Read Zeme Naga MATHAI 5 Bible Online

MATHAI 5 - Zeme Naga bible

MATHAI 5

¹Dadege baudime je ngau lu ze peloa ’mbe pa hang di de lei; zai pa ’ntau lage pe gu kenieme pe dage wang de lei.

²Dadege pe mui gene samsapat ze penui ze acheu ze mâ-geteilia ze:

³“Chi herui ge kelaksiame yi de lei, tinggîm heguangram ze penui gu daseu.

⁴“Desui ze bamme yi de lei, penui je tum gai bu daseu.

⁵“Kecheiluilungpungme yi de lei, kedei ze penui nguaheu gu daseu!

⁶“Kapelingbe je ’njeikahereime yi de lei, penui je kei’nggeu gai bu daseu.

⁷“’Nggiachime yi de lei, ka’nggiabe penui ngau gu daseu!

⁸“Helung ge ka’nchime yi de lei, Hera je penui ngau gu daseu.

⁹“Desieyi ra tewchime yi de lei, penui je Hera name ze kû gai bu daseu.

¹⁰“Kapelingbe hanggene tewsabe lieme yi de lei, tinggîm heguangram ze penui gu daseu.

¹¹“Ziemmename ne a ziegene ningnui je ’ngngiam, zai tewsâ zai karasa ne kesiabe leine ningnui peireige sa gai dezai ningnui hang yi de lei.

¹²Ningnui suiyi’nta ze ningnui suiyi-desang zu lau, tinggîm ge ningnui hî misongga la daseu, chigum ze ningnui suage kemeume je du ziemmename ne tewsa de lei.

¹³“Ningnui kedeirei ’nchaî lei; kane ’nchaî ne tâm dizai â, ’ndaigum ze tew’ngkum dai ra lau? Chize â tuâpat ze ziemmena ramme ne kutgetie ra de zangno, matâu hang ga de lei.

¹⁴“Ningnui kedeirei kebabe lei. Peloa ge namdi bambe â tei’mbaichi lak lei.

¹⁵Mige de hemibung ’ntau lu ze, ’ntui lungge kai me lei, kane pebâm ge kai lei. Chidezai kilûng ge bamme leine hangge ba ze bam lei.

¹⁶Chigum ze ningnui kebabe ze ziemmename suage peize lerba bam lau, chidezai ningnui tâ-keyibe tewbe penui ne ngau lu ze, ningnui Peu tinggîm ge bambepeu ngeu-tew’ndi ra hangge zeu.

¹⁷“Hingde benai kemeume je tew’ngga ra I wangkeube hangge ’nning gai se lau; penui je tew’ngga ra I wangkeu mak lei, kane penui je tewpui gai ra hang zangnêu.

¹⁸Pelingsing ze ningnui je I rang lei, ting benai kedei ga mak tâne hingde gu dak kat mei nune pegiakpoine mei ze mâtew-tewsedu ga ra mak lei, pelane wangchang kam mak tâne ai.

¹⁹Chidaze mi-mige du ai samde ramme ge cheilangbe ruage kat teikaheluibe kau, zai miramme je du chigum tew ra geteiliabe kau je â tinggîm heguangram ge cheilangbe kau ze kû gu lei; kane chiramme tew ze geteiliabe kau je â tinggîm heguangram ge kedibe kau ze kû gu lei.

²⁰Ningnui katelingbe ze leisirawme benai Pharisaime gu katelingbe suadu yi’ngkeu le makchaine â mâtew-tewsedu tinggîm heguangram ge ningnui gut ra mak lei be ningnui je I rang lei.

²¹“Tingtie ge gechîngme je, ‘Ningnui tewchat mak ra lei; mi-mige tewchatbe kau â, samrambe ge pa gut ku lei,’ kacheube ningnui seu de lei.

²²Kane ningnui je I rang lei, mi-mige de pe sikina peireige pedeu ga ze pe lumpumbe kau â, samrambe ge pa gut ku lei; zai mi-mige de pe sikina je ’nta kau kacheube kau je â sanhedrin ne pechu samram gu lei, zai mi-mige de, ‘Nang kemiebe kau!’ kacheube kau â, kehingbe gehenna hemi ge pa gut ku lei.

²³Chidadege herâtewbe bâm ge ning gu kela peibe luage, ning sikiname ne ning peireige penui lungyimakbe la lei be chige nang ’nningdau dizai â,

²⁴chi herâtewbe bâm suage ning gu kela sâu gai nan ze, tat ze ning sikiname je nguadesieyirai le lau. Chipau chângne wang ze ning kela pei lau.

²⁵Samrambeki ’mbe nang ningchu kesiatewpeu je ngua lu tatbe luage kelua ze pe dage ning kangme hang tew gai le lau, makchai â, ningchu kesiatewpeu ne samrampeu ba ge ningchu pei gai bei dezai, samrampeu ne kereîpeu ba ge pei gai bei ze ningchu kebangki ge kai bei ta du lei;

²⁶pelingsing ze ningchu I rang lei, ’nzuakiebe rangkâng ze nang pei’nzâuchiak kai mak tâne mâtew-tewsedu chigene nang zuapat ra mak lei.

²⁷“Tingtie ge ‘Ningnui hema ra mak lei,’ kacheube ningnui seu de lei.

²⁸Kane ningnui je I rang lei, mi-mige du ’mpuimi je pie ze mi pumsie gene ngauka’nchiebe kau â pe lung gene chipaupui dage hemagai’ndibe chang de lei.

²⁹Nang hezat’mbia mik ne ningchu hemui ra tew gai zai â kuitua ne lau, ning pum pelane gehenna ge tuâ gai ra sua â, ning pum taurâ kat gadibe ning hang kegiebe lei.

³⁰Zai nang hezat’mbia ba ne ningchu hemui ra tew dizai â dângtua ne lau; ning pum pelane gehenna ge tuâ gai ra sua â, ning pum taurâ kat gadibe ning hang kegiebe lei.

³¹“Aize du sa gai ’nde lei, ‘Mige pe nâu je tatuame â peize pa ne henâutabe leisi ze chi pe nâu je pei ra lei,’ acheu zeu.

³²Kane ningnui je I rang lei, mi-mige du pe nâu kahemabe deu gene mak ze, (kêdabe deu gene) pe nâu je tatuabe kau â, pe nâu je kahemapui hang tew gai de lei. Zai mi-mige du chi tapatkaipui je nguakelaktewbe kau â, kahemabe tâ tew de lei.

³³“Zai tingtie ge, ziemmename dage aipau sam rangbe ningnui seu de lei, ‘Karasa ne nang deseu mak ra lei, kane Tingwang dage nang deseugai’ndibe ze tewpui ra de lei,’ kacheube zeu.

³⁴Kane ningnui je I rang lei, mâtew-tewsede deseu se lau; tinggîm ji gene du, chize â, Hera bâmrak daseu,

³⁵zai kedei ji gene du, chize â, pe pichaî daseu. Zai Jerusalem ji gene du, chize â, Heguang dilangpeu gu namdi daseu.

³⁶Zai ning peî ne du, deseu se lau, ning tamkie kat du pû ra, zai tik ra nang tewchi lak lei.

³⁷Kane peize ning samsabe â, ‘Eu lei,’ nune ‘Mak lei,’ be runne lau; aipau peirei sapatbe â kesiapeu dagene pat lei.

³⁸“ ‘Hemik ne hemik, hegeu ne hegeu ra lei,’ kacheube ningnui seu de lei.

³⁹Kane ningnui je I rang lei, ningnui je tew’nsiarabe kau je tingkang se lau, kane mi-mige ne ning biapi hezat’mbia kagepeibe kau je â, katlam ’mbia du ’ndualie be lau;

⁴⁰mige ne ning mechua lurabe hang gene ningchu tewkeleu dizai â ning mechuapui du pei be lau.

⁴¹Zai mige ne ningchu ’nchi-chine mail kat nguatat ra langgaibe kau lazai â, mail kena nguatat be lau.

⁴²Ning dage gekiebe kau je pei be lau, zai hepuk ra kiebe kau dagene ’mbia se lau.

⁴³“ ‘Ning kiningme je nang hung ra lei, zai ning reime je nang ngaugailak ra lei,’ kacheube ningnui seu de lei.

⁴⁴Kane ningnui je I rang lei, ningnui teureime je hung lau, zai ningnui je tewsâme hangge kellum lau.

⁴⁵Ningnui Peu tinggîm ge kebampeu name ningnui chang le ra hangge zeu; pa ne kesiame benai keyime peireige tingnaimikpui pat ra tew gai bei, zai katelingme benai telingmakme peireige du tingrui ra tew gai bei de lei.

⁴⁶Ningnui je kehungme je runne ningnui hung dizaine â, getoabehi ningnui ’ndaikau ngau ra lau? ’Mpuâhame du chigum ze tew mak semei?

⁴⁷Zai ningnui puiname je runne ningnui heba ne kellum dizaine â, miramme suadu ningnui ’ndaikau tew gai ka’ngkeu lau? Jentailme leize chigum tew mak semei?

⁴⁸Chidaze ningnui Peu tinggîm ge bampeu yika’nsangbe gum ze ningnui du yi’nsang himchang ra lei.