Read Zeme Naga MATHAI 28 Bible Online

MATHAI 28 - Zeme Naga bible

MATHAI 28

¹Chunage ’ntakkak kat gu hezie raîlangbe mai, ’ntakbambe bechaibe mai tingbarabelia ge Mari-Magdalinle benai kêdabe Marile ze heraw ’mbe tat ti de lei.

²Zai pie le lau, kedei-kageteibe peranchibe wang de lei, tinggîm ’mbene Tingwang gu angel’mpeu wangkeu ze, tingchukâng kelatpat dai lu chipau peireige ka’ntau de lei.

³Pe ju â tingkagepitbe gum lei, zai pe paîni â kebun gum ze ’ngngûpchup lei.

⁴Hekêtkaime ze pechu hingbe ziegene penui kedun ze, chaidime gum ze bam di de lei.

⁵Kane tinggîm angel’mpeu ne ’mpuimi kena je ’mpau ze, “Hing se lau; heling ge giagai’ndipeu Isua je ningnai peurua lei be I chî lei.

⁶Aige pa â ga de lei; pa ne rangbe luigum ze, pa â chu dai de lei, wang ze pa jeibe bâm pie le lau.

⁷Chidaze kelua ze tat ze, pe gu kenieme je, pa â kechaibe gene chu dai de lei, zai ningnui suage Galili ’mbe pa raîtat te lei; pechu chige ningnui ngau gu lei, ze acheu be lau. Ni, ningnui je I ranglia bei de lei,” ze acheu bei de lei.

⁸Chigum ze penai hing de hing, zai penai suî yi-desang di ze heraw gene kelua ze paktat ti de lei, pe gu kenieme je salia ra hangge zeu.

⁹Dadege pie le lau, penai je Isua hedau lu, “Kellum de lei!” kacheu de lei. Dadege penai ne hang lu pe pî tui lu pechu kakellum de lei.

¹⁰Dadege Isua ne penai je, “Hing se lau, Galili ’mbe tat ra hangge a puiname dage tat ze salia be lau, chige penui achu ngau gu lei,” ze acheu bei de lei.

¹¹Zai ’mpuîki ge penai tatbe luage, hekêtkaime hanggesame ne namdi ge tat lu, mâ-mâ wangchangbe ramme leine ze tingkugechîngme je salia bei de lei.

¹²Zai gechîngme benai penui wang’ndui lu, samhedeitew lu dege, sipaime je rangkâng misongga penui pei gai ze,

¹³“Ziemmena ramme je ranglia be lau, ‘Tingmuî ne pe gu kenieme wang ze anui jeidibe lua ne pechu hegatat ti de lei,’ ze acheu zeu.

¹⁴Zai laksaibe aize seuchang dizai â, anui ne pechu kiâm ’ndu lei, zai ningnui je tewhereu ra mak lei,” ze acheu bei de lei.

¹⁵Dadege penui ne rangkâng lu lu, penui ne rangbeibe luigum ze penui tew de lei; zai aipau rasam ze Judame ruage nemai riâ chang ze sa lamui lei.

¹⁶Dadege Galili ge Isua ne tat ra ranggaibeibe deiloa ’mbe kenieme hangkereu-ze-katme tat ti de lei.

¹⁷Zai pechu penui ngau lu dege, pechu kakellum de lei; kane hanggesame ne pechu ze ’nningkategei de lei.

¹⁸Zai Isua penui dage wang lu, penui je ’mpau ze, “Tinggîm ge benai kedeirei ge rezie bambe leine achu pei gai ’nde lei.

¹⁹Chidaze ningnui tat ze, heramzatme leine je kenieme hang tew gai ze, Bepeu, pe Na, zai Herui Ka’nchibe ji gene penui je baptistew ze,

²⁰ningnui je I samdiegaibe leine reî’mmi le ra hangge penui je geteilia lau; zai ni pie le lau, rehei kamgairabe riâ chang ze ningnui dage I bam bam gu lei,” kacheu de lei.