Read Zeme Naga MATHAI 14 Bible Online

MATHAI 14 - Zeme Naga bible

MATHAI 14

¹Chipau ting ge Herodbe, Galili ge samrampeu Isua ji sasuangbe rasam seu di de lei;

²dadege pa ne pe guâ ka’ngguame dage, “Aize Baptistewpeu Johanbe de lei, kechaibe gene pechu kuakchu gai bei de lei; chipauziegene pe tatew ge ai tâtewchibe rezie ramme bam de lei,” kacheu de lei.

³Herodbe ne Johanbe je nîm lu, pi lu, kebangki ge kai bei lei, pe kinapeu Philipbe nâu Herodiale ziegeneu;

⁴Johanbe ne pechu, “Herodiale je nang lu ra hang besie mak lei,” ze acheubeibe ziegeneu.

⁵Zai Johanbe je pa tewchat nei da, kane baudime je pa hing lei, kemeu’mpeu hangkat hangge pechu penui ne riamgaibeibe ziegeneu.

⁶Kane Herodbe je lungkeube naimikpui wangchang dege, Herodiale na ’mpuimi ne baudime suage limbeibe ne Herodbe suî tew’mmi bei de lei,

⁷chipauziegene pa gekie-kiebe leine pei ra Herodbe ne deseu gai ’ndi de lei.

⁸Zai pe pui ne pechu gecheu gai bei ze pa ne, “Hekuak ge Baptistewpeu Johanbe peî ze achu pei lau,” ze acheu bei de lei.

⁹Dadege heguang â pe suîhereu di de lei; kane pa ne kadeseube benai pe kangme ziegene pechu pei be ra pa ne die gai bei de lei;

¹⁰dadege kebangki ge Johanbe peî dâng ra pa ne lang gai bei de lei,

¹¹dadege hekuak gene pe peî teipat lu, heleu’mpui je pei bei de lei, zai pa ne chize pe pui tailam teitat ti de lei.

¹²Dadege pe gu kenieme ne wang ze pe pum lu lu bai gai ’ndi de lei; zai penui ne tat ze Isua je pau gai bei de lei.

¹³Chize Isua seu lu dege, ’nnei gene chigene zîngbe bâm ’mbe tatchâmtat ti de lei. Kane chize baudime seu lu dege namdi ramme gene penui pî ne pe chai suitat ti de lei.

¹⁴Sungkling kung ge pa tatpat dege, baudime misonggame je pa ngau de lei; dadege penui je ngau’nggia-desang di ze, penui keteu-keneube tew’mmi bei de lei.

¹⁵Zai hegî dege kenieme pe dage wang lu pechu, “Aipau bâm â zîngbe bâm da, zai hegî de hegî de lei; keloa ramme ge tat ze penui deteu penui runne lui ra baudime je lang gai be lau,” ze kacheu de lei.

¹⁶Isua ne, “Penui tat ra ’nnang me lei; ningnui ne mâ-teu ra penui je pei be lau,” acheu bei de lei.

¹⁷Penui ne pechu, “Anui dage tingku mengeu benai hekâ kena runne lamui lei,” kacheu de lei.

¹⁸Dadege pa ne, “A tailam chiramme teiwang lau,” acheu bei de lei.

¹⁹Zai baudime je timpeizeu ge ’ntau ra pa ne lang gai bei de lei; zai tingku mengeu benai hekâ kena tei lu tinggîm ’mbe pie lu ze ’nnam gai de lei, zai tingku ze pa ne tiapâng lu, kenieme je pei gai de lei, zai kenieme ne chiramme baudime je pei bei de lei.

²⁰Penui ’nteumena teu lu ’nggeu di de lei. Zai penui teuka’nsakbe padesuine ’ntui kereu ze kena ruipui dai lu lei.

²¹Zai geteume hepui-hena je chak kai mak ze, ’mpeumi pumsâng chang mengeu riâ lei.

²²Dadege baudime je tat ra pa ’mpatkaibe luage, ’nnei ge gut kai lu kêdabe giam ’mbe kenieme ne pe sua-sua raîtat ra hangge pa tew gai de lei.

²³Zai baudime je pa ’mpatkailube chângge kellum ra hang pe runne peloa ’mbe hang di de lei. Hegî di ze chige pe runne bam bam lei,

²⁴kane ’nnei â ’nneigiam gene deu sang deu ze tat ti ze heduiteleu kechibe ne nupgetie ze bam lei; tingkai ne penui je gui’nrui ze bam dadegeu.

²⁵Zai hechua kûnta kechum benai seruk kakge Isua sungkling peireige tat ze, penui tailam wang de lei.

²⁶Kane sungkling peireige pa tatbe kenieme ngau lu dege, penui hingkedun di de lei, acheu sa ze, “Chize mâ-miê de lei!” ze penui kacheu de lei. Zai penui hing ze ka’nrung de lei.

²⁷Kane Isua luakatne penui je ’mpau ze, “Ningnui lungdi ze bam lau, chize I lei; hing se lau,” acheu bei de lei.

²⁸Dadege Peterbe ne pechu kak ze, “A Wang gau, nang sing de lei dizaine â hedui peirei gene ning tailam achu kûwang gai lau,” ze kacheu lei.

²⁹Pa ne, “Wang lau,” acheu bei de lei. Chidadege Peterbe ’nnei gene hela pat lu, Isua tailam hedui peirei gene pe pî ne tatwang di de lei;

³⁰kane tingkai chibe guibe pa ngau lu dege hing di de lei, zai pa kêugut kai ra chang di de lei, “A Wang gau, achu tew’nringpat kai lau,” ze ka’nrung de lei.

³¹Dadege luakatne Isua ne pe ba getuapatchang lu, pechu herak lu, pechu, “Nang keneibe chambe kau gau, ’ndaitew ze nang ’nnum’mmi mak lau?” kacheu de lei.

³²Zai ’nnei ge penui keuchu gai di dege â tingkaiguibe sau di de lei.

³³Dadege â chi ’nnei lungge bamme ne pechu keikeu ze, “Pelingsing ze nang â Hera Na lei,” ze kacheu de lei.

³⁴Zai katlam giam penui kapat dege, Gennesaretram kedei ge penui patchang de lei.

³⁵Zai chipauram ge bamme ramme pechu chî lu dege, chipauram huâzie leine ge penui ne lang gai bei ze teuneume leine je pe dage penui teiwang de lei,

³⁶zai pe paîri ramme runne leusedu penui deîtau gai ra hangge penui pechu kiam de lei; zai deîgaime leine je tew’mmi gai bei de lei.