Read Zeme Naga MARKA 12 Bible Online

MARKA 12 - Zeme Naga bible

MARKA 12

¹Zai sam’nda ramme ne penui je pa saliachu di de lei. Acheu sa ze, “Hangkat ne merie tew gai ze, perie riegua lu, zai grepchî niakrabe bâm hang bekui su lu, zai hekêt-kairabe bâm tew gai lu, tâtewkadekime ba ge pei gai nan ze, kêdabe heram ’mbe tebeîtewtat ti de lei.

²Zai beting chang dadege pe guâ ka’ngguapeu hangkat je tâtewkadekime dage grepchî merie ge pechî ’nchipatbe gêsa lu ra lang gai bei de lei.

³Zai penui ne pechu nîm lu, lakgetie gai lu, pe barua lang gai bei de lei.

⁴Zai ka’ngguapeu mâkedapeu je penui dage pa ne lang gai kadai de lei. Zai penui ne pechu pe peî ge tewjâm gai lu, pechu tewkengam gai bei de lei.

⁵Zai kêdapeu je pa lang gai de lei, zai pechu penui ne tewchat ’ndi lei; chipau luigum ze kêdame je penui ne lak bei, zai hanggesame je â penui ne tewchat ’ndi lei.

⁶Pe dage kêdabe hangkat bam rei lei, pe na hunglangpeu zeu, nâlangbe ge pechu penui dage lang gai ze acheu sa ze, ‘A na je â penui hengêutew gu lei,’ kacheu de lei.

⁷Kane chî tâtewkadekime ne, penui karai acheu sa ze, ‘Aipaupeu ne pe heu nguaheurapeu lei; kei lei, pechu tewchat ne kei lei, dezai pe heurâ chi pe gu merie ze anui hang chang gu lei,’ kacheu de lei.

⁸Dadege penui ne pechu nîm lu, tewchat lu, zai grepchî merie hela ’mbe tuâpat kai ’ndi de lei.

⁹Grepchî merie ’mpaupeu ne ’ndaikau tew gu lau? Pa ne wang lu ze tâtewkadekime je tew’ngga kam nan ze, chi grepchî merie ze tâtewkadekime kêdame ba ge pei ’ndu lei.

¹⁰Aipau sam rawdiakkaibe ka’nchibe ze ningnui kiâ gai mak ti lau: ‘Chi tingchukâng heki tewme ne tuâpat’ndibe zene pemik chukâng chang di de lei;

¹¹aize â Tingwang ne tâtewbe kau de lei, zai anui mikngau gene ’nningdaulak-desang lei,’ kacheube zeu?” ze kacheu de lei.

¹²Dadege chi sam’nda ze penui peireige sa gai be kau de lei be penui ’nningchidibe ziegene pechu nîm ra penui kaheka de lei; kane baudime je penui hing di lei.

¹³Zai Pharisaime benai Herodbe kumme hanggesame je Isua dage penui ne lang gai de lei, Pe samsa gene pechu nîmrabe chiâm hangge zeu.

¹⁴Dadege penui wang lu, pechu, “Geteiliapeu gau, nang â kapelingbe kau, zai mî je du kehung-ka’nrie tewmakbe kau lei be anui chî lei; nang â ziemmena luî pie mak, kane Hera gu ’mpuî pelingsing ne geteilia daseu. Kaisarbe dage ’mpuâhâ peirabe besie mei nune besie mak lau?

¹⁵Anui chiramme pei ra mei, nune pei mak ra lau?” kacheu de lei. Kane penui helunglimpungbe tak chî lu, pa ne penui je, “’Ndaitew ze achu kakedak lau? A dage rangkângpum kat teiwang lau, chize I pie gai che lei,” kacheu de lei.

¹⁶Dadege penui ne kat teiwang de lei. Zai pa ne penui je, “Aize châu luî zai châu gu samrit lau,” acheu bei de lei. Penui ne pechu, “Kaisarbe gu lei,” kacheu de lei.

¹⁷Isua ne penui je, “Kaisarbe gu ze Kaisarbe je pei be lau, zai Hera gu ze Hera dage pei be lau,” acheu bei de lei. Chidadege â penui pechu ’nningdaulak ti ze bam de lei.

¹⁸Zai Saddusime, ringchukadaibe ga lei ze kacheume bau pe dage wang de lei; zai penui ne acheu sam ’nneu ze,

¹⁹“Geteiliapeu gau, Mosabe ne anui hang acheu rawdiak kai ze, mi-mige de pe sipeu chai di pe na ga ze pe nâu je sâudiak kai dizai â, pe kinapeu ne chipaupui je pe nâu hang lu sing ra, zai pe sipeu hik hang piakeu gai ra lei, ze kacheu de lei.

²⁰Pe sikina ’mpeumi ’mpampatme hangsename bam de lei, meraipeu pe nâu kû lu pe na ga ze chai di lei;

²¹zai pakenapeu ne chipaupui je pe nâu hang lu lu, pe na ga ze chai di lei; zai pakechumpeu du chipau luigum ze chai di de lei;

²²chigum ze hangsename penui na ga ze chai kam di de lei. Nâlangbe ge â chi ’mpuimi du chai di de lei.

²³Ringchukadaibe ge chipaupui ze châu nâu pa chang ra lau? Hangsename ne pechu penui nâu hang lutau’nggam gai ’ndi daseu?” ze kacheu de lei.

²⁴Isua ne penui je, “Rawdiakkaibe leisi sam Ka’nchibe du chî mak, zai Hera tâtewchibe ze du ningnui chimakbe ze chi ningnui maube mak ti lau?

²⁵Kechaibe gene penui chu dezai â penui kelaktew ta da, zai mei du mei ta de lei, kane tinggîm ge angelme gum bam de lei.

²⁶Zai kechaibe gene kuakchu gai bei ze bamme deu ge Mosabe gu leisikuak ge hereupuîtum rasam rawgaibe bâm ge Hera ne pechu, ‘I ze Abrahambe Rapeu, zai Isaakbe Rapeu, zai Jakobbe Rapeu lei,’ ze sagaibe tak ze ningnui kiâ gai mak semei?

²⁷Pa â kechaime Rapeu mak, kane keringme Rapeu lei; ningnui mâu’nzû di de lei,” kacheu de lei.

²⁸Zai leisirawme ruage hangkat ne hang lu ze penui karai ge samtube seu lu de lei; zai Isua ne penui je samkaktâuka’mmibe ngau lu dege pechu sam’nneu ze, “Hingde ruage ’ndaibe ze raîlangbe lau?” ze kacheu de lei.

²⁹Isua ne kak ze, “Railangbe ze â, ‘’Ngking le lau, Hei Israelme nung gau: Tingwang anui Rapeu, Tingwang â kat lei;

³⁰zai Tingwang ning Rapeu je ning lung leine ne, nang keringbe leine ne, nang ka’nningbe leine ne, zai ning ranchi leine ne hung ra lei,’ kacheube lei.

³¹Pakenabe â ai lei, ‘Ning runne ningchu hung gum ze, ning kining’mpeu je nang hung ra lei,’ kacheube zeu. Airamme sua â samde kedibe kêdabe ga de lei,” ze kacheu de lei.

³²Zai leisirawpeu ne pechu, “Nang â tâu de lei, Geteiliapeu gau, ze kacheu de lei; pa â kat lei zai pe runne zangno kêdabe kau ga lei;

³³zai mi lung leine ne, mi-machi leine ne, zai mi ranchi leine ne hung ra, zai mi ramna’mpeu je mi je gum ze hungrabe ze â rûkambe-râtewbe ramme benai herâtewbe ramme leine suadu di’nteu lei ze nang sabe ze peling de lei,” kacheu de lei.

³⁴Zai Isua ne pa ningching-desang ze samkakbe ngau lu dege pechu, “Nang â Heraram gene deu me lei,” kacheu de lei. Zai chipau châng dege â mî de pechu sam ’nneukiaku ta di de lei.

³⁵Zai Isua kellumki ge geteiliabe luage, pa ne “’Ndaigum ze leisirawme ne Krista ze Dabidbe na lei ze acheuchi ra lau?

³⁶Dabidbe sing ne Herui Ka’nchibe ne pechu pe lung gene rang bei ze acheu sapat ze, ‘Tingwang ne a Wang, Tingwang je, Ning teureime je I ne ning pîkang ge kai mak tâne â, a hezat’mbia ge ’ntau lau,’ ze kacheu de lei.

³⁷Dabidbe sing ne du pechu Tingwang ze ku lei; chigum dizai ’ndaigum ze pa pe na chang ra lau?” ze kacheu de lei.

³⁸Zai pa mâ-geteiliabe ge pa ne sa ze, “Leisirawme, mechuatiebe kai lu tatruaneime, zai hechaiki bâm ramme ge hebakellum tewliabe luneime

³⁹zai ka’nduibeki ramme ge yilangbe bâm ramme benai luube-bâm ge hengêutewbe bâm ramme deze ka’nchâme,

⁴⁰kemîpui ki gu mâ-mâ ruiteu ze pahelîtew ze kellumtiechime je ’ntîng le lau. Penui â chau’ngkuigaibe kedibe ngau gu lei,” ze kacheu de lei.

⁴¹Zai pa mâ-hâbung je ’ntauda ze ’ntau gai de lei, zai baudime mâ-hâbung ge rangkâng kaibe pie bam de lei. Keheume misonggame ne rangkâng maîkie-kie kai lei.

⁴²Zai kemîpui kelaksiapui hangkat wang lu ze rangkângpum kena, (chize boîsa kat) mâ-hâbung ge kai de lei.

⁴³Dadege pe gu kenieme je pe dage kûwang lu, penui je, “Pelingsing ze ningnui je I rang lei, ai kemîpui kelaksiapui zene mâ-hâbung ge penui hâ kaime leine ’nteumena sua â kai’ngkie lei.

⁴⁴Penui â penui gu misongga bambe gene kai lei; kane pa â kegazie ze pe dage kebambe leine ze kai lei, pa ring ra ’nsakkaibe nane zeu,” ze kacheu de lei.