Read Zeme Naga MATHAI 4 Bible Online

MATHAI 4 - Zeme Naga bible

MATHAI 4

¹Chidadege â Satan ne peize duai ra hang Isua je Herui ne ngua lu hênamkang ’mbe tat ti de lei.

²Zai hezie hedai, mui hedai pa teseu ’ngkîmlube châng dege â pa ’njei di de lei.

³Dadege keduaipeu wang lu, pechu, “Nang Hera Na lei zaine â ai tingchukâng ramme ne tingku chang ra hangge samdie gai be lau,” ze kacheu de lei.

⁴Kane pa ne kak ze, “Chige raw gai ’nde lei, ‘Tingku runne ne ziemmena ring ra mak lei, Hera mui gene sam ramme peipatbe leine ne zangnêu,’ acheu zeu,” ze kacheu de lei.

⁵Chipau chângge satan ne pechu ka’nchibe namdi ’mbe nguagut lu, kellumki ’mpûm ge teichu gai lu,

⁶pechu, “Nang Hera Na lei zaine ning runne ’nsiamkeu le lau, ‘Ningchu hereiheka ra hang pe gu angelme je pa lang gai gu lei,’ zai ‘Penui ba ne ningchu tei’nggim ’ndu lei, makchai â ning pî tingchu ne getau gu daseu!’ acheu raw gai la dezai lau,” ze kacheu de lei.

⁷Isua ne pechu, “Acheu ze raw gai ’nde lei, ‘Tingwang ning Rapeu je duai ra mak lei,’ acheu zeu,” ze kacheu de lei.

⁸Zai satan ne pechu peloa kehu ’mbe nguachu dai lu kedeirei gu heguangram ramme benai chi pengêudibe leine teilia lei;

⁹zai pechu pa ne, “Airamme leine ningchu I pei gu lei, nang ne achu keikutkeu ze kellum gai bei zaine ai,” kacheu de lei.

¹⁰Chidadege Isua ne pechu, “Nang Satan aigene tat lau! ‘Tingwang ning Rapeu je nang kellum lau, zai pe guâ runne ’nggua lau,’ ze raw gai daseu,” ze acheu bei de lei.

¹¹Chipau châng dege â satan pechu sâu gai nan ze tat ti de lei, zai pie le lau, angelme ne wang lu, pechu ’nggua ze bam di de lei.

¹²Zai Johanbe je nîm’ndibe rasam pa seu lu dege Galili ’mbe pa tat ti de lei;

¹³zai Nazareth sâu ze, Zebulun benai Naphtali lung sungkling kung, Kaperna-um ge pa tat ze bam gai di de lei.

¹⁴Chize kemeu’mpeu Isaiabe ne aipau sam rangbe ze tewpui gai ra hangge zeu:

¹⁵“Sungkling ’mbe Jordan geukung ge Zebulun benai Naphtali gu heram, Jentailme gu Galili ge,

¹⁶kemuîbe ge ka’ntaume ze kebabe kedibe ngau lu de lei, zai chipau bâm ge benai kechaibe kezui ge bamme hangge kebabe bapat la de lei,” kacheube zeu.

¹⁷Chipau ting gene Isua Hera sam pauruachu di de lei: acheu sa ze, “Helung-heli zu lau, tinggîm heguangram â na de lei,” kacheu de lei.

¹⁸Zai Galili sungkling kung ge pa tatrua lage, besikina hangna Simonbe pe ji Peterbe ze kacheubepeu benai pe kinapeu Andriabe sungkling ge chiâk gi ze bambe pa ngau de lei, penai â hekâ nîmme dadegeu.

¹⁹Dadege pa ne penai je, “A chai sui le lau, I ne ningnai je ziemmena nîm ra tew gai gu lei,” acheu bei de lei.

²⁰Chidadege penai gu chîak ramme saupêt nan ze pe chai suitat ti de lei.

²¹Zai chigene pa tat-hang dai dege, kêdabe besikina hangna, Zebedaibe na Jakobbe benai pe kinapeu Johanbe ’nnei ge penai peu Zebedaibe penui bau penui gu chîak ketak bambe pa ngau de lei, dadege pa ne penai je ku de lei.

²²Chidadege penai gu ’nnei benai penai peu je saupêt nan ze pe chai suitat ti de lei.

²³Zai Isua Galiliram leine ge tatrua ze, penui gu ka’nduibeki ramme ge pa ne mâ-geteilia zai heguangram gu samkeyibe paurua zai baudime ruage herarît zat leine benai teuneube zat leine tew’mmi ze bam lei.

²⁴Chigum ze pe rasam Siriaram leine ge satat ti de lei, zai ka’nrâme leine, zai herarît zat gechâm-châmbe leine benai kahereube lieme, zai herasiabe bamme, zai kebui’nrâpatme, zai pepumchaime je pa ne tew’mmi kam bei de lei.

²⁵Zai Galili gene zai Dekapolis gene, Jerusalem benai Judia gene zai Jordan giam gene du baudime misongga ze pe chai suitat ti de lei.