Read Zeme Naga MATHAI 11 Bible Online

MATHAI 11 - Zeme Naga bible

MATHAI 11

¹Zai Isua pe gu kenieme hangkereu-ze-kename je sam rangrabe rang gai lu dege, chigene penui gu namdi ramme ge geteilia ra, zai sam paurua gai ra pa tat ti de lei.

²Zai Isua Krista tâtewbe rasam ramme Johanbe kebangki ge seu lu dege, pe chaisuime dagene sam lang gai ze,

³pe dage salia ze, “Nang ze wangkeurapeu de mei, nune kêdapeu je anui kuâ ra rei lau?” ze kacheu de lei.

⁴Dadege Isua ne penui je kak ze, “Tat ze ningnui kengaube benai keseube ramme Johanbe je salia be lau:

⁵Hemikchitme ngau la da, zai pepîsiame tat la da, ka’mpame je tew’nchi gai ’nda, kunpangme seu la da, kechaime je kuakchu gai dai ’nda, zai kelaksiame dage samyibe salia la de lei.

⁶Zai mi-mige de a peireige ’nning’nsiamakme yi de lei,” ze kacheu de lei.

⁷Chime tat ti dege, Isua ne baudime dage Johanbe rasam sachu ze: “Ndaikau ze pie ra hênamkang ’mbe ningnui tat rei lau? Hekubang tingkai ne guika’ngngaibe mei?

⁸Makchaine ’ndaikau pie ra hang ningnui tat lau? Paî ka’nnuaibe bâbepeu je pie ra mei? Pie le lau, paî kanuaibe bâme â heguangme ki ramme ge la lei.

⁹Makchaine ’ndaikau pie ra ningnui tat lau? Kemeu’mpeu je pie ra mei? Eu lei, ningnui je I rang lei, kemeu’mpeu suadu pa â di lei.

¹⁰‘Pie le lau, a gu hepâupaupeu je ning suage I lang gai lei, ning suage nang tatrabe ’mpuî hang pa ne teleu gu lei,’ ze acheu ze pe rasam hang rawgaipeu ze aipaupeu de lei.

¹¹Pelingsing ze ningnui je I rang lei, ’mpuimi dagene lungkeume ruage mî du Baptistewpeu Johanbe sua di ze pat merei lei; leusede tinggîm heguangram ge cheilangpeu â pa suadu di lei.

¹²Baptistewpeu Johanbe ting gene chuna riâ chang ze tinggîm heguangram zene ’nggî-kahegeibe lie ze bam lei, zai chi ze ka’nggime ne ’nchi-chine lu de lei.

¹³Kemeume leine benai hingde â Johanbe bambe ting chang ze rangka’ntua de lei;

¹⁴ningnui ne ’nnum’mmi nei zaine â wangkeurapeu Elijabe ze aipaupeu de lei.

¹⁵Seu ra pe kun bambe kau je â peize seu le lau.

¹⁶“Kane henaiting reheime je ’ndaikau ne I tei’nda ra lau? Napoine ramme hechaiki ramme ge ’ntau lu ze penui kangme je kû ze,

¹⁷‘Metiam ningnui je anui ’mmut kai bei ze, ningnui lim mak lei; anui hapdesui bei ze ningnui â, ningnui suisia mak lei,’ kacheube gum de lei.

¹⁸Johanbe teu de teu mak, sak de sak mak wangkeu bei, penui ne, ‘Herasiabe pa ngua la lei,’ ze kacheu de lei;

¹⁹ziemmena Na teu de teu zai sak de sak ze wangkeu bei, penui ne, ‘Pie le lau, mâ-teusuabe kau, zai kameneube kau, ’mpuâhame benai hemuime kangpeu!’ ze kacheu de lei. Acheusede kaningchingbe â pe tatew ne tew’nzei gai bei de lei,” ze kacheu de lei.

²⁰Chidadege pe gu tâ kedibe misongga tewgaibeibe bâm, namdi ramme je penui ne helunghelimakbe ziegene pa ’nrûchu di de lei.

²¹“Korazin gau, nang ning duângga gu lei! Beth-saida gau, nang ning duângga gu lei! Ningnai dage tâ-kedibe ramme tewbe, Tira benai Sidon ge tew gai bei laîzaine penui â miseigiriapaî bâ lu, zai timbun penui peî ge ketup kai lu ze, kenûge penui lung heli du de lei.

²²Kane ningnui je I rang lei, samrambe mai ge â ningnui hereurabe sua â Tira benai Sidon kahereube â lieyibi gu lei.

²³Zai nang Kaperna-um gau, tinggîm ’mbe ningchu suangchuchang gai gu semei? Kechaiberam ge ningchu teikeu gai ’ndu lei. Ning dage tâ-kedibe ramme tewgaibe ze, Sodom ge tew gai bei laîzai â chize henaiting bamchang gu lei.

²⁴Kane ningnui je I rang lei, samrambe mai ge â nang kahereube sua â Sodom gu heram kahereube â lieyibi gu lei,” kacheu de lei.

²⁵Chipau luage Isua ne rang’nchichiak kai ze, “A peu, ting-kedei Wangpeu, nang ne kaningchingme benai chîka’mmime dagene airamme ze tei’mbai nan ze, ’ngngiêne ramme dage liâbeibe ziegene ning dage a suiyibe sam pau gai lei;

²⁶eu lei, a peu gau, aigumbe ze nang ’nggia keyibe gene chang lei.

²⁷A peu ne achu mâgetaleine peipat kai kam gai ’nde lei; zai pe Na je mî de chî me lei, Bepeu runne zangnêu, zai mî de Bepeu je chî me lei, pe Na benai mi-mige pechu pe Na ne teilia ra kelânggaibe kau runne zangnêu.

²⁸Ningnui tâtew ze heput keritbe pungme leine gau, a dage wang lau, I ne ningnui je saukatemibe pei gu lei.

²⁹A gu guangkâm pung le lau, zai a dagene getei le lau; I â a lung kecheiluîtew zai karenuabe kau lei, chidezai ningnui keringbe kesaube ningnui ngau gu lei.

³⁰A gu guangkâm â pungyi, zai â put a ’ncha lei,” kacheu de lei.