Read Zeme Naga MARKA 10 Bible Online

MARKA 10 - Zeme Naga bible

MARKA 10

¹Zai pa chigene sâu nan ze Judiaram bak zai Jordan giam ka ze tat ti de lei, zai baudime pe dage wang’ndui gai kadai lei, zai tingtie-tie ge gum ze penui je pa geteilia kadai de lei.

²Zai Pharisaime hang lu, pechu kedak ra hangge mâ-’nneu ze, “’Mpeumi pe nâu je tatuâ ra hangge chize besie bei mei?” ze kacheu de lei.

³Pa ne penui je kak ze, “Mosabe ne ningnui je ’ndaikau die gai lau?” kacheu de lei.

⁴Penui ne, “’Mpeumi ne henâutabe leisi raw lu ’mpuimi je tatuâ ra Mosabe ne lun lei,” ze acheu bei de lei.

⁵Kane Isua ne penui je, “Ningnui lungchibe ziegene aipau sam pa ne ningnui hangge raw gai de lei.

⁶Kane ’ndamchube pîbang gene â, ‘Hera ne ’mpeumi benai ’mpuimi je tew gai bei de lei’

⁷‘Aipau deu hanggene ’mpeumi â pe peu benai pe pui je sâu nan ze pe nâu dage herua gai ra de lei,

⁸zai hangna ze kat chang ra lei.’ Chigum ze penai â hangna chang ta di ze, kat chang di de lei.

⁹Chipauziegene Hera ne teiheruagai’ndibe ze ziemmena ne peize tewrimna se lau,” ze kacheu de lei.

¹⁰Zai kilûng ge kenieme ne aipau deu ge pechu ’nneu kadai de lei.

¹¹Dadege pa ne penui je, “Mi-mige de pe nâu je tatuâ nan ze kêdapui dage kelaktewbe kau â, chipaupui peireige hema gai de lei;

¹²zai ’mpuimi pe napeu je meu nan ze kêdapeu dage kelaktew dizai â pa hema gai de lei,” kacheu de lei.

¹³Zai penui ne napoine ramme je pe dage nguawang de lei, peize penui je pa ne deî gai ra hangge zeu; dadege penui je kenieme ne ’ngngiam bei de lei.

¹⁴Kane chize Isua ngau lu dege, pe râta di ze penui je, “Napoine ramme je a dage peize wang lau, zai penui je nam se lau; Hera gu heguangram â aigumme hang daseu.

¹⁵Pelingsing ze ningnui je I rang lei, mi-mige de napoine gum ze Hera gu heguangram je ’nchâmakbe kau â, chige gut ra mak lei,” kacheu de lei.

¹⁶Dadege pa ne penui je pe ba ne pua lu, penui peireige pe ba die gai ze ’nnam gai bei de lei.

¹⁷Zai pa ka’mbeibe ’mpuî ge tat lage, hangkat pakhang ze pe suage kukdungkeu lu ze, “Geteiliapeu keyipeu gau, I ringbetunmakbe nguaheu ra I ne ’ndaikau tew sing ra ka’nnang lau,” ze ka’nneu lei.

¹⁸Dadege Isua ne pechu, “’Ndaitew ze nang achu keyipeu ze kû lau? Mî de yi me lei, kane Hera runne lei.

¹⁹Hingde ramme nang chî de zeî lau: ‘Tewchat so, hema so, hega so, karasa sakkitew so, choa so, ning pui ning peu ngeutew lau,’ kacheube zeu,” ze acheu bei de lei.

²⁰Zai pa ne pechu, “Geteiliapeu gau, airamme leine ze I hena’ngka gene rei kam lu de lei,” kacheu de lei.

²¹Zai Isua ne pechu pie gai lu ze, pechu hung di de lei, dadege pechu, “Kat nang ’nsang merei lei; tat ze ning gu kebambe leine zua lu, kelaksiame je pei be lau, dezai tinggîm ge ning heu gekuagaibe bam gu lei; zai wang ze a chai sui le lau,” acheu bei de lei.

²²Aipau sam gezene pa, pe ma hâmmuî gai di de lei, zai pe suisia ze tat ti de lei; pe heurâ misongga bam dadegeu.

²³Dadege Isua heguarua gai lu ze, pe gu kenieme je, “Keheume hangge Hera gu heguangram gut ra hung-desang lei!” kacheu de lei.

²⁴Zai pe gu kenieme ne pe sam ramme ’nningdaulaklu-lu bam de lei. Kane Isua ne penui je salia dai ze, “Hename nung gau, Hera gu heguangram gut ra hung-desang lei!

²⁵Keheube kau ne Hera gu heguangram gut ra sua â, put-hu ne ’ngngim kunki bua’nzut ra seu’nteu de lei,” kacheu de lei.

²⁶Dadege penui ’nningdaulak-desang di ze penui ne pechu, “Chigum dizai â châu ne ringpatchi le ra lau?” kacheu de lei.

²⁷Isua ne penui je pie gai lu, acheu sa ze, “Ziemmena dagene chize â chang lak lei, kane Hera dage â acheu me lei; Hera dage â getaleine chang dui kam lei,” ze acheu bei de lei.

²⁸Zai Peterbe ne pechu acheu sachu di de lei, “Pie le lau, anui â mâgetaleine sâu nan ze ning chai sui di de lei,” ze acheu zeu.

²⁹Isua ne sa ze, “Pelingsing ze ningnui je I rang lei, mi-mige de pe ki mei, nune pe sikina ’mpeumi mei, nune ’mpuimi mei, nune pe pui mei, pe peu mei, zai pe name mei nune pe gu kedei ramme mei je a ziegene benai sam keyibe ziegene sâulube kau â,

³⁰heki ramme, pe sikina ’mpeumi zai ’mpuimi ramme, pe puime, pe name, kedei ramme, zai tewsabe ramme du bam ze bak haî suadu kie ze aipau ting ge pa ngau gu lei, zai rehei wangrabe ge keringbe betunmakbe pa ngau gu lei.

³¹Kane keraime misonggame ne na gu, zai kenâme ne raî gu lei,” kacheu de lei.

³²Zai Jerusalem ’mbe penui hangbe luage, ’mpuîki ge penui tat bam de lei, zai Isua ne penui suage raî lu tat lei; zai penui ’nningdaulaklu-lu bam lei, dadege gesuime ramme ze hing di de lei. Dadege hangkereu-ze-kename je ngua dai lu ze, pe dage mâ wangchangrabe rasam penui je saliachu di de lei,

³³acheu sa ze, “Pie le lau, anui Jerusalem ’mbe hang la de lei; zai ziemmena Na je tingkugechîngme benai leisirawme ba ge peipat kai gu de lei, zai penui ne pechu chai ra chau’ngkui gai ze, Jentailme dage peipat kai gu lei;

³⁴zai penui ne pechu teihenuitew ze pe peireige ’nchai’ntui gu zai lakkegit ku, zai pechu tewchat ku lei; zai hezie kechumne chângge pa chu gu lei,” ze kacheu de lei.

³⁵Dadege Zebedaibe name, Jakobbe benai Johanbe pe dage wang lu pechu, “Geteiliapeu gau, ning dage anai ne gekie-kiebe nang ne anai hang tew gai be ra anai lunei lei,” kacheu de lei.

³⁶Dadege pa ne penai je, “Ningnai hang I ne ’ndaikau tew gai be ra lunei lau?” kacheu de lei.

³⁷Dadege penai ne pechu, “Ning ngeudibe ge nang hezat’mbia ge hangkat, zai nang heku’mbia ge hangkat ze ’ntau ra pei lau,” acheu bei de lei.

³⁸Kane Isua ne penai je, “Ningnai ’ndaikau kie mei be ningnai â chî mak lei. I sakbe piak ningnai sak dui mei, nune achu baptistewbe baptisma zene ningnai je baptis tew dui mei?” kacheu de lei.

³⁹Zai penai ne pechu, “Anai tew dui lei,” kacheu de lei. Dadege Isua ne penai je, “I sakbe piak ze ningnai sak ku lei; zai achu baptistewbe baptisma zene ningnai je baptistew gai gu lei;

⁴⁰kane hezat’mbia ge mei, nune heku’mbia ge mei ze ’ntaurabe ze â I ne peirabe mak lei, kane chize â penui hang teleukuagaibeime, chime hang de lei,” acheu bei lei.

⁴¹Zai kenieme hangkereume ne chize seu lu dege, Jakobbe benai Johanbe peireige penui râtachu di de lei.

⁴²Dadege Isua ne penui je pe dage kûwang lu penui je, “Mi-mige ne Jentailme peireige samramrame zene penui peireige heguang chang ze bam lei, zai penui gu kedime ne chime peireige rezietei ze bam lei be ningnui chî lei.

⁴³Kane ningnui ruage â chime gum bam ra mak lei; kane mi-mige de ningnui ruage kedibe changneibe kau â ningnui guâ ka’ngguabe kau chang ra lei,

⁴⁴zai mi-mige ningnui ruage raîneibe kau â ningnui ’nteumena gu kebang chang sing ra lei.

⁴⁵Ziemmena Na ’nsangdu pechu ’nggua be ra hang ne mak, kane pa ne ’nggua ra hang zai misonggame hang pumlei chang ze pa keringbe pei gai ra wangkeu daseu,” acheu bei de lei.

⁴⁶Zai penui Jeriko ge wangchang de lei; zai pa benai kenieme, zai baudime misongga Jeriko sâu ze tatchu dai dege, Timaibe na Bartimaibe pemikchit ze mâkieteuruapeu ’mpuî’ntai ge ’ntau bam lei.

⁴⁷Zai chize Isua Nazareth’mpeu lei be pa seu lu dege, “Isua Dabidbe Na, achu ’nggia gai lau!” acheu ze pa ’nrungchu di de lei.

⁴⁸Zai misonggame ne pechu ’ngngiam ze pe kuâneu mak bam ra rang gai de lei; kane pa ne ’nrung’nchibi-bi ze, “Dabidbe Na, achu ’nggia gai lau!” kacheu de lei.

⁴⁹Dadege Isua sau gai lu acheu sa ze, “Pechu kûwang lau,” kacheu de lei. Zai penui ne pemikchitpeu je kû lu ze, pechu acheu sa ze, “Ning lung di ze bam; chu le lau, pa ne ningchu kû la de lei,” acheu bei de lei.

⁵⁰Dadege pe gu mechuapui paileptua nan ze, pa zualepchu lu Isua tailam wang di de lei.

⁵¹Zai Isua ne pechu, “Ning hangge I ’ndaikau tew gai ra nang lunei lau?” ze kacheu de lei. Dadege pemikchitpeu ne, “Geteiliapeu gau, a mik ngau ra pei lau,” kacheu de lei.

⁵²Dadege Isua ne pechu, “Wang zu lau; nang keneibe ne ningchu tew’mmi bei de lei,” kacheu de lei. Zai luakatne pe mik ngaugap ti de lei, zai ’mpuîki gene pe chai suitat ti de lei.