Read Zeme Naga MATHAI 27 Bible Online

MATHAI 27 - Zeme Naga bible

MATHAI 27

¹Zai hechuasûn ge tingkugechîngme benai baudime ruage gechîngme leine Isua je tewchat ra hangge sam kahedei de lei;

²zai pechu pi lu, penui ne nguatat ze laksaibe Pilatbe dage pei gai bei de lei.

³Judabe, pechu nîm ra gechuigaipeu Isua je chau’ngkuigaibe pa ngau lu dege pe lung heliwang dai di ze, rangkâng himreu ze tingkugechîngme benai gechîngme dage teiwang gai dai ze,

⁴“Pe mâugapeu jai zuatuabe gene I hemui gai ’ndi de lei,” kacheu lei. Penui ne, “Anui chize ’ndaikau hang lau? Nang ne chî ra de lei,” ze acheu bei de lei.

⁵Zai pa ne chi rangkâng ze kellumki ge tuâgut kai nan ze pa â tat ti de lei; zai tat ze ’ngkak chai di de lei.

⁶Kane tingkugechîngme ne rangkâng ze lu lu, “Aize â mâ-hâbung ge kai ra besie mak lei, hejai mî daseu,” ze kacheu de lei.

⁷Chigum ze penui sam hedei gai lu, hesangme raw hangge hangkat helîkahedetpeu gu kedei penui ne lui de lei.

⁸Chipauziegene chuna riâ chang ze chipau bâm ze, Hejai Kâm ze ku lei.

⁹Chidadege â kemeu’mpeu Jeremiabe ne rangbe ze tewpui gai de lei, “Dadege pemî hang Israel name hanggesame ne chakpatkailube rangkâng himreu penui ne lu lu,

¹⁰Tingwang ne achu ranggaibe luigum ze, helîkahedetpeu hangkat gu kedei mî hang penui ne pei gai ’ndi de lei,” kacheube sam zeu.

¹¹Zai laksaibe suage Isua sap kai de lei; zai laksaibe ne pechu, “Nang Judame Wangpeu de mei?” ze ka’nneu lei. Dadege Isua ne, “Nang rang gai la de zeî lau,” ze acheu bei de lei.

¹²Zai tingkugechîngme benai gechîngme ne pechu kesia’ndamgaibe luage, penui je mâ de pa kak mak lei.

¹³Dadege Pilatbe ne pechu, “Penui ’ndaizeuge ning peireige saka’nsiabe ramme nang â seu mak mei?” ze kacheu de lei.

¹⁴Kane pechu samkie kat de pa kak mak bei dege, laksaibe ’nningdaulak-desang di de lei.

¹⁵Kahengîbe ge kebangki ge bamme hangkat je â baudime ne kenei-neibe kau je laksaibe ne ’mpat kai bei bei lei.

¹⁶Zai chipau ting ge sariau ze bambe kebangki ge bambepeu pe ji, Barabbabe kacheupeu penui ba ge bam lei.

¹⁷Zai penui wang’ndui gai dege Pilatbe ne penui je, “Ningnui dage châu je I ne ’mpat kai be ra ningnui lunei lau? Barabbabe je mei nune Isua Krista kacheupeu je lau?” ze acheu bei de lei.

¹⁸Hemimeube ziegene pechu penui ne pei gai lei be pa chî lu dadegeu.

¹⁹Zai samrambe bâm ge pa ’ntaubambe luage pe nâu ne, “Chi katelingpeu pumgîm ge mâ de tew gai se lau, nemai ge pe ziegene a mang ge I hereulie-desang gai ’nde lei,” ze pe dage sam pei bei lei.

²⁰Kane tingkugechîngme benai gechîngme ne Barabbabe je kie lu, Isua je deî’ngga ne ra hangge baudime je kelutew ’ndi de lei.

²¹Laksaibe ne penui je sa dai ze, “Penai hangna ruage châu je ningnui dage I ’mpat kai be ra ningnui lunei lau?” ze kacheu de lei. Dadege penui ne “Barabbabe je lei,” kacheu de lei.

²²Pilatbe ne penui je, “Acheuzaine Isua, Krista kacheupeu je I ’ndaikau tak tew gai be ra lau?” kacheu de lei. Penui ’nteumena ne, “Peize pechu ze â gia gai be lau,” kacheu de lei.

²³Dadege pa ne, “’Ndaitew ze lau, ’ndaikau pa tewmau’ndibe la lau?” kacheu de lei. Kane penui ne, “Peize pechu â gia gai ’ndu lau,” ze acheu ’nrung-kagetie de lei.

²⁴Pilatbe, pa ze mâ-tewsua ra ga di, kane baudime â lumbi-bidibe ngau lu dege, hedui tei lu baudime suagene pe ba ’ntiklia ze, “Aipaupeu jai peireige I a mâu ga lei; chize ningnui runne ne chî le lau,” ze kacheu de lei.

²⁵Dadege ’nteumena ne “Pe jaipâu â anui peireige benai anui name peireige peize keu gai du lau!” ze kak lei.

²⁶Chipau châng dege pa ne Barabbabe je â penui dage ’mpat kai bei de lei, kane Isua je â lak kai lu heling ge gia gai ra hang penui ba ge peipat kai bei de lei.

²⁷Dadege laksaibe gu sipaime ne Isua je heguang merielung ge teigut ti de lei, zai sipaime gechu je pe suage penui ne kûwang-kandui de lei.

²⁸Dadege penui ne pe paîni ra lu, paîgiebe pechu bâ gai bei de lei,

²⁹zai penui ne kraun hang hetu ne teleu lu ze pe peî ge kai bei de lei, zai pe ba hezat’mbia ba ge hekupum kai bei de lei. Pe suage kukdungkeu lu, “Kellum, Judame Wangpeu!” acheu ze teihenuitew lei.

³⁰Zai penui ne pechu ’nchai’ntui gai lu, hekupum lu lu, pe peî ge lak te lei.

³¹Zai penui pechu teihenuitew gai lu dege, paî gesaktua nan ze, pe paîni ramme pechu bâ gai dai bei de lei, dadege â pechu gia gai ra nguatat ti de lei.

³²Zai penui zuapat dege, Kurini’mpeu pe ji Simonbe dage penui wang de lei; zai pechu ’nchi-chine heling pua ra hangge penui ne tew gai bei de lei.

³³Zai Golgotha, (Chize timpeîkuak kacheube bâm) penui chang dege,

³⁴wain hiabe ge mâ-gekabe kebut lu ze, pa sak ra penui ne pei de lei; kane pa ’ndâu gai lu dege sakmeu tai lei.

³⁵Zai heling ge pechu penui ne gia gai lu dege, hedachak ze, pe paî ramme penui ka’nzi de lei;

³⁶dadege chige penui ’ntau lu pechu reîkua bam de lei.

³⁷Zai kesia’ndamgaibe sam, “Aipaupeu ze Isua Judame Wangpeu lei,” ze raw lu ze, pe peireige da gai de lei.

³⁸Chidadege hegasut-teume hangna je pe dage gia’mpam gai bei de lei, hangkat je hezat’mbia, zai hangkat je heku’mbia zeu.

³⁹Zai chigene tatkame leine penui peî kezit ze,

⁴⁰“Nang kellumki tew’nsia lu ze hezie kechumne lung gene tewchudailupeu ning runne ningchu tew’nring le lau! Nang Hera Na zaine heling gene wangkeu de lau,” acheu ze ka’nrû lei.

⁴¹Chipau luigum ze tingkugechîngme ne leisirawme benai gechîngme je ngua lu pechu acheu ze teihenuitew ze,

⁴²“Pa ne miramme je â tew’nringpat kai lei; pa â pe runne pechu tew’nringpatchi lak zeu, pa â Israelme gu Heguang lei! Chunage heling gene peize wangkeu de lau, chidezai pechu anui ’nnum’mmi gu lei.

⁴³Hera je pa â ’nnumka’mmi daze, chunage peize Hera ne pechu meupat kai be lau, pa ne pechu nei zaine ai; pa ne rang ze, ‘I â Hera Na lei,’ ze kacheu daseu,” ze penui kacheu de lei.

⁴⁴Zai mâ-hegasut-teume pa benai pechu heling ge nguagia-’mpamgaibeime ne du chigum ze pechu karenget te lei.

⁴⁵Zai ’nchet kereu gene hegî ’nchet kechum chang ze kedeirei leine muî kam di de lei.

⁴⁶Zai hegî ’nchet kechum dege Isua pe rankai ’nrung ze, “Eli, Eli, lama sabak-thani?” ze kacheu de lei, chize â, “A Rapeu, A Rapeu, ’ndaitew ze nang achu sua gai ’ndi lau?” kacheube lei.

⁴⁷Zai chige sapkuame chize seu lu dege, “Aipaupeu ze Elijabe je kû mui de lei,” ze kacheu de lei.

⁴⁸Zai penui ruage hangkat ne pakkeluatat ze, sponge lu-lu, wain hiabe ge sûm gai lu, chize hekupum ge kai lu sak ra pei bei de lei.

⁴⁹Kane hanggesame ne “Kuâ rî lau, pechu tew’nringpat kai ra Elijabe wangkeu leu gu mei pie gai rî kei lei,” ze kacheu de lei.

⁵⁰Zai Isua pe rankai ’nrung gai kadai lei, dadege â pe gu herui peipat ’ndi de lei.

⁵¹Zai pie le lau, kellumki gu paî lîmnambe ze bepeî ’mbene rikeu ze bepî riâ pi na lam ripedaktat ti de lei; zai kedei ketei ze tingchu ramme pâng di de lei;

⁵²heraw ramme latpat ti, zai ka’nchime jeikeudime pum misongga ze kuakchu gai bei de lei,

⁵³zai pa chukadaibe châng dege heraw gene penui pat lu, namdi ka’nchibe ge penui gut ti de lei, zai misonggame dage lia de lei.

⁵⁴Zai sipai haîmuiteipeu benai pe dage bamme, Isua je reîkuame kedei-kaketeibe benai chige mâ-wangchangbe ramme penui ngau lu dege, hing-desang di ze, “Pelingsing ze aipaupeu â Hera Na de lei!” ze penui kacheu de lei.

⁵⁵Chige ’mpuimi ramme misongga ze kedeu ’mbene pie bam lei, Galili ’mbene Isua chai sui ze pe guâ ’nggua ze bamme bau zeu;

⁵⁶zai penui ruage Mari-Magdalinle zai Jakobbe benai Josepbe pui Marile, zai Zebedaibe name pui du bam lei.

⁵⁷Zai hegî di dege, Arimathea gene hangkat keheupeu, Josepbe, ze kubepeu pa du Isua gu kenie’mpeu changbe kau wang de lei.

⁵⁸Chipaupeu ne Pilatbe dage tat lu, Isua kechai pum ze kie de lei. Dadege Pilatbe ne chize pechu pei ra die gai bei de lei.

⁵⁹Josepbe ne kechaipum lu lu, betachiâmbe paî ka’nchibe (linen) ne ’nnum gai lu,

⁶⁰zai pe raw hang heraw karchibe tingchu ge bûnggailube ge ’njei gai bei de lei; zai heraw kemui ge tingchukâng kedibe ne kainam gai lu dege, pa â tat ti de lei.

⁶¹Zai chige Mari-Magdalinle benai Marile kêdapui ze heraw taige ’ntau bam lei.

⁶²Bechaibe mai, chize Tâtewkakedâbe mai ge tingkugechîngme benai Pharisaime Pilatbe suage wang’ndui gai lu ze

⁶³acheu sa ze, “Saîbe gau, miramme helîtak tewpeu ne pa ring ze bambe ting ge, ‘Hezie kechumne châng dezai I ringchu dai gu lei,’ ze sagai’ndibe tak ze anui ne chî bam lei.

⁶⁴Chidaze hezie kechumne riâ chang ze herawreî’mmi ze reî ra hang samdie gai lau; makchai â, pe gu kenieme ne tat ze hega lu ze baudime je, ‘Kechaibe gene pa â chu de lei,’ ze acheu gu lei, zai choa nâlangbe ze â keraîbe lua sua sia’nteu gu de lei,” ze kacheu de lei.

⁶⁵Pilatbe ne penui je, “Ningnui dage sipaime hekêtkaibe kau la de zeî lau; tat ze ningnui hekêt-kaichiduibe riâ kai du lau,” ze acheu bei de lei.

⁶⁶Chigum ze penui tat lu, heraw ge hekêt-kai’mmi le ra hangge tingchukâng ge ’nchet kai lu ze, hekêt-kai ’ndi de lei.