Read Zeme Naga MATHAI 17 Bible Online

MATHAI 17 - Zeme Naga bible

MATHAI 17

¹Zai hezie serukne chângge Isua ne Peterbe, Jakobbe, zai bekinapeu Johanbe je nguachâm lu ze peloa kehu ’mbe penui runne hang di lei.

²Zai penui suagene peluî tewkeli gai bei de lei, zai pe ju â tingnaimik gum ze pa’mbi sireba bam di de lei, zai pe paîni â kebabe gum ze ’ngngûpchup bam di de lei.

³Zai pie le lau, chige Mosabe benai Elijabe ne pechu ’mpaubambe lia de lei.

⁴Dadege Peterbe ne Isua je, “A Wang gau, aige anui bambe yi-desang lei; Nang ne nei zai â aige hetiam kechum I ne liâm gai gu lei, ning hang kat, Mosabe hang kat, Elijabe hang kat zeu,” kacheu de lei.

⁵Pa acheu sa bambe luage, pie le lau, penui je kemâu karbabe ne sungnam ’ndi de lei, zai kemâu gene sam sapat ze, “Aize A Na I hunglangpeu lei, pechu a sui-yisang-yi lei; pe kuâ ’ngking lau,” kacheu lei.

⁶Kenieme chize seu lu dege penui ’ngkumkeu lu hing-desang ze bam di de lei.

⁷Kane Isua ne wang lu, penui je deî gai lu, “Chu lau, hing se lau,” kacheu de lei.

⁸Zai penui ’ngngangchu dege mî je de penui ngau mak, Isua je runne ngau lei.

⁹Zai peloa ’mbene penui wangkeu dege, Isua ne penui je, “Ziemmena Na je kechaibe gene teichugaibe riâ chang mak tâne ningnui keliâbe ngaube ze mî dage de ranglia se lau,” ze samdie gai bei de lei.

¹⁰Zai kenieme ne pechu, “Acheuzaine ’ndaitew ze leisirawme ne, Elijabe â wangkeurai himchang gu lei ze penui kacheu lau?” ze kacheu lei.

¹¹Isua ne penui je kak ze, “Elijabe â wangkeu raî sing gu lei, zai mâgetaleine teleuwang dai kam gu lei;

¹²kane ningnui je I rang lei, Elijabe â wangkeu di la de lei, zai penui ne pechu chî mak lei, kane pe peireige penui ne tewnei-neibe tew de lei. Chigum ze ziemmena Na du penui ba gene hereulie gu de lei,” ze kak lei.

¹³Chidadege Baptistewpeu Johanbe rasam penui dage pa ne sa de lei be kenieme chî di de lei.

¹⁴Zai baudime tailam penui wang dege, hangkat pe dage wang lu, pe suage kukdungkeu lu,

¹⁵“A Wang gau, a na je ngau’nggia gai lau, pa kebui’nrâpat ze hereu-desang ze hemi ge pa kau gai ’nsui zai hedui ge kau gai ’nsui ze bam di daseu.

¹⁶Zai ning kenieme dage pechu I nguawang da, kane pechu penui tew’mmichi lak lei,” kacheu de lei.

¹⁷Dadege Isua ne kak ze, “Hei ’nnum’mmimakbe benai kakeriângbe reheime nung gau, ’ndaitiege ningnui dage I bam ra lau? ’Ndaitiege ningnui je I lie be ra lau? Pechu a tailam nguawang lau,” ze acheu bei de lei.

¹⁸Dadege Isua ne herasiabe je ’ngngiam bei de lei, zai pe lung gene herasiabe ze pat ti de lei, zai chipau hîsing ge napoine je tew’mmi gai bei de lei.

¹⁹Dadege Isua dage kenieme reine ze wang lu, “’Ndaitew ze chize anui kelituachi lak lau?” ze ka’nneu lei.

²⁰Pa ne penui je, “Ningnui keneibe chambe ziegene de lei. Pelingsing ze ningnui je I rang lei, ningnui keneibe ’nzeyichêu pum lang ze bam zai â aipau deiloa je, ‘Aigene wî ’mbe tat te lau’ ze ningnui ne acheu bei dezai chize tat tu lei; ningnui hangge tewchilakbe mâ de bam ra mak lei,” acheu bei de lei.

²¹“Kane aigumbe zat â kakellumbe benai teseureibe gene makchai â, kelituachi ra mak lei,” kacheu de lei.

²²Zai Galili ge penui wangka’nduibe luage, Isua ne penui je, “Ziemmena Na je ziemmename ba ge pei gai gu de lei,

²³pechu penui ne tewchat kû, zai pakechumbe mai ge pechu teichu gai dai gu lei,” kacheu de lei. Dadege penui lung hereu-desang di de lei.

²⁴Kaperna-um ge penui wang dege, kellumki gu ’mpuâhame Peterbe dage hang lu, “Ningnui gu geteiliapeu kellumki-hâ pa pei mak ti lau?” kacheu de lei.

²⁵Pa ne, “Eu lei pa â pei lei,” kacheu de lei. Zai kilûng ge pa gut dege Isua ne pechu ’mpauraî ze, “Simonbai, nang ’ndaigum ze ’nning gai lau? Kedeirei heguangme châu dagene ’mpuâ lu lu lau? Penui name dagene mei, nune kêdabe kau ramme dagene lau?” ze ka’nneu lei.

²⁶Zai pa ne, “Kêdabe kau ramme dagene lei,” ze acheu bei dege, Isua ne pechu, “Chigum dizai â penui name â pei ra mak te lei.

²⁷Acheuleusedu, penui suî tew’nsia mak ra hangge sungkling ’mbe tat ze kakuai tuâ gai lau, dezai hekâ zupatraibe ze lu le lau, zai nang pemui rakpat dezai chige rangkângpum ngau gu lei; chize penui je a hang benai ning hangge pei gai be lau,” kacheu de lei.