Read Zeme Naga MATHAI 2 Bible Online

MATHAI 2 - Zeme Naga bible

MATHAI 2

¹Zai heguang Herodbe ne kaheguangbe ting ge, Judia ge Bethlehem ge Isua je lungkeu gai dege, pie le lau, tingbia ’mbene chika’ndingme Jerusalem ge wang lu ze,

²“Judame wangpeu hang lungkeugaibe ze, pa ’ndaige la lau? Tingbia ’mbene pe gu hegi anui ngau lu, pechu kellum ra anui wang lei,” ze penui kacheu de lei.

³Zai chize heguangpeu Herodbe chî lu dege, pe suîhereu di de lei, zai Jerusalem ge bamme ’nteumena pa benai penui suîhereu kam di de lei.

⁴Dadege tingkugechîngme benai leisirawme leine je kûwang’ndui lu ze, ’ndaige Krista je lungkeu gai ra mei be penui je ka ’mmêt te lei.

⁵Zai penui ne pe dage rang ze, Judia ge Bethlehem ge aigum ze kemeu’mpeu ne rawdiak kai lei:

⁶“Judia ge bambe nang Bethlehem gau, Judame gu samramme ruage mâtew-tewsedu nang cheilangbe chang ra mak lei, ning dagene samrampeu pat ku lei, pa ne a gu ziemmename Israelme je samram gu lei,” ze kacheu de lei.

⁷Chipau châng dege â Herodbe chîka’ndingme je reine ze kû lu, hegi ngaube hî ze ’mmêtkadesi de lei.

⁸Zai penui je Bethlehem ’mbe tat ra hang lang gai de lei, “Tat chu lau, ’ngngiêne rasam ze ’mmêt’mmizun le lau, zai pechu ningnui ngau lu dezai a dage sam teiwang dai lau, I du tat ze pechu kellum gu lei,” ze kacheu de lei.

⁹Zai penui heguang sam seu lu dege, penui tat ti de lei; zai pie le lau, tingnaimikpat ’mbia penui hegi ngaube ze ’ngngiêne bambe ’nchui wangchang ze sau gai mak tâne penui sua raîtat bam lei.

¹⁰Zai penui chi hegi je ngau lu dege, penui suiyi-desang bam lei.

¹¹Dadege kilûng ’mbe penui gut te lei, zai pe pui Marile benai ’ngngiêne je penui ngau de lei; zai penui keikeu lu, pechu kakellum de lei; zai penui heubung ramme latpat lu, penui kela gechâk, mâ-perîmyibe, zai Mur ramme penui pei de lei.

¹²Zai Herodbe tailam heliwang dai mak ra hangge penui mang gene Hera ne rangliabeibe ne ’mpuî kêda ’mbene penui wang di lei.

¹³Zai penui tattibe châng dege, pie le lau, Tingwang gu tinggîm angel’mpeu Josepbe dage pe mang gene liâ ze, “Chu lu ze ’ngngiêne benai pe pui je ngua lu ze, Ijipram ’mbe pak kai de lau, I ne rang gai dai mak tâne chige bam lau; Herodbe ne ’ngngiêne ze tewchat ra peu gu daseu,” kacheu de lei.

¹⁴Dadege pa chu lu ze, ’ngngiêne benai pe pui je ngua lu Ijipram ’mbe muî’nchang-chang tat ti de lei.

¹⁵Zai Herodbe chai mak tâne chige bam bam lei. Tingwang ne kemeu’mpeu mui gene rang ze, “A na je Ijipram gene I kûpat lei,” kacheube sam ze tewpui gai ra hangge zeu.

¹⁶Chidadege Herodbe chika’ndingme ne kakemak te lei be pa chî lu ze, pe lumpum-desang di ze, chika’ndingme dagene beting pa chîdesilube luigum ze, Bethlehem ge zai pehuâzie ge bamme ’mpeumi napoine kum na ’nkang kau leine je tewchat kam ’ndi de lei, pa ne lang gai bei zeu.

¹⁷Dadege kemeu’mpeu Jeremiabe ne sagai’ndibe tewpui gai de lei:

¹⁸“Rama ge desui ze puîhapbe, chi hekuâ ze seu de lei, Rakelle pe name je puîhap te lei; penui gadibe ziegene pechu peize tumsau gai ra pa ne lunmeu de lei” ze kacheube zeu.

¹⁹Kane Herodbe chai di dege, pie le lau, Tingwang gu tinggîm angel’mpeu Ijipram ge Josepbe je pe mang gene lia de lei, acheu sa ze,

²⁰“Chu le lau, ’ngngiêne je tewchat ra peume chai kam de lei, chidaze ’ngngiêne benai pe pui je ngua lu ze Israelram ’mbe tatchu lau,” ze kacheu de lei.

²¹Dadege pa chu lu ze, ’ngngiêne benai pe pui je ngua lu Israelram ’mbe tat ti de lei.

²²Leusede Arkelaube ne pe peu Herodbe kelei ge Judia ge heguang changbe rasam pa seu lu dege, chige pa tat-kaihing di de lei. Zai hemang gene Hera ne ranglia bei ze Galili ’mbe pa tat’mbia gai di lei.

²³Zai namdi kat Nazareth kacheube ge tat ze pa bam di de lei, kemeume ne aigum ze ranggai’ndibe ze tewpui gai ra hangge zeu, “Pechu â Nazareth’mpeu ze kû gu lei,” ze kacheube zeu.