Read Zeme Naga MATHAI 7 Bible Online

MATHAI 7 - Zeme Naga bible

MATHAI 7

¹“Ki se lau, ningnui je peize ki mak ra hangge zeu.

²Ningnui ne kibe luigum ze ningnui je du ki dai gu lei; zai ningnui ka’ndeube luigum ze ningnui je ’ndeu dai gu lei.

³Zai ’ndaitew ze ning mik ge hîngloa bambe nang chî mak ze, ning sikina mik ge keramoîne bambe nang pie lau?

⁴Zai ’ndaigum ze ning sikina je, ‘Ning mik ge keramoîne I ne lutua ne che lei,’ ze nang acheuchi ra lau, ning mik ge hîngloa bam zeu?

⁵Nang helunglimpungbe kau gau, ning mik ge hîngloa lutuaraî ne lau, chidezai ning sikina mik ge keramoîne bambe nang lutua ra ngaudesibi gu lei.

⁶“Hetei ramme je mâ-ka’nchibe pei se lau; zai kebak ramme suage ningnui gu teluichu ramme tuâ gai se lau, makchai â, chi teluichu ramme ze penui ne kut’nsia gai bei ze chize ne ningnui je tewjâm dai bei ta du lei.

⁷“Kie lau, ningnui je pei bu lei, peu lau, ningnui ngau gu lei; gekeu lau, ningnui je lat kai bu lei.

⁸Mi-mige de gekiebe kau â, ngau-ngau lei; zai gepeube kau je â dau-dau lei, zai kagekeube kau je â lat kai bu lei.

⁹Makchai â ningnui ruage châu pe na ne pe dage tingku kie bei ze, tingchukâng pei ra lau?

¹⁰Nune pe na ne hekâ kie bei ze châu pe na je henêu pei ra lau?

¹¹Ningnui kesiame ’nsangdu ningnui name hangge mâ-keyibe pei ra chî dizai â ningnui Peu tinggîm ge bampeu pe dage gekieme je mâ-keyibe ramme misongga pei mak ta ra semei!

¹²Chidaze mâ-mâ leine ziemmename ne ningnui dage tew gai ra ningnui luneibe gum ze miramme peireige ningnui du chigum ze tew lau; aize hingde zai kemeume de lei.

¹³“Kemuki cheibe gene gut lau; tew’nsiarabe ge nguagaibe kemui â di, zai gutsêu dadege chigene gutme â kiesang-kie lei.

¹⁴Keringbe ge nguagaibe kemui â chei zai gut-hung dadege chize ngaudaume â cham-sang-cham lei.

¹⁵“Kemeu karasame je ’ntîngchi le lau, chime â melichûp kai lu, ningnui dage wang-wang lei, kane penui lung ge â henei-ketabe ramme de lei.

¹⁶Penui je penui rachî gene ningnui chî gu lei, heturiebang gene grepchî rai’ndui-dui semei, makchai heturiebang gene ’mbeuchî rai’ndui-dui semei?

¹⁷Chigum ze hingbang keyibe leine pechî keyibe ’nchikeu lei, zai hingbang kesiabe â pechî kesiabe ’nchipat lei.

¹⁸Hingbang keyibe ne pechî kesiabe ’nchipatchi lak lei, zai hingbang kesiabe ne pechî keyibe ’nchipatchi lak lei.

¹⁹Hingbang pechî keyibe ’nchipatmakbe leine ze â kuîkau lu, hemi ge tuâ gai nan tai lei.

²⁰Chigum ze penui je penui rachî gene ningnui chî gu lei.

²¹“Achu, ‘A Wang, a Wang’ kacheume leine ne tinggîm heguangram gutsua ra mak lei, kane a peu tinggîm ge bampeu ’nning tewme runne ne gut ku lei.

²²Chipau mai ge â misonggame ne achu, ‘A Wang, a Wang, ning ji gene Hera sam anui paurua, zai ning ji gene herasiabe je anui kelitua, zai ning ji gene tâningdaulakbe ramme anui tew mak mei?’ ze acheu gu lei.

²³Chidezai I ne penui je, ‘Ningnui tâ-kesiabe tewme gau, ningnui je I mâdau chî me lei, a dagene tatrimna de lau,’ ze rang’nchi gai gu lei.

²⁴“Mi-mige de ai a sam ramme seu lu ze tewbe kau â, kaningchingbe kau, tingchudepiang peireige heki tewbe gum chang gu lei;

²⁵zai tingruikeu zai hedui naîwang, zai tingkai guiwang ze, chipau ki ze nup te lei, kane kau mak tai lei; tingchudepiang peireige hekipung tewchu gai ’ndi dadegeu.

²⁶Zai mi-mige de ai a sam ramme seu lu ze, tewmakbe kau â, kemiebe kau, deseî peireige heki tewgaibe gum ze chang gu lei;

²⁷zai tingruikeu, hedui naîwang, zai tingkai guiwang ze chipau ki ze nup te lei, zai kâu di de lei; zai kâudibe ze â sia’ndi di de lei,” ze kacheu de lei.

²⁸Zai Isua aipau sam ramme sa kam gai dege, baudime pa mâ-geteiliabe ze ’nningdaulak ze bam lei.

²⁹Penui gu leisirawme gum ze mâ-getei mak ze, rezieteime gum ze penui je pa ne mâ-geteibeibe ziegeneu.