Read Zeme Naga MATHAI 22 Bible Online

MATHAI 22 - Zeme Naga bible

MATHAI 22

¹Dadege Isua ne penui je sam’nda ne salia dai ze,

²“Tinggîm heguangram â heguang hangkat pe na hangge luube-bâm teleu gai lu ze,

³kahegiabe luube-bâm ge wang ra ’nnâgai’ndime je kû ra pe gu tâka’ngguame je langgaipeu je tei’nda gai le dui lei; kane penui wang nei mak taibe zeu.

⁴Zai pie le lau, ‘Hegî ge a gu luube-teseu teurabe hang I kedâ kam lu de lei, a gu getumsei ramme benai a gu kaurui peleuyibe ramme tewchat lu ze kedâ gai la de lei; ’nnâgai’ndime je kahegiabe luube-bâm ge wang zu lau, ze kû-tatchu lau,’ ze pa ne pe gu tâka’ngguabe kêdame je lang gai kadai de lei.

⁵Kane penui chize mâ-hangge de ’nning gai mak ze tat kam di lei, hangkat â pe lu ’mbe tat ti, zai hangkat â helîkahedetbe bâm ’mbe tat ti de lei,

⁶chipau luage kêdame bamkuame ne pe gu ka’ngguame je nîm lu tew’ngngam gai bei, zai tewchat ’ndi lei.

⁷Dadege heguangpeu pe râta di de lei, zai pe gu sipai ramme je lang gai bei ze, kegîme je deî’ngga ’ndi lei, zai penui gu namdi du hemi ne rûkam ’ndi de lei.

⁸Dadege pe guâ ka’ngguame je, ‘Hegiarabe hangge kedâ gai ’nde lei, kane ’nnâgaibeime â bui mak lei.

⁹Chidaze ’mpuî ’mmaî-maî ge tat ze, ningnui ngaudaume leine je kahegiabe luube-bâm ge wang ra kû gai zu lau,’ ze kacheu de lei.

¹⁰Zai chi ka’ngguame bau ze puidi ’mbe tat ze penui ne ngaudaume ziemmena keyi-kesiame leine je nguawang kam gai bei de lei; chidadege hegiaki ze hesangme ne bampui di de lei.

¹¹“Hesangme je pie gai ra hangge heguangpeu gut dege, hegiapuâ kaimakbe kau bambe hangkatpeu je pa ngau de lei;

¹²dadege pa ne pechu, ‘A kangpeu gau, ’ndaigum ze hegiapuâ kai mak ze aige nang gut lu lau?’ kacheu de lei. Dadege pe kuaneu mak bam di de lei.

¹³Chidadege heguang ne ka’ngguame ramme je, ‘Pe pî pe ba pi lu, hela kemuîbe ge pechu tuâpat kai be lau; chige ziemmename hap ze hegeu kegit ze bam gu lei,’ kacheu de lei.

¹⁴Misonggame je kû gai da, kane kelânggaime â gechâmne runne lei,” ze kacheu de lei.

¹⁵Chipau châng dege â Pharisaime ne tat lu ze ’ndaigumbe tak tew ze pa samsabe gene pechu penui nîm le ra mei ze penui kahedei de lei.

¹⁶Dadege penui chaisuime benai Herodbe kumme je pe dage penui ne lang gai ze penui ne, “Geteiliabepeu gau, nang â peling tewbe kau, zai samsang ne Hera gu ’mpuî geteilia lei, zai mî je de nang â hing mak, zai ziemmena kedi-kecheitewbe tak ze du nang â riam mak lei be anui chî lei.

¹⁷Chidaze anui je ranglia lau, nang ka’nningbe tak zeu. Kaisarbe je ’mpuâ peirabe ze besie mei besie mak lau?” ze kacheu de lei.

¹⁸Kane penui ningching kesiabe Isua ne chî lu penui je, “Ningnui helunglimpungme gau, ’ndaitew ze ningnui achu kakedak lau?

¹⁹’Mpuâ peibe rangkâng ze achu teilia lau,” kacheu de lei. Dadege pe dage rangkângpum kat teiwang gai bei de lei.

²⁰Dadege pa ne penui je, “Aize châu luî zai châu gu samrit lau?” ze kacheu de lei.

²¹Penui ne, “Kaisarbe gu lei,” kacheu de lei. Dadege pa ne penui je, Chi lei zaine â, “Kaisarbe gu ze Kaisarbe je pei be, zai Hera gu ze Hera dage pei be lau,” acheu bei de lei.

²²Aipau sam penui seu lu dege, penui ’nningdaulak ti de lei; zai pechu sâu nan ze penui tat ti de lei.

²³Chipau mai sing ge Saddusime ringchukadaibe ga lei, kacheume bau, pe dage wang lu ze,

²⁴“Geteiliapeu gau, Mosabe ne rang ze, ‘Mi-mige de pe sipeu pe na ga ze chai dizai â, pe kinapeu ne pe sipeu nâu je ngualung dai ze, pe sipeu hik hangge peize lungkeu gai be lau,’ kacheu de lei.

²⁵Chunage anui ruage ’mpampatme ’mpeumi hangsena la lei; meraibe â pe nâu kû lu chai di lei; zai pe na gabe ziegene pe kinapeu hangge pe nâu je kaidiak kai de lei.

²⁶Chigum ze pakenapeu dage du, pakechumpeu dage du acheu ze pasenapeu riâ wangkeuchang di de lei.

²⁷Chipau châng dege â chi ’mpuimi ze chai di de lei.

²⁸Chidaze ringchukadaibe ge pa ze chi hangsename ruage châu nâu hang chang ra lau? Penui ’nteumena ne pechu ngualung kam gai daseu,” ze acheu ze samka’nneu lei.

²⁹Kane Isua ne penui je kak ze, “Hera gu leisi sam ramme benai Hera gu rezie ningnui chimakbe ziegene ningnui ’nningmau ’ndi de lei.

³⁰Ringchukadaibe ge â penui â hegia ta de lei, zai henâu du kai ta de lei, kane tinggîm ge angelme gum ze bam lei.

³¹Zai kechaime chukadaibe deu ge â, Hera ne ningnui dage rangliabe ze ningnui kiâ gai mak semei?

³²‘I â Abrahambe Rapeu, Isaakbe Rapeu, zai Jakobbe Rapeu lei,’ kacheube zeu? Pa â kechaime Rapeu mak lei, kane keringme Rapeu lei,” acheu bei de lei.

³³Zai aize baudime seu lu dege, pa geteiliabe ge penui ’nningdaulak ti de lei.

³⁴Kane Saddusime je pa ne samkak’ntau lu lei be Pharisaime chî lu dege, penui wangka’ndui de lei.

³⁵Zai penui ruage hangkat hingdechibepeu ne pechu kedak ze sam kat ka’nneu de lei.

³⁶“Geteiliapeu gau, hingde lungge ’ndaibe sam ze betâudilang lau?” ze acheu zeu.

³⁷Dadege pa ne pechu, “Tingwang ning Rapeu je ning lung leine ne, nang keringbe leine ne, nang ka’nningbe leine ne hung ra lei be ze de lei.

³⁸Aize hingde betâu dilangbe benai raîlangbe de lei.

³⁹Zai pakenabe ze du aigum lei, Ning runne ningchu hung gum ze, ning kiningme je du nang hung ra lei be zeu.

⁴⁰Hingde leine benai kemeume aipau samde kena ge bam de lei,” acheu bei de lei.

⁴¹Zai Pharisaime wangka’nduibe luage, Isua ne penui je sam kat ’nneu ze,

⁴²Krista je ningnui, “’Ndaikau hangge ’nning gai lau? Pa ze châu Na lau?” kacheu de lei. Penui ne pechu, “Dabidbe Na lei,” ze kacheu de lei.

⁴³Dadege pa ne penui je, “Acheuleusedu Dabidbe ne Herui gene pechu a Wangpeu ze kû ze,

⁴⁴‘Tingwang ne a Wangpeu dage rang ze, Ning teureime je ning pî kangge kai kam mak tâne a hezat’mbia nang ’ntau bam lau,’ kacheube ze ’ndaigumbe kau rei lau? ze kacheu lei.

⁴⁵Chigum ze Dabidbe ne pechu a Wang Tingwang ze kû bam zai â ’ndaigum ze pa pe na chang ra lau?” ze acheu bei de lei.

⁴⁶Dadege mî de sam kat du pechu kakchi lak tai de lei, zai chipau mai gene seu ze mî de pechu sam ’nneukiaku ta di de lei.