Read Zeme Naga MATHAI 15 Bible Online

MATHAI 15 - Zeme Naga bible

MATHAI 15

¹Chipau chângge Pharisaime benai leisirawme Jerusalem ’mbene Isua dage wang lu ze

²“Ndaitew ze ning kenieme gechîng-telungsie ze ka’ngka lau? Mâ-teurabe suage penui ba ’ntik mak zeu,” ze kacheu de lei.

³Pa ne penui je kak ze, “Ningnui ’ndaitew ze ningnui gu gechîng-telungsie hang ziegene Hera gu sam ze ka’ngka lau?

⁴Hera ne, ‘Ning peu benai ning pui ngeutew lau,’ zai mi-mige de ‘Pe peu je mei nu pe pui je mei saka’nsiabe kau â, peize chai sing de lau,’ ze die gai ’ndi daseu.

⁵Kane ningnui ne, ‘Mige ne pe peu je mei nune pe pui je mei ze Nang a dagene ngau ra bambe ze â Hera dagene pei gai ’nde lei, ze acheu rang gai dizai â, pa ne pe peu ngeutew ra ’nnang me lei,’ ze kacheu de lei.

⁶Chigum ze ningnui gu gechîng-telungsie hang ziegene ningnui ne Hera gu sam tew’ngga ’nde lei.

⁷Ningnui helunglimpungme gau! Isaiabe ne ningnui deu ge acheu ze rangka’ntuabe ze gesang de lei, pa ne sabe ge:

⁸‘Aipau baudime ze penui mui ne achu hengêutew lei, kane penui lung â a dagene deu-sang-deu lei;

⁹mêruang gene achu penui kellum ze, ziemmename maning tak zene keneibe geteiliabesie hang chak kai ze mâ-kagetei lei,’ kacheube zeu” ze kacheu de lei.

¹⁰Zai baudime je pa ne pe dage kûwang lu, penui je, “Seu lu ze chî le lau:

¹¹mi mui ge gutbe zene ziemmename je tewkahebâbe mak lei, kane mi mui gene patbe zene ziemmename je tewkahebâ lei,” ze kacheu de lei.

¹²Chipau chângge kenieme wang lu, pechu, “Pharisaime aipau samsabe seu lu dege, penui lunggailaktibe nang chî mei?” ze kacheu de lei.

¹³Pa ne kak ze, “A Peu tinggîm ge kebampeu ne mâ-kiak taugaimakbe leine ze lutua ’ndu lei.

¹⁴Peize penui runne bam de lau; penui â kanguame hemikchitbe kau ramme lei. Hemikchipeu hangkat ne hemikchitpeu hangkat je nguatat tizai â, hûm ge penai hangna keu gai gu lei,” ze kacheu de lei.

¹⁵Kane Peterbe ne pechu, “Sam’nda ze anui je ranglia’nchi gai lau,” ze kacheu de lei.

¹⁶Dadege Isua ne, “Chuna du ningnui chî mak luisui ze bam ge rei mei?

¹⁷Mi mui ge gutbe leine mi bungpui ge gutchang lei, zai chiramme hela ’mbe pat bambe ngau mak mei?

¹⁸Kane chi mi mui gene patbe ramme â mi lung gene patbe kau lei, zai chize ne ziemmename je deîkahebâ lei.

¹⁹Mi lung gene ’nningka’nsiabe ramme, kegîbe, kahemabe, hangleutewbe, hegasutteube, karasa sakkitewbe, zai sakahebâbe ramme pat daseu.

²⁰Airamme ne ziemmename ze deîkahebâ lei; kane mi ba ’ntik mak ze mâ-teube ne ziemmena ze deîkahebâbe mak lei,” acheu bei de lei.

²¹Dadege chigene Isua tat ti ze, Tira benai Sidonram ge wang gai de lei.

²²Zai pie le lau, chipauram gene Kanaan’mpui hangkat pat lu ’nrung ze, “Hei Tingwang Dabidbe Na gau, achu ngau’nggia gai lau; a na heleu’mpui je herasiabe ne tewhereu-desang la de lei,” ze kacheu de lei.

²³Kane pa ne sam kat te kak mak tai lei. Dadege pa kenieme wang lu, pechu, “Pa ne anui chai sui ze ’nrungkeleu bam daze tat te ra hang lang gai be lau,” ze pechu kiam lei.

²⁴Pa ne kak ze, “Achu â Israel ki gu meli gadibe dage runne lang gai lei,” ze kacheu de lei.

²⁵Kane ’mpuimi wang lu, pe suage kukdungkeu lu ze, “A Wang gau, achu ’ngngâ gai lau,” ze kacheu de lei.

²⁶Zai pa ne, “Mi name gu tingku lu lu ze hetei ramme dage tuâ gai ne ra â yi mak lei,” ze kak lei.

²⁷Dadege pa ne, “Eu lei, a pau gau, acheusedu hetei ramme ’nsang du pa’mpaupeu mâ-tewbe-kaira gene tewterakeube ze kuaiteu lei,” ze kacheu de lei.

²⁸Chidadege Isua ne pechu kak ze, “Hei ’mpuimi gau, nang keneibe di-desang lei! Nang luneibe luigum ze peize chang lau,” ze kacheu de lei. Zai chipau hî tit ge pe na heleu’mpui je tew’mmi gai bei de lei.

²⁹Dadege Isua chigene tat’nduâtat ze Galili sungkling luî tatpat ti de lei. Dadege peloa kehube ramme ge hang lu chige pa ’ntau bam lei.

³⁰Zai baudime ne Isua dage bepîsiame, chuakanime, hemikchime, hekuâpatlakme zai kêdadabe misonggame je ngua lu wang ze penui je pe pî hiage kai bei dege pa ne penui je tew’mmi gai bei de lei,

³¹dadege pekuâpatlakme dampat ti, zai chuakanime yi di, bepîsiame tatchi di, zai mikchitme ngauchidibe baudime ngau lu dege, ’nningdaulak ti de lei; zai Israelme Rapeu je penui suang de lei.

³²Zai Isua ne pe gu kenieme je kûwang lu, “Baudime a dage bamme chuna â hezie kechum chang di teu ra hang mâ de gabe ziegene penui je I ngau’nggia-desang de lei; penui ’njei-herei ze tat ra lang gai ra I nei me lei, makchaine â ’mpuî ge penui kemei-mei gu daseu,” kacheu de lei.

³³Dadege pe gu kenieme ne pechu, “Baudime aikieme je kei’nggeu ra hang tingku misongga ze hênamkang ge ’ndai’nggene anui lu ra lau?” kacheu lei.

³⁴Dadege Isua ne penui je, “Ningnui dage tingku ’ndaikie la lau?” kacheu de lei. Penui ne, “Sena, zai hekâpoine ramme kecheîne lamui lei,” ze acheu bei de lei.

³⁵Dadege baudime je kedei ge ’ntau ra die gai lu dege,

³⁶pa ne tingku sena benai hekâ tei lu ’nnam ze tiapâng gai lu kenieme je pei de lei, dadege kenieme ne chiramme baudime je pei gai de lei.

³⁷Zai penui ’nteumena teu lu ’nggeu kam lu de lei; zai penui teuka’nsakbe pesuine ’ntui sena ruipui lu lei.

³⁸Zai geteume hepui-hena je chak kai mak ze ’mpeumi chang medai lei.

³⁹Zai baudime je tat ra lang gai nan ze, ’nnei ge pa â chu lu, Magadan bak ’mbe tat ti de lei.