Read Zeme Naga MATHAI 25 Bible Online

MATHAI 25 - Zeme Naga bible

MATHAI 25

¹“Zai tinggîm heguangram ze â ’mpuimi hangkereu penui gu hemibung tei lu henâukupeu je suidau ra tatme je teikedagairabe lei.

²Penui ruage hangmengeu â mie, zai hangmengeu â kaningching lei.

³Kemieme â penui gu hemibung lube luage hemidui lu mak lei;

⁴kane kaningchingme â penui gu hemibung ramme tei lu dege penui gu hemiduibung ge hemidui kai lu lei.

⁵Henâukupeu wang rî bei dege, penui ’nteumena ’ngngui di, zai penui jeikeu di de lei.

⁶Zai muisum dege, ‘Pie le lau, henâukupeu! Suidau ra hang pat chu lau,’ ze kakelau lei.

⁷Chidadege chi heleume bau ze chu lu, penui gu hemibung kateleu de lei.

⁸Zai kemieme bau ne kaningchingme bau je, ‘Ningnui gu hemidui anui je du gêsa pei lau, anui gu hemibung ’mmit kai mie de lei,’ ze kacheu de lei.

⁹Kane kaningchingme bau ne kak ze, ‘Anui hang benai ningnui hangge â cham leu gu de lei; kezuame dage tat ze ningnui hangge lui le lau,’ ze acheu bei de lei.

¹⁰Zai lui ra hangge penui tat ti chaine henâukupeu wang de lei, zai kedâlume â pechu ngua lu hegiaki luube-bâm ge gut ti de lei; zai ’ngkam kainam ’ndi de lei.

¹¹Chipau chângge heleume kêdame bau du wang lu, ‘Heguang, Heguang anui je ’ngkam lat kai lau,’ ze kacheu de lei.

¹²Kane pa ne kak ze, ‘Pelingsing ze ningnui je I rang lei, ningnui je I chî me lei,’ ze acheu bei de lei.

¹³Chipauziegene ’ntîngkua ze bam lau, patingnaimikpui benai panehî ningnui chî mak daseu.

¹⁴“Chize â mige tebeîtewtat ra ge, pe guâ ka’ngguame je kû lu pe heurâ reî ra penui je peigaibe gum lei;

¹⁵hangkatpeu dage talent mengeu zai hangkatpeu dage kena, zai kêdapeu dage kat ze penui teichidui-duibe riâ pei gai lei, dadege pa â tat ti de lei.

¹⁶Zai talent mengeu ngaupeu ze luakatne tat ti ze chipau ramme zene helîhedet ze talent mengeu tewpungpatsuâ lu de lei.

¹⁷Chipau luigum ze talent kena lupeu ze du talent kena tewpungpatsuâ lu de lei.

¹⁸Kane talent kat lupeu â tat ze kedeikui su lu, pe wangpeu gu rangkâng ze bai gai ’ndi de lei.

¹⁹Bechâng beting tiesanghang dege tâka’ngguame wangpeu ze wang lu, penui je ngua lu rangkâng riam de lei.

²⁰Talent mengeu lupeu wang lu, talent mengeu teisuâ lu, ‘Heguang gau, nang ne talent mengeu achu nang peibeibe zene, pie le lau ni, talent mengeu tewpungpatkaisuâ la de lei,’ ze kacheu de lei.

²¹Pe wangpeu ne pechu, ‘Ka’ngguapeu yibe kau, zai lungsangtewbe kau gau, mâ-tewchi de lei; mâ-kecheîne peireige nang â lungsangtew de lei, misonggabe peireige ning suitew ra I ningchu sum gai gu lei; ning Wangpeu suigut ge gut te zu lau,’ acheu bei de lei.

²²Zai talent kena lupeu du wang lu, ‘Heguang gau, nang ne talent kena achu peibeibe zene, pie le lau ni, talent kena tewpungpatkaisuâ la de lei,’ kacheu de lei.

²³Pe Wangpeu ne pechu, ‘Ka’ngguapeu yibe kau, zai lungsangtewbe kau gau, mâ-tewchi de lei; mâ-kecheîne peireige nang â lungsangtew de lei; misonggabe peireige ning suitew ra I ne ningchu sum gai gu lei; ning Wangpeu suigut ge gut te zu lau,’ acheu bei de lei.

²⁴Zai talent kat lupeu du, wang lu, ‘Heguang gau, nang â ziemmena pelaîsiabe kau lei be I ne chi lei, linggaimakbe gene nang â gat, zai kelap’nchigaimakbe gene nang â luka’ndui lei;

²⁵chi ziegene I hing dege, I tat ze kedei ge ning gu talent ze bai gai ’ndi de lei. Aige ni, ning gu la de lei, lu le lau,’ kacheu de lei.

²⁶Kane pe Wangpeu ne pechu kak ze, ‘Nang ka’ngguapeu helungriaksiabe kau, zai kahengabe kau gau! Linggaimakbe gene I gat, zai kelap’nchigaimakbe gene I luka’ndui lei be nang chi semei?

²⁷Acheuzai â a gu rangkâng ze helîkahedetme dage nang pei gai ra yi sing lei, dezai I wangbe mai ge a gu lingtitbe benai peching I ngau le ra hangge zeu.

²⁸Chidaze chi talent pe dagene lu lu talent kereu teipeu dage pei gai be lau.

²⁹Mi-mige pe dage keneibe ka’nchâbe bambe kau je â peigaisuâ bu lei, dezai pe dage misongga bam ra hangge zeu; kane mi-mige kegabe kau je â pe dage bambe ze du lutat tu lei.

³⁰Zai ka’ngguapeu ’nta kau je â hela kemuîbe ge tuâpat kai be lau; chige ziemmena hap ze hegeukegit ze bam gu lei,’ ze acheu bei de lei.

³¹“Ziemmena Na angelme leine je ngua lu pe gu pengêudibe heguang-bamrak ge pa ’ntau gu lei.

³²Zai pe suage pezat leine wang’ndui gu lei, zai melireîpeu ne kemei ruagene meli ramme kagepa gum ze penui je kat-kat dagene pa ne gepachâm ’ndu lei,

³³zai meli ramme je â pahezat’mbia kai gu, kane kemei ramme je a heku’mbia kai gu lei.

³⁴Chidezai chi Heguang ne pahezat’mbia ge bamme je acheu ze rang gu lei, ‘Wang lau, Hei, ningnui a Peu ne ’nnamgai’ndime gau, kedei’ndamchube gene ningnui hang teleukua’ndibe heguangram nguaheu zu lau;

³⁵I ’njei ze bam lage, ningnui ne achu mâ-teu ra pei bei, I herei ze bam lage, ningnui ne achu sak ra pei bei, I hesang chang ze bam lage, ningnui ne achu rêu ra pei bei,

³⁶I pumlâng bam lage, ningnui ne achu paî bâ gai bei, I ’nrâ ze bam lage, ningnui ne achu ’ngkiâmie bei, zai I kebangki ge bam lage, ningnui ne a dage wang bei daseu,’ ze acheu zeu.

³⁷Chidezai katelingme ne pechu, ‘Heguang gau, ’ndaitewbe luage nang ’njei ze bambe anui ngau lu, ningchu kei bei, nune herei ze bambe ngau lu, sak ra ningchu pei bei lau?

³⁸’Ndaitewbe luage nang hesang chang ze bam ze ningchu anui ngau lu, rêu ra pei bei, nune nang pumlângbambe anui ngau lu, ningchu paî bâ gai bei lau?

³⁹’Ndaitewbe luage nang ’nrâ ze bambe mei nune kebangki ge bambe mei anui ngau lu, ningchu anui ’ngkiâmie bei lau?’ ze acheu kak ku lei.

⁴⁰Zai Heguang ne penui je, ‘Pelingsing ze ningnui je I rang lei, ai a puina cheilangme ruage hangkat peireige ningnui tewgaibe ze a peireige ningnui tew gai de lei,’ ze acheu kak ku lei.

⁴¹Dezai pa heku’mbia bamme je, ‘A dagene tat te zu lau, ningnui desetkai’ndime gau, diabolbe benai pe gu angelme hang kedâgai’ndibe betun mak hemi ge gut te zu lau;

⁴²I ’njei ze bam lage, achu mâ-teu ra ningnui pei mak, I herei ze bam lage, sak ra achu ningnui pei mak,

⁴³I hesang chang ze bam lage, achu rêu ra ningnui pei mak, I pumlâng bam lage, achu ningnui paî bâ gai mak, I ’nrâ zai kebangki ge bam lage, ningnui achu ’ngkiâmie mak daseu,’ ze pa ne acheu gu lei.

⁴⁴Chidezai penui ne du ‘Heguang gau, ’ndaitewbe luage, nang ’njei ze bam mei, nune herei ze bam mei, nune hesang chang ze bam mei, nune pumlâng ze bam mei, nune ’nrâ ze bam mei, nune kebangki ge bam ze mei ze anui ngau lu, ningchu anui ’nggua mak lau?’ ze acheu gu lei.

⁴⁵Dezai pa ne penui je, ‘Pelingsing ze ningnui je I rang lei, ai cheilangme ruage hangkat peireige ningnui tewgaimakbe ze, a peireige ningnui tew gai mak te lei,’ ze acheu gu lei.

⁴⁶Zai chime bau â betun mak ze kesâbe bâm ge tat tu lei, kane katelingme â betun mak ze keringbe ge penui gut ku lei,” kacheu de lei.