Read Zeme Naga MATHAI 24 Bible Online

MATHAI 24 - Zeme Naga bible

MATHAI 24

¹Kellumki tewgaibe ramme Isua je kechiaulia gai ra pe gu kenieme wang dege, Isua â kellumki put kai nan ze tat ti de lei.

²Kane pa ne penui je kak ze, “Airamme leine ningnui ngau kam lei, ningnui ngau mak mei? Pelingsing I ningnui je rang lei, aize tingchukâng kâng katte pebâm ge bam ra mak lei; chiramme pelane tuâkeu kam gu lei,” kacheu de lei.

³Zai pa Olib loa ge ’ntau lage, kenieme pe dage wang lu, reine ze, “Airamme ’ndaitewbe ting ne chang ra lau, zai nang wangkeube mai benai kedeirei beting ga ra dezai ’ndaikau dak ka’nchetbe tewlia ra lau?” ze penui ka’nneu lei.

⁴Dadege Isua ne penui je kak ze, “Mi-mige ne ningnui je ngualietatrabe je ’ntîng le lau.

⁵Misonggame ne ‘I Krista lei,’ ze a ji gene pat kû daseu, zai misonggame je penui ne ngualietat ku lei.

⁶Zai kahereibe rasam ramme benai herei rasam ramme ningnui seu gu lei; ningnui lung keheu mak ra hangge ’ntîng le lau; airamme â wangchang himchang gu lei, kane betun â mak kerei lei.

⁷Zai hezat ne hezat ’nggi gu, zai heguangram ne heguangram ’nggi gu, zai pebâm gechâm-châmbe ge herakûm ramme, zai kedei-kaketeibe peranchibe ramme wang gu lei:

⁸airamme leine ze â hereulierabe pîbang putchube runne rei de lei.

⁹“Chidezai ningnui je tewsâ ra hangge penui ne peipat kai gu, zai ningnui je tewchat ku lei; zai a ji gene pezat leine ne ningnui je ngaugailak ku lei.

¹⁰Chidezai â misonggame ne kâukeu du, zai kat-kat je heteurei kau ba ge pei gai gu, zai kat-kat je ngaugailak ku lei.

¹¹Zai kemeu karasame misongga pat ze ziemmena misonggame je penui ne ngualietat tu lei.

¹²Zai helungriaksiabe pung-ze-sadibe ziegene misonggame ne kehungbe hegeikeu du lei.

¹³Kane betun chang ze lielube kau je â tew’nring gai bu lei.

¹⁴Zai aipau heguangram gu gospel ze kedeirei pauruatui gai gu, zai pezat leine hangge sakki chang gu lei; dezai betun wangchang gu lei.

¹⁵“Chidaze chi kemeu’mpeu Danielbe ne sabe, Mi duânggabe mi ngaukateruibe ze pebâm ka’nchibe ge sapbe ningnui ngau dezai, (peize gekiâme ne ’nningchi le lau),

¹⁶Judia ge bamme je peize peloa kehu ’mbe pak kai de lau;

¹⁷zai heki’mpûm ge bambe kau ne pe kilûng ge merua ramme lu ra peize wangkeu se lau;

¹⁸zai helu ge bambe kau je pe paînî lu ra peize wang dai se lau.

¹⁹Zai chipau ting ge penui pumritme zai hena puatungme â penui duângga-desang gu de lei!

²⁰Hetating (kahegeibe ting) ge mei, nune ’ntakbambe mai ge mei ge ningnui pakbe chang mak ra kellum lau.

²¹Zai chipau ting ge â hereu-desang gu de lei, chigumbe herêu â kedei ’ndamchube gene seu ze chuna ting chang ze wang gai mak kerei lei, zai mâtew-tewsedu chigumbe zat wang de wang dai ra mak daseu.

²²Zai chipau ting ze tew’ndui ’nde makchaine â ziemmena mige de ringpat le ra mak lei; kane kelânglume hang ziegene chipau ting ze tew’ndui gai bu lei.

²³Chidaze mige ne ningnui je, ‘Ni, Krista aige la de lei,’ ze mei nune ‘Wîge ni’ ze acheu leusedu chize ’nnum’mmi se lau.

²⁴Chang dui zai â kelânglume je du ngualietat ’nde ra hangge Krista karasa kau ramme benai kemeu karasa kau ramme pat ze dakka’nchetbe kedibe ramme benai ningdaulakbe ramme teilia gu lei.

²⁵Ni, ningnui je I rang’ntua bei de lei.

²⁶Chigum ze penui ne ningnui je, ‘Ni, hênamkang ge pa la lei,’ ze acheu dizai â, hela pat se lau; zai, ‘Pie le lau, hekilung nuksing ge pa la lei,’ ze penui ne acheu dizai â, chize ’nnum’mmi se lau.

²⁷Tingkakepitbe tingbia ’mbene kepitpat ze tingrun bachang gum ze, ziemmena Na wangkeube du chigum gu lei.

²⁸Herum bambe bâm ge lawai ramme wang’ndui gu lei.

²⁹“Chipau ting gu kahereube kamgapkailube châng dezai tingnaimik muî du, zai hekêu ne pa’mbi pei ra mak, zai tinggîm ’mbene hegi ramme ’ngngaîkeu gu, zai tingkehube gu reziechibe ramme ze gechuî’ngngai gai gu lei;

³⁰chidezai ziemmena Na gu dakka’nchetbe ze tinggîm ge liâ gu, chidezai kedeirei ge pezat leine ne hapdesui gu lei, zai ziemmena Na ze reziechibe benai pengêudibe gene tinggîm kemâu ramme gene wangkeube penui ngau gu lei;

³¹dezai hegeîluîkie kûbe kuâ gechibe gene pa ne pe gu angelme je kedeirei mik medai ge langpat ku lei, zai penui ne pe gu kelânglunme je kedeirei mik na lam gene nguawang’ndui gai gu lei.

³²“’Mbeuchîbang gene aipau gu sam’nda ze chî le lau: bekeî ge pesûne tumpat ze peneu ramme pat dezai hepuakting na de lei be ningnui chî le lau.

³³Chigum ze ningnui airamme leine ngau dezai pa â na da lei be zai kemui hiage la de lei be chî le lau.

³⁴Pelingsing ze ningnui je I rang lei, airamme leine wangchang kam mak tâne hênai rehei ga ra mak lei.

³⁵Ting benai kedei â ga gu, kane a sam ramme â ga ra mak lei.

³⁶“Kane chipau tingnaimikpui benai chipau hî ze â mî de chî me lei, tinggîm angelme ’nsangnedu zai Pe Na ’nsangnedu chî me lei, kane Bepeu runne chi lei.

³⁷Noabe ting ge gum ze, ziemmena Na wangkeu beting ge du chigum gu lei.

³⁸Hedui naîwang makge Noabe ’nneiki ge gutbe naimikpui chang ze penui teu ze sak, zai henâukû, zai henâu kai ze bam lei,

³⁹hedui naîwang ze penui ’nteumena je teitat te mak tâne penui chî mak ze bam lei; ziemmena Na wangkeube ge du chigum gu lei.

⁴⁰Dezaine helu ge hangna bam gu lei; hangkat je nguatat tu, zai hangkat je sâudiak kai gu lei.

⁴¹’Mpuimi hangna chêuniakbe bâm ge chêuniak ze bam gu, zai hangkat je nguatat tu, zai hangkat je sâudiak kai gu lei.

⁴²Chidaze ’ntîngkua ze bam lau, ’ndaitewbe mai ningnui Wangpeu wang gu mei be ningnui chî mak daseu.

⁴³Aize chî le lau, tingmuî ge ’ndaitewbe hî ge mâ-kahegapeu wang ra mei be pa’mpaupeu chî lu laîzai â pa reî ’ndu lei; zai pe ki riputgut ra pa lun ra mak lei.

⁴⁴Chidaze ningnui du kedâkua sing ra lei, ningnui ’nnummakbe hî ge ziemmena Na â wangkeu gu daseu.

⁴⁵“Chidaze châu zene, heki’mpaupeu ne kilûngkang ge penui je mâ-teu ra pehî-hî ge pei ra sumgaibeibe chi lungsangtewbe benai kaningchingbe ne tâka’ngguapeu lau?

⁴⁶Pe Wangpeu wangbe luage aigum tâ’nggua ze bambe pa ne ngaube ka’ngguapeu ze yi de lei.

⁴⁷Pelingsing ze ningnui je I rang lei, pe gu kebambe leine peireige besuitewpeu hangge pechu pa sum gai lei.

⁴⁸Kane tâka’ngguapeu helungriaksiabe kau ne pe runne pechu ’mpau ze, ‘A Wangpeu wang ra mak kerei lei,’ ze ’nning lu ze,

⁴⁹tâka’ngguame pa nguatâtewme je lakgetie, zai kameneume je pa nguateu-nguasak ze bam dizai â,

⁵⁰pa ’nnummakbe mai, zai pa chimakbe hî ge chi tâka’ngguapeu Wangpeu ze wang gu lei,

⁵¹zai pechu tewsâ gu zai pa tâtewbe hî luigum ze pechu du helunglimpungme ruage kai gu lei; zai chige ziemmename hap ze hegeukegit ze bam gu lei.