Read Zeme Naga MATHAI 16 Bible Online

MATHAI 16 - Zeme Naga bible

MATHAI 16

¹Zai Pharisaime benai Saddusime pe dage wang de lei, zai pechu kedak ra tinggîm ’mbene dakka’nchetbe penui je peize teilia ra pechu kie de lei.

²Pa ne penui je kak ze, “Hegî dege ningnui ne, ‘Ting yi gu de lei; tinggîm gie la daseu,’ ze kacheu de lei.

³Zai hechua dege, ‘Nemai â tingsia gu de lei, tinggîm gie, zai ting du mâugit la daseu,’ ze ningnui acheu ka’nzie lei. Tinggîm ju bambe tak ningnui sakelichi lu da, kane beting ka’nchetbe ze ningnui ’nchetchi mak lei.

⁴Helungriaksiabe benai kahemabe reheime ne dakka’nchetbe ze peu da, kane dakka’nchetbe pei ra mak lei, Jonabe ne dak changbe runne zangno,” ze acheu bei de lei. Zai penui je pa sâu nan ze tatrimna di de lei.

⁵Zai pe gu kenieme katlam giam kapat dege, tingku penui tei’ngngaî ’ndi de lei.

⁶Isua ne penui je, “Pharisaime benai Saddusime gu ’nduihî gene ningnui ’ntîng le lau,” kacheu de lei.

⁷Dadege penui karai acheu tu ze, “Tingku anui teimakbe ziegene lei,” ze kacheu de lei.

⁸Kane chize Isua chî lu ze, “Hei keneibe chamme gau, ’ndaitew ze tingku gabe ziegene ningnui ruage tu lau?

⁹Ningnui ’nningchi mak kerei mei? Chang-mengeume gu tingku mengeu benai ’ntui ’ndaikie rui lu mei be ningnui ’nningdau mak kerei mei?

¹⁰Makchaine chang medaime gu tingku sena benai ’ntui ’ndaikie ningnui rui lu mei be ningnui ningdau mak kerei mei?

¹¹Tingku rasam ningnui dage I sa mak lei be ze ’ndaitew ningnui chî mak lau? Pharisaime benai Saddusime gu ’nduihî gene ningnui ’ntîng le lau,” kacheu de lei.

¹²Chidadege ’nduihîkaibe tingku je ’ntîng ra rangbe mak lei, kane Pharisaime benai Saddusime geteiliabe je penui ’ntîng ra penui je pa rang lei be penui ’nningchi di de lei.

¹³Zai Kaisaria Philippi bak lungge Isua zuagut dege, pe kenieme je, “Miramme ne ziemmena Na je châu lei ze kacheu lau?” ze ka’nneu lei.

¹⁴Dadege penui ne, “Hanggesame ne sa ze, Baptistewpeu Johanbe lei acheu, hanggesame ne Elijabe lei acheu, zai hanggesame ne Jeremiabe mei nune kemeume ruage hangkat mei leu gu lei, kacheu lei,” ze kacheu de lei.

¹⁵Pa ne penui je, “Acheuzai ningnui ne achu châu lei ze sa gai lau?” acheu bei de lei.

¹⁶Simon Peterbe ne, “Nang â Krista, Hera keringpeu Na lei,” ze kak kai bei de lei.

¹⁷Dadege Isua ne pechu kak ze, “Simon Bar-jona, ning hang keyibe de lei! Aize ningchu hemei benai hejai ne liabe mak, kane a Peu tinggîm ge bampeu ne ningchu liâ daseu.

¹⁸Zai ningchu I rang lei, nang â Peterbe de lei, zai aipau chukâng peireige a gu herakiangna beichu gu lei, zai kechaibe gu rezie ne chize duî ra mak lei.

¹⁹Tinggîm heguangram chabi ramme ze ningchu I pei gu lei, zai kedeirei ge nang ne pibe leine ze tinggîm ge pi gu lei, zai kedeirei ge nang ne heipatbe leine tinggîm ge heipat ku lei,” kacheu de lei.

²⁰Chidadege pa â Krista lei be mî dage du rang mak ra hang pe kenieme je samde sing gai bei de lei.

²¹Chipau ting gene seu ze, Isua ne pe gu kenieme dage Jerusalem ’mbe pa tathimchangrabe, zai chige gechîngme, tingkugechîngme, zai leisirawme dagene misongga ze Pa hereulierabe benai pechu tewchatrabe zai pakechumbe mai ge teichugaidairabe rasam saliachu di de lei.

²²Dadege Peterbe ne pechu nguachâm lu, “A Wang gau, aize Hera ne peize nam ne lau! Ning peireige mâtew-tewsedu peize wangchang se lau,” ze ka’ngngiam lei.

²³Kane pa ’nreiwang lu, Peterbe je, “Satan, a chai ’mbe nang tat te lau! Nang â a ’mpuî tewnambe kau lei; Hera lam hang nang â ’nning mak ze, ziemmena lam hang ka’nning daseu,” kacheu de lei.

²⁴Dadege Isua ne pe gu kenieme je salia ze, “Mi-mige de a chai suineibe kau â, pe runne pechu ’nzâ mak ze pe gu heling pua ze peize a chai sui lau.

²⁵Mi-mige de pa keringbe tew’nring ra neibe kau â, pa keringbe tew’ngga gu lei, kane mi-mige de a ziegene pa keringbe tewka’nggabe kau â pa keringbe ngau gu lei.

²⁶Ziemmena ne kedeirei pelane pe gu chang kam sede pa keringbe ’ngga dizaine â pe hangge ’ndaikau kegiebe chang ra lau? Nune ziemmena pa keringbe hangge ’ndaikau ne hiak le ra lau?

²⁷Ziemmena Na â pe gu angelme ne ngua lu pe Peu ngeudibe gene wangkeu gu daseu, chidezai ziemmena tâtewgai’ndibe luigum ze pa ne peiruî dai gu lei.

²⁸Pelingsing ze ningnui je I rang lei, aige sapme hangesame â kechaibe penui ’ndâu ra mak lei, ziemmena Na pe gu heguangram ge pa wangkeube penui ngau mak tâneu,” kacheu de lei.