Read Zeme Naga MARKA 1 Bible Online

MARKA 1 - Zeme Naga bible

MARKA 1

¹Hera Na Isua Krista gu Sam Keyibe bepîbang putchube.

²Kemeu’mpeu Isaiabe ne acheu ze rawgai’ndibe ge, “Pie le lau, ning gu ’mpuî teleukuâ ra a gu hepâupaupeu je ning sua ’mbe I ne lang gai lei;

³hênamkang ge hangkat ne ka’nrungbe kuâ: Tingwang gu puidi ze teleukuâ lau, pe gu ’mpuî tew’nzei lau—” kacheube sam gum ze

⁴hemui kelunbe hangge helungkahelibe gu baptisma rasam paurua ze hênamkang ge Johanbe patlia de lei.

⁵Zai Judiaram leine gene zai Jerusalem ge bamme leine pe dage wang de lei; zai penui gu hemui ramme ralia bei ze, pa ne penui je Jordan geuki gene baptistew gai bei de lei.

⁶Chunage Johanbe â put-hu gêupaî bâ lu, zai hemeigei ne bekia kak kai lu, tîngkau (hênam teipichêu) ramme benai hênam gu ’ngkuidui ne teu ze bam lei.

⁷Zai pa ne acheu ze sam sarua ze, “A chaige I suadu peranchipeu wangkeu la lei, I â keikeu ze pe pichûpria heipat ra du bui me lei.

⁸I â hedui ne ningnui je baptistew de lei; kane pa â Herui Ka’nchibe gene ningnui je baptistew gu lei,” kacheu de lei.

⁹Chipau ting ge Isua Galili ge Nazareth gene wangkeu ze, Johanbe ne pechu Jordan geuki gene baptistew gai bei de lei.

¹⁰Zai hedui gene pa zuachu dege luakatne tinggîm latbak kai ze, Herui depeine gum ze pe peireige wangkeube pa ngau de lei;

¹¹dadege tinggîm gene hekuâ wangkeu ze, “Nang a Na nekune lei; ning dage I a sui-yisang-yi lei,” kacheu de lei.

¹²Zai luakatne pechu hênamkang ’mbe chi Herui ne nguatat ti de lei.

¹³Zai hênamkang ge Satan ne pechu hezie hedai duai ze bam lei; hênam gu hekaubena ramme ruage pa bam lei; zai angelme ne pechu ngua ze bam de lei.

¹⁴Zai Johanbe je nîm’ndibe chângge, Isua Galili ge wang lu, Hera gu Sam Keyibe paurua ze,

¹⁵acheu sa ze, “Beting â tewpui gai ’nde lei, zai Hera gu heguangram â na de lei; ningnui lung heli ze, Sam Keyibe ge ’nnum’mmi zu lau,” kacheu de lei.

¹⁶Zai Galili Sungkling bak tatpat dege, Simonbe benai Simonbe kinapeu Andriabe sungkling ge penai chiâktua bambe ze pa ngau de lei; penai â hekânimme dadegeu.

¹⁷Zai Isua ne penai je, “A chai sui le lau, ziemmena je nimme chang ra ningnai je I ne tew gai gu lei,” kacheu de lei.

¹⁸Zai kelua ze penai gu chîak ramme saupêt nan ze pe chai suitat ti de lei.

¹⁹Zai kecheîne tatpat kai dege, Zebedaibe na Jakobbe benai pe kinapeu Johanbe je pa ngau de lei, ’nnei lungge penai gu chîak ramme getak ze bambe hangna jeu.

²⁰Zai kelua ze pa ne penai je kû gai bei dege, ’nnei ge penai peu Zebedaibe benai tâtewme je sâu gai nan ze, pe chai suitat ti de lei.

²¹Zai Kaperna-um ge penui gut kai de lei; zai ’ntakbambe mai ge ka’nduibeki ge pa gutgap lu, mâ-geteilia de lei.

²²Zai pa geteiliabe sam ze penui ’nninglu-lu bam di de lei, leisirawme ne geteiliabe gum mak ze, rezieteipeu gum ze penui je geteilia bei dadegeu.

²³Zai luakatne chi penui ka’nduibeki ge herui kahebâbe bambepeu gihung gut te lei;

²⁴dadege pa ’nrung ze, “Nazareth’mpeu Isua gau, Nang ze anui hangge châu nung ze lau? Anui je deî’ngga ra nang wangkeu mei? Nang châu mei be I chî lei, Nang â Hera gu Ka’nchipeu lei,” kacheu de lei.

²⁵Kane Isua ne pechu ’nrû ze, “Ning kuâneu mak ze pe dagene zuapat te lau!” acheu bei de lei.

²⁶Zai herui kahebâbe zene pa bambepeu je tewkechuîlip kai lu ze, pe rankai ’nrung ze pe dagene zuapat ti de lei.

²⁷Zai penui ’nteumena ne ’nningdaulak ti, penui karai ge mâ ’nneu ze, “Aize ’ndaikau se lau? Mâ-geteirechidabe nung zeu! Rezietei lu herui kahebâbe je ’nsangdu pa ne samdie gai bei ze penui ne du pe kuâpheu bei lei,” kacheu de lei.

²⁸Zai luakatne Galili bak pebâm leine ge pe ji sa’nditat ti de lei.

²⁹Zai ka’nduibeki gene zuapat gap lu dege, Simonbe benai Andriabe ki ge Jakobbe benai Johanbe je ngua lu gut ti de lei.

³⁰Chunage Simonbe nâu pui kaherêube rarît ne ’nrâ ze jei bam lei, zai chipau luage pe rasam Isua je penui ne saliarâp kai bei de lei.

³¹Dadege pa wang lu, ka’nrâpui je pe ba ne tei lu kuakchu gai bei ze chi ka’nrâbe ze sau di de lei; dadege â chipaupui ne penui je mâ-mâ ’nggua bam di de lei.

³²Zai chipau mai hegî naimik kêu di dege, penui ne ka’nrâme benai herui kesiabe bamme leine je pe dage nguawang de lei.

³³Zai chipau namdi ge bamme leine kemuiki hiage wang’nduigit kai de lei.

³⁴Zai herarît gechâm-châmbe gene ka’nrâme je pa ne tew’mmi bei, zai herakesiabe ramme je kelitua gai bei de lei; zai herasiabe ramme je sam sa ra pa ne lun mak lei, penui ne pechu chi dadegeu.

³⁵Bechaibe mai hechuasûn tingbapat makge, Isua chu lu, zîngbe bâm ge tat lu, chige pa kellum bam de lei.

³⁶Dadege Simonbe zai pe dage bamme ne pechu suitat ti de lei,

³⁷dadege penui ne pechu ngau lu dege, pechu “’Nteumena ne ningchu peu la de lei,” kacheu de lei.

³⁸Zai pa ne penui je, “Kêdabe namdi ramme ge du anui tat kai rî kei lei, chige du I sam paurua gai ra hangge zeu; chipau deu hanggene I zuapat daseu,” kacheu de lei.

³⁹Zai Galili bak leine ge pa tatrua ze, penui gu ka’nduibeki ramme ge sam salia, zai herasiabe ramme je kelitua ze bam de lei.

⁴⁰Zai ka’mpapeu pe dage wang ze, kukdungkeu lu, acheu ze pechu kiâm ze, “Nang ne nei zai â, achu nang ne tew’nchi duî lei,” ze kacheu de lei.

⁴¹Dadege ngauka’nggiabe ne pui di ze Isua ne pe ba getuapat ze pechu deî gai de lei, dadege pechu, “I nei lei, ’nchi de zu lau,” acheu bei de lei.

⁴²Dadege luakatne ka’mpabe rarît ze pechu sâu gai bei ze pa ’nchi di de lei.

⁴³Zai Isua ne pechu sam gechibe ne dei sing gai lu, pechu tat ra lang gai bei de lei,

⁴⁴zai pechu, “’Ntîng le lau, aize mî dage du nang sa mak ra lei; kane nang tat ze tingkupeu dage teilia lau, zai Mosabe ne diegaibe luigum ze ningchu hui’nchigaibeibe tâ hangge herâtew zu lau, baudime suage sakkitewbe chang le ra hangge zeu,” kacheu de lei.

⁴⁵Kane pa ne pat ze chipau rasam ze saruagai’ndibe gene chipau sam ze pebâm leine ge puigit bamdibe ziegene Isua â ’ndûlang ze keloa ge gutchi lak ti ze, hênamram zîngbe ge bam di de lei; zai baudime pe dage mâ-mâ gene zuawang ze bam lei.