibe ze pa ne ’nchâ gu semei? ze baudime gu Tingwang ne kacheu de lei.

¹⁰’Ntane a gu herâtewbe-kaira ge hemi’ntau gai mak ra, ningnui ruage hangkat â ’ngkam kainam ra kau bam laîzai neu, Hei! Ningnui peireige I a suiyibe mâ de ga lei, zai ningnui ba ne peigaibe kela I lu ra mak lei, ze baudime gu Tingwang ne kacheu de lei.

¹¹Naimik patbe gene naimik keube riâ chang ze heram zat leine ruage a ji â pengêudi ze la, zai pebâm’nsangne ge a ji hangge mâ-perîmyibe benai kela ka’nchibe peipat ze la lei; hezat leine ruage a ji â pengêudi ze la daseu, ze baudime gu Tingwang ne kacheu de lei.

¹²Kane ningnui ne Tingwang gu herâtewbe-kaira â hebâ de lei, zai chige tak bambe ze du mi tenet te lei, ze ningnui kacheube sam zene ningnui ne a ji tewkahebâbe chang de lei.

¹³Zai ningnui ne, ‘Airamme zene tewlei run de lei,’ kacheu de lei, zai a peireige ningnui ne ’nneîchai zeu, ze baudime gu Tingwang ne kacheu de lei. ’Nchi-chine sutpatlube, bepîsiabe, zai ka’nrâbe zat ne herâtew ra ningnui teiwangbe ramme ze ningnui ba gene I lu ra se mei? ze Tingwang ne kacheu de lei.

¹⁴Pe gu kauruidung ruage besei bambe ze pei ra samhat kai lu, Tingwang hangge heziâk bambe ne chua ze peime je â deset kai be lau; I â Heguang pengêudipeu daseu, A ji je â hezat leine ruage hing ze la lei, ze baudime gu Tingwang ne kacheu de lei.