Read Zeme Naga MATHAI 6 Bible Online

MATHAI 6 - Zeme Naga bible

MATHAI 6

¹“Ningnui tâ-yibe tewbe ramme ze, miramme ngau mak ra hangge ’ntîng le lau; makchai â ningnui Peu tinggîm ge bampeu dage ningnui hî hang ga du lei.

²“Chidaze nang miramme hangge mâ-pei dezai, helunglimpungme ne peize penui je toagaineibe ne, ka’nduibeki ge mei, ’mpuî’mmai ge mei, ze tewbe tak gum ze nang â ning suage hegeîluîkie ’mmut kai se lau. Pelingsing ze ningnui je I rang lei, penui â penui hî hang ngau lu de lei.

³Kane nang â miramme hang mâ-pei dezai ning ba hezat’mbia ba ne peibe ze, peize heku’mbia ba ne chî se lau.

⁴Chigum ze nang mâ-peibe ze ngaumakbe chang le ra hangge zeu; chidezai ning Peu ’ngkim ne ngaupeu ne ningchu peiruî dai gu lei.

⁵“Zai nang kellum dezai helunglimpungme gum ze bam se lau; penui â miramme ne penui je ngau ra, ka’nduibeki ge, zai ’mpuî’mai-mai ge sap lu ze kakellumbe je ka’nchâ daseu. Pelingsing ze ningnui je I rang lei, penui â penui hî ngau lu de lei.

⁶Kane nang â kellum dezai, nuksing ’mbe gut ze ’ngkam kainam lu, ning Peu ngaumakpeu dage kellum lau; chidezai ning Peu ngau mak ze bambepeu ne ning hî hang pei gu lei.

⁷“Zai kakellumbe ge Jentailme gum ze sam damlube dam’nruiwang dai se lau; penui â sam saka’ngkiebe gene penui sam ’ngking gu lei, ze penui ’nning gai daseu.

⁸Chime gum ze bam se lau; pe dage ningnui mâkie makge ningnui Peu â ningnui ’ndaikau ka’nnang mei be chikâ la daseu.

⁹Chidezai ningnui acheu ze kellum lau: Anui peu tinggîm ge bampeu, Ning ji peize ’nchi bam lau;

¹⁰ning gu heguangram peize wangkeu lau; ning suî ne tinggîm ge tew gum ze, kedei ge du peize tew lau.

¹¹Nemai ge anui gu nai’nsangne gu hetak pei lau;

¹²Anui pâu pungme je anui lun gum ze anui pâu du lun gai lau;

¹³Anui je duairabe ge ngua gai se lau, kane kesiabe gene anui je ripat kai lau, Amen.

¹⁴Miramme hedieka’ngkabe ramme je ningnui lun dizai â ningnui Peu tinggîm ge bampeu ne ningnui je lun gu lei;

¹⁵kane miramme hedieka’ngkabe ramme ze ningnui lun mak tizai â, ningnui Peu tinggîm ge bampeu ne du ningnui hedieka’ngkabe ramme ze lun ra mak lei.

¹⁶“Ningnui teseurei dezai helunglimpungme gum ze desungra ze bam se lau, penui â penui teseureibe ze miramme ne peize chî ra hangge penui ju desungra ze bam lei. Pelingsing ze ningnui je I rang lei; penui â penui hî ngau lu de lei.

¹⁷Kane nang â teseurei dezai, ning peî taudui ’nnuk lu, ning ju ’mpiau lu bam lau,

¹⁸dezai nang teseureibe ze ziemmename ngau mak ra, kane ngaumakbe ge bambepeu ning Peu ne ngau ra hangge zeu; zai ning Peu ’ngkim ne ngaupeu zene ningchu getoabehi pei gu lei.

¹⁹“Kedei ge tereî benai ’ntû ne teu’nsiaduibe ge, zai mâ-kahegame ne riput ze mâ-hegaduibe ge ningnui heu hang gekua gai se lau,

²⁰kane tinggîm ge tereî benai ’ntû ne teu’nsiamakbe ge, zai mâ-kahegame ne riput ze hegamakbe ge ningnui heu hang gekua gai le lau.

²¹Ningnui heu bambe bâm ge ningnui lung du bam daseu.

²²“Hemik â mi pum gu hemibung lei. Chidaze ning mik ’nchi dezai ning pum pelane ba kam du lei;

²³kane ning mik sia dizaine â, ning pum pelane muî kam du lei. Chidaze nang ge kebabe bambe ze muî dizaine â chi kemuîbe ze ’ndaizeuge muî de ra lau!

²⁴“Mige de heguang hangna guâ ’ngguachi lak lei; hangkat je pa ’nrie, zai hangkat je pa hung gu, nu hangkat je mêuhâ zai hangkat je pa ngaugailak ku lei. Hera benai mi heu guâ ningnui ’ngguaheruadau lak lei.

²⁵“Chidaze ningnui je I rang lei, ningnui keringbe hangge ningnui ’ndaikau teu ra mei, zai ’ndaikau sak ra mei, zai ningnui pum hangge ’ndaikau ningnui bâ ra mei, ze ’nninghereu se lau. Keteu-kesakbe suadu keringbe â betâudi zai mi paîni sua mi pum â betâudi mak ti lau?

²⁶Kehu ’mbe liamruabe ’nruine je pie gai ni lau: penui hetâ du ta mak, zai gat de gat mak, zai ’nseu ge du kai’ndui mak, kane ningnui Peu tinggîm ge bampeu ne penui je ka’ngkut lei. Ningnui â penui sua â pemîhung sang hung mak semei?

²⁷Zai ningnui ruage châu pehut peireige ’nninghereu ze sâu kat kaisuâ dui lau?

²⁸Zai paîni hangge ningnui ’ndaitew ra ’nningkahereu lau? Lilipâ ramme peningkâm ge bambe ’ndaigum ze chîngchu mei be ’nning gai ni lau, penui chîngchube tak zeu; penui â tâtew mak, zai kelâng du zui mak lei;

²⁹sedu ningnui je I rang lei, Solomonbe je du pa pe ngeudibe leine ge airamme je gum ze pechu keru gai mak lei.

³⁰Kane Hera ne peningkâm ge nemai ge bambe hereuneu ze ’nchuamai dezai ’mmang ge tuâgai’nderabe je chigum ze bâ gai dizai â chipau peirei ningnui je â bâ gai me ra semei, Hei ningnui keneibe chamme bau gau?

³¹Chidaze ‘’Ndaikau anui teu ra mei,’ zai ‘’Ndaikau anui sak ra mei,’ zai ‘’Ndaikau anui bâ ra mei,’ ze acheu ’nninghereu se lau?

³²Jentailme â airamme je peu-peu lei; zai ningnui Peu tinggîm ge bampeu ne airamme leine ningnui tâuka’nnang lei be chî lei.

³³Kane pe gu heguangram benai pa katelingbe ze peuraî le lau, dezai airamme leine ningnui hang chang gu lei.

³⁴“Chidaze ’nchuamai hangge ’nninghereu se lau, ’nchuamai hang â pe runne pe hang ’nninghereu du lei. Mai kat hereugaibe gu ze mai kat hereu hî hangge bui de lei.