Read Zeme Naga MARKA 13 Bible Online

MARKA 13 - Zeme Naga bible

MARKA 13

¹Kellumki lung gene Isua hela zuapat dege, pe gu kenieme ruage hangkat ne pechu, “Geteiliapeu gau, pie gai ni lau, tingchu ningdaulakbe ramme, zai heki ningdaulakbe ramme zeu!” kacheu de lei.

²Zai Isua ne pechu, “Ai heki kedibe ramme nang ngau mei? Tingchu taudesuarikkaibe ramme katte tuâkeu mak ta ra mak lei,” kacheu de lei.

³Zai kellumki je teidabe Olib loa ge Isua ’ntau lage, Peterbe, Jakobbe, Johanbe zai Andriabe ne reine ze pechu sam ’nneu ze,

⁴“Airamme ’ndaibe ting ge wangchang ra mei zai airamme leine tewpuigairabe ge ’ndaikau ne chang ra mei be ka’nchetbe anui je rang lau,” kacheu de lei.

⁵Dadege Isua ne penui je saliachu di de lei, acheu sa ze, “Mige ne ningnui je ngualietatterabe deze ’ntîng le lau.

⁶Misonggame ne a ji gene ‘I ze pa de lei!’ acheu ze wang gu lei, zai penui ne misonggame je ngualietat ku lei.

⁷Kahereibe benai herei rasam ramme ningnui seu dezai helung keheu ze bam se lau; aize â wangchang sing gu de lei, kane hetûn â mak kerei lei.

⁸Heramzat kat ne kêdabe heramzat je ’nggi gu, zai heguangram kat ne kêdabe heguangram je ’nggi gu lei; pebâm gechâm-châmbe ge kedei-kaketeibe ramme, zai herakûm ramme wang gu lei; kane aize â hereurabe hang putchube runne gerei lei.

⁹“Kane ningnui runne ’ntîngchi ze bam lau; samrambe bâm ramme ge ningnui je penui ne peipat kai gu daseu; zai ka’nduibeki ramme ge ningnui je lakgetie gu lei; zai a ziegene laksaibe ramme benai heguangme suage ningnui sap ku lei, penui suage ningnui sakkitewrabe hangge zeu.

¹⁰Zai heramzatme leine dage sam keyibe pau gai raî himchang gu lei.

¹¹Zai ningnui je penui ne nîm lu samrambeki ge kai dezai ningnui ’ndaikau sa ra mei be, ’nninghereu’ntua se lau; kane chipau nehî ge ningnui je peigai-gaibe luigum ze ningnui sa lau, chize â ningnui ne sarabe mak se, kane Herui Ka’nchibe ne sa ra daseu.

¹²Zai besikina ne besikina je chai ra peipat kai gu, zai bepeu ne pe na je chai ra peipat kai gu lei, zai napoine ramme ne penui pui-peu je ’nggi ze tewchat ku lei;

¹³zai a ji ziegene ’nteumena ne ningnui je ngaugailak ku lei, kane hetûn riâ liechanglube kau â ring gu lei.

¹⁴“Tewkahebâbe ngauhingbe katenetbe pebâm makbe ge sapbe ningnui ngau dezai (aipau leisi sam kiapeu je peize chî le lau), Judia ge bamme peize peloa ramme ge pak kai de lau;

¹⁵zai heki ’mpûm ge bambepeu je peize wangkeu se lau, pe ki ge mâ-mâ lu ra du peize wangkeu se lau;

¹⁶zai helu ge bambepeu je peize helatwang ze pe gu mechuapui lu se lau.

¹⁷Chipau ting ge ka’mpungme zai ’ngngiêne puatungme hangge mi duângga-desang gu lei!

¹⁸Chize hetating (kahegeibe ting) ge wangchang mak ra kellum zu lau.

¹⁹Chipau ting ge kahereube tak gumbe â Hera ne kedei ’ndamgaibe pîbang gene seu ze chuna riâ chang ze wangchang mak kerei lei, zai wangchang dai ra mak lei.

²⁰Tingwang ne chipau ting ze tew’ndui gai be mak tizai â, mî de ringpat dai lak lei; kane pa ne pe gu kelânglume hang ziegene aipau tingnaimikpui ramme ze tew’ndui gai de lei.

²¹Zai mige ne ningnui je, ‘Ni, aige Krista la lei!’ kacheu mei nune ‘Ni, chige pa la lei!’ kacheu mei dizai â, chige ze ’nnum’mmi se lau.

²²Krista karasa kau ramme benai kemeume karasa kau ramme pat ze ka’nchetbe ramme benai mi ningdaulakbe zat ramme teilia gu lei, changdui zaine â kelânglume je ngualietat ra hangge zeu.

²³Kane ’ntîng le lau; mâgetaleine ningnui je besua’ngka ge I rang’ntua kam bei de lei.

²⁴“Kane chi kahereube châng, chipau ting dezai naimik muî du lei, zai hekêu ne pa’mbi pei ra mak lei,

²⁵zai hegi ramme tinggîm ’mbene ’ngngaîkeu gu lei, zai tingkehube ge tâtewchibe rezie bambe ramme gechuî’ngngai gai bu lei.

²⁶Chidezai ziemmena Na je kemâu gene reziechibe benai pengêudibe ne wangkeube penui ngau gu lei.

²⁷Zai tingmik deulangbe gene tingmik deulangbe lungge bamme Hera ne kelânglume pe gume je gekumwang ra hangge pa ne angelme je tingmik medai ge lang gai gu lei.

²⁸“’Mbeuchîbang gu gene mâ-geteiliabe chî le lau: bekeî ramme ge besûne tumpat zai pebuâ ramme buapat gap dezai gepuak ting na di de lei be ningnui chî le lau.

²⁹Chigum ze airamme wangchangbe ningnui ngau dezai, pa â na de lei, kemui ki hiage la de lei be ningnui chî le lau.

³⁰Pelingsing ze ningnui je I rang lei, airamme leine ze wangchang makge aipau rehei ga ra mak lei.

³¹Ting benai kedei â ga gu, kane a sam ramme â ga ra mak lei.

³²“Kane chipau tingnaimikpui benai panehî â mî de chî me lei, tinggîm ge angelme ’nsangdu chî me lei, zai pe Na du chî me lei, kane Bepeu runne chi lei.

³³’Ntîng le lau, kuâ’mmi lau; chipau nehî wangrabe ting ze ningnui chî mak daseu.

³⁴Chize â mige tebeîtewpeu helî gum lei, pa pe ki sâu ze tat ra ge pe guâ ka’ngguame je heki piekua ra lang gai ze penui tâ-tâ hang pei gai lei, zai kemui kereîpeu ze reîkuammi ra die gai lei.

³⁵Chidaze kuâ’mmi lau—heki’mpaupeu hegî ge mei, muisum ge mei, nune ’nruikuabe hî ge mei nune hechua ge mei, ’ndaitewbe hî ge wang gu mei be ningnui chî mak daseu —

³⁶makchai â, luakatne pa wang ze ningnui jeilaleube ngau gu de lei.

³⁷Zai I ne ningnui dage sabe ze ’nteumena dage salia lau: Rak ze piekua bam lau,” ze acheu zeu.