Read Zeme Naga MATHAI 20 Bible Online

MATHAI 20 - Zeme Naga bible

MATHAI 20

¹“Tinggîm heguangram â heki’mpaupeu pe gu grepchî merie ge tâtew ra hang tâtewme ze puî ra hechuasûn ge tattipeu gum lei.

²Mai kat ge kangpi pei ra hangge tâtewrame benai hesuî-hezuâ lu ze, pe gu grepchî merie ’mbe penui je lang gai bei de lei.

³Zai ’nchet sekui gumbe hî ge pa tat dege hanggesame hechaiki ge ’ntakûne sapbambe pa ngau de lei;

⁴dadege penui je pa ne rang ze, ‘Ningnui du grepchî merie ’mbe tatchu lau, helî buibe riâ ningnui je I pei gu lei,’ kacheu de lei. Dadege penui tat ti de lei.

⁵Zai ’nchet kereu ze kena hî ge benai ’nchet kechum hî ge pa tatpat dai lu ze, chipau luigum ze tew kadai de lei.

⁶Zai hegî ’nchet mengeu gumbe hî ge pa tatpat kadai lei, zai chige hanggesame ’ntakûne sapbambe pa ngau de lei; dadege pa ne penui je, ‘’Ndaitew ze aige mâ-tatew mak ze saphimmui lau?’ kacheu de lei.

⁷Penui ne pechu, ‘Mî ne anui je tâtew ra puîmakbe ziegene de lei,’ ze acheu bei lei. Pa ne penui je, ‘Ningnui du grepchî merie ’mbe tatchu lau,’ acheu bei de lei.

⁸Zai hegî dege grepchî merie ’mpaupeu ne pe gu tiâkelame peireige besuitewpeu je, ‘Tâtewme je kû lu zuakeunâlangbe gene chu ze raîlangbe chang ze penui hî pei be lau,’ acheu bei de lei.

⁹Zai hegî ’nchet mengeu gumbe hî gene tâtew ra tatme wang dai dege penui ’nteumena rangkâng bepi-pi ngau kam lu lei.

¹⁰Zai zuakeuraîlangme bau wang dege, penui â ngau’ngkiebi ra ’nnum gai de lei.

¹¹Zai chize penui lu lu dege penui lungneu ze pa’mpaupeu je,

¹²‘Aime tatkahekapme ’nchetkak kat runne penui tâtew gai lei, zai anui tîngna kahereume benai tingchiê lieme je nang â ’nsam ze tew gai bei zeu,’ ze kacheu de lei.

¹³Dadege pa ne penui ruage hangkat je, ‘A kangpeu gau, ning peireige mâ de I tâtewmau gai me lei; nang kangpi hi ra hang a dage hesuî-hezuâ lu demak ti lau?

¹⁴Ning gu lu lu tatchu lau; ningchu I pei gum ze ai tatkahekapme je du I pei ra nei lei.

¹⁵A gu changbe peireige I ne a suitew ra rezie bam mak ra semei? I a lung yibe je nang ning lunggailak mei?’ acheu bei de lei.

¹⁶Chigum ze nâlangme ne raîlangbe chang gu zai railangme ne nâlangbe chang gu lei,” ze pa ne acheu bei de lei.

¹⁷Zai Isua Jerusalem ’mbe hang dege, pe kenieme hangkereu ze kena je ’mpuîki ge nguatî lu penui je,

¹⁸“Pie le lau, anui Jerusalem wangchang gu de lei; zai ziemmena Na je tingkugechîngme benai Leisirawme ba ge peipat kai gu lei, zai penui ne pechu chai ra chau’ngkui gai gu lei,

¹⁹zai pechu teihenuitew ra, zai kegit ra, zai gia gai ra hangge Jentailme ba ge pei gai gu lei. Zai pakechumbe mai ge pechu teichu gai gu lei,” kacheu de lei.

²⁰Zai Zebedaibe name bau pui, pe na hangna je ngua lu, pe dage wang ze kukdungkeu ze pe dage mâ kie lei.

²¹Dadege pa ne chipaupui je, “Nang ’ndaikau lunei lau?” kacheu de lei. Zai chipaupui ne pechu, “Ai a na kena je ning ram ge nang hezat’mbia hangkat, zai heku’mbia hangkat ’ntau ra hangge die gai lau,” kacheu de lei.

²²Kane Isua ne kak ze, “Ningnui ’ndaikau kie mei be ningnui chî mak lei. I sakrabe piak ze ningnui sak dui se mei?” acheu bei de lei. Penui ne pechu, “Eu lei, anui sak dui lei,” ze kacheu de lei.

²³Pa ne penui je, “A piak ze ningnui sak ku lei, kane a hezat’mbia benai heku’mbia ’ntaurabe ze â I ne peirabe mak lei, kane a peu ne kedâgai’ndime hang lei,” acheu bei de lei.

²⁴Zai hangkereume aize seu lu dege, chi besikina hangna peireige penui châkkerâk ti de lei.

²⁵Kane Isua ne pe dage penui je kûwang lu, “Jentailme gu heguangme â penui deiname peireige pa’mpau chang ze bam lei, zai besuitewme â penui sui-sui gene chime peireige rezietei ze bam lei be ningnui chî lei.

²⁶Peize ningnui ruage chigum se lau; kane ningnui ruage mi-mige de kedipeu changrabe kau â, ningnui guâ ka’ngguapeu peize chang sing ra lei,

²⁷zai mi-mige de ningnui ruage raîneibe kau â, ningnui gu kebang chang sing ra lei;

²⁸ziemmena Na du miramme ne pe guâ ’nggua gai ra wangkeu mak lei, kane miramme guâ ’nggua ra hangge pa wangkeu lei, zai ziemmena misonggame hangge pe gu keringbe du pumlei gum ze pei gai bei daseu,” ze kacheu de lei.

²⁹Zai Jeriko gene hela ’mbe penui pat dege, baudi pe chai suitat ti de lei.

³⁰Zai pie le lau, mikchitme hangna ’mpuî’ntai ge ’ntau bam ze, Isua pat la lei be seu lu dege, “Heguang Dabidbe Na, anai je ngau’nggia gai lau!” ze penai ka’nrung de lei.

³¹Baudime ne penai kuâneu mak ra hangge ’ngngiam bei lei; kane penai ne “Heguang Dabidbe Na, anai je ngau’nggia gai lau,” ze ’nrung ranbi-bi bam de lei.

³²Dadege Isua sapmang gai lu, penai je kû lu, “Ningnai hangge ’ndaikau I tew gai be ra ningnai lunei lau?” ze kacheu de lei.

³³Penai ne pechu, “Heguang gau, anai mik ngau ra lat kai lau,” kacheu de lei.

³⁴Dadege Isua ne penai je ngau’nggia-desang di ze, penai mik deî gai de lei, zai luakatne penai mik ngau lu ze pe chai suitat ti de lei.