Read Zeme Naga MALAKI 3 Bible Online

MALAKI 3 - Zeme Naga bible

MALAKI 3

¹“Pie le lau, a suage ’mpuî teleu ra a gu hepâupaupeu je I lang gai lei, zai ningnui ne peubepeu Tingwang â pe gu kellumki ge luakatne wangkeu gai gu lei; ni pie le lau, samhatkaibe hepâupaupeu ningnui ’nchâlangpeu wangkeu mui de lei, ze baudime gu Tingwang ne kacheu de lei.

²Kane pa wangkeube mai ge châu lie dui lau, zai pa wangkeu liâ dezai châu sap dui lau? “Pa â hegeî rûka’nchibe hemi gum, zai pa â paî kagetapeu gu sabon gum gu daseu;

³gepût hemi ne rûka’nchipeu zai tewka’nchipeu gum ze pa ’ntau gu lei, zai Lebibe name je pa ne tew’nchi gai gu lei zai gechâk benai gepût tewka’nchibe gum ze Tingwang hangge peling ne kela liâbe ka’nchibe herâtewbe hang chang mak tâne penui je pa ne tew’nchi gai gu lei.

⁴Chidezai ’ndâ gechîng ting ge gum zai besua’ngka ting gu tingkum ramme ge gum ze Judaram benai Jerusalem gu kelapualiabe ze Tingwang hang yilangbe chang dai gu lei.

⁵“Chidezai samramrabe hang ningnui dage I zuawang’nna gu lei; heduaîtewchime, kahemame, karasa ne kadeseume peireige, zai kemîpui benai ’nggiâne, zai hiteume, zai hesang tebeîtewme je tewsâme peireige zai achu hingmakme peireige I ne samram gai kelua gu lei, ze baudime gu Tingwang ne kacheu de lei.

⁶“I, Tingwang â helisua me lei; chipauziegene, Hei ningnui Jakobbe name gau, ningnui je deî’ngga gai mak te lei.

⁷Ningnui paume ting gene a gu hede ramme ningnui ’ngkatat kam di, zai ningnui tei du tei mak bam de lei. A dage helatwang dai lau, dezai ningnui dage I helatwang dai gu lei, ze baudime gu Tingwang ne kacheu de lei. Kane ningnui ne, ‘’Ndaigumbe tak gene anui helatwang dai ra lau?’ ze kacheu de lei.

⁸Ziemmena ne Hera gu sutteu ra semei? Kane ningnui ne a gu sutteu lei. Kane ningnui ne, ‘’Ndaigumbe tak gene anui ne ning gu sutteu lau?’ ze kacheu de lei. Ningnui gu kereu ge kat kaibe benai mâ-mâ peipatbe ramme gezeu.

⁹Desetkaibe ne ningnui je deset kai ’nde lei, ningnui ne a gu sutbe ziegeneu; ningnui pezat gechune a gu sutteu bam lei.

¹⁰A ki ge hetak bam ra kereu ge kat kaibe teiwang’nsang gai lau; dezai achu chigene kedak le lau, Tinggîm leubaki ningnui hang lat kai lu ze, ’nnamgaibe ramme misongga ’nniâmba ze ningnui hang I ne ruîkeu gai mak ra zai aî, ze baudime gu Tingwang ne kacheu de lei.

¹¹Ningnui gu mâ-hîmra ramme mâkâupui ne teu’nsia mak ra I ne penui je ’ngngiam gai gu lei; dezai ningnui gu kedei gene herachi patbe deî’nsia ra mak lei, zai ningnui gu grepchî lu ge perachî ’nchi mak ta ra mak lei, ze baudime gu Tingwang ne kacheu de lei.

¹²Dezaine pezat leine ne ningnui je paukaregame ze kû gu lei, ningnui â keyibe heram chang du daseu, ze baudime gu Tingwang ne kacheu de lei.

¹³“Ningnui sam ramme â achu saka’nsiabe sam ’nnia de lei, ze Tingwang ne kacheu de lei. Kane ningnui ne, ‘’Ndaigum ze anui ning peireige sa’nsia ze la lau?’ ze kacheu de lei.

¹⁴Ningnui ne, ‘Hera guâ ’nggua ra matâu hang ga lei, pa kerangbe sam anui lu ze tewbe benai baudime gu Tingwang suage kechaipuîhap gum ze zuawangbe ’ndaikau keyibe la lau?

¹⁵Chipauziegene gechîrettewme yibe hangge anui â riam gai de lei; tâ-kesiabe tewme penui tâ ge ka’nggimbe runne mak ze kane Hera je penui ne kedak dege penui ’nreipat lu lu lei,’ kacheu de lei,” ze kacheu lei.

¹⁶Chidadege Tingwang je hingchime â kat-kat dage mâ-’mpaukahelak lei; Tingwang ne penui kuâ seutâu gai bei de lei, zai Tingwang je hingchime benai pe ji je ’nningka’ndime hangge chibamrabe leisikuak ze pe suagene raw gai bei de lei.

¹⁷“Penui â a gume chang gu lei, I tâtewliabe mai dezai a heu I hunglangbe chang gu lei, zai ziemmena hangkat ne pe na pe luntewchibe kau je ka’nzâ gum ze penui je I ’nzâ gu lei, ze baudime gu Tingwang ne kacheu de lei.

¹⁸Chidezai ziemmena ka’nzeime benai kesiame, zai Hera guâ ka’ngguame benai ’ngguamakme kakge gechâmbe ningnui ngaupat dai gu lei.