Read Zeme Naga MARKA 14 Bible Online

MARKA 14 - Zeme Naga bible

MARKA 14

¹Zai chunage ’Nduihîkaimakbe Tingku-ngi dau ra hezie kena runne bam di de lei. Chidadege tingku gechîngme benai pharisaime Isua je reine ze nîm lu tewchatrabe tak hang peu de lei;

²penui ne “Hengî ting gene â ra mak lei, chigum dizai â, baudime keleupat kû daseu,” ze acheu bei dadegeu.

³Bethani ge Simonbe, kaperiepeu ki ge Isua bam ze mâ-teu ra ’ntau lage, ’mpuimi hangkat nard ’nchichiakbe taudui perîmyibe kaibe alabastarbung tei lu wang de lei, dadege chipau bung ze pa ne tewpâng lu, pe peî ge ruî gai de lei.

⁴Kane chige bamme hanggesame ne penui râta ze kat-kat dage acheu ze dam ze, “’Ndaitew aipau taudui perîmyibe ze ’ntane aigum ze tewka’ngga lau?

⁵Aipau taudui ze rangkâng denari haî chum suadu kie ze zua lu, kelaksiame je pei ra yi zangno,” ze kacheu de lei. Zai penui ne pechu ka’ngngiam de lei.

⁶Kane Isua ne, “Pe sui-sui peize tew le lau; ’ndaitew ze ningnui pechu tewkahereu lau? A peireige peluiyibe tâ pa ne tew gai de lei.

⁷Kelaksiame â pehî’nsangne ge ningnui dage bam bam daseu, ningnui nei-neibe luage ningnui penui hangge tew dui lei; kane achu â ningnui nguabam-bam ra mak lei.

⁸Pa tewduî-duîbe riâ ze pa tew gai de lei; kechai bairabe hangge pa ne a pum ’nnuk’ntua gai de lei.

⁹Zai pelingsing ze ningnui je I rang lei, kedeirei pelane ge ai sam keyibe pauruabe bâm leine ge, pa tewgai’ndibe ze pechu chibam ra hang ranglia bu lei,” kacheu de lei.

¹⁰Dadege Juda-Iskariotbe kereu-ze-kename ruage mi hang kat changbepeu ze tingkugechîngme tailam tat ti de lei, penui dage Isua je zua gai ra hangge zeu.

¹¹Chipau rasam penui seu lu dege, penui suiyi di de lei, zai pechu rangkâng pei ra hang penui samhat kai de lei. Dadege Isua je zua ra hang pedâuyibe pa peuchu di de lei.

¹²Zai ’Nduihîkaimakbe Tingku gu tingnaimikpui raîlangbe mai ge tat’ntuahengi hang melipoine tewchatbe mai ge pe gu kenieme ne pechu, “Tat’ntuahengi kahengîbe gu teseu nang tew ra ’ndaige anui tat ze teleu gai be ra lau?” kacheu de lei.

¹³Dadege pe gu kenieme hangna je pa ne lang gai de lei, zai penai je, “Namdi ’mbe ningnui gut chu lau, zai hangkat heduibung puabe ningnai ngaudau gu lei; pe chai ningnai sui lau,

¹⁴zai pa gutkai-kaibe ge heki ’mpaupeu je ’mpau gai lau, ‘Geteiliapeu ne rang ze, a kenieme je Tat’ntuahengi gu teseu nguateurabe hangge I rêurabe hesangkisiâm ’ndaige la lau?’ kacheu lei, ze acheu zeu.

¹⁵Chidezai kedâkuagaibe ’nreibe kisîam kedibe ze pa ne ningnai je ’ngngualia gu lei; chige anui hang kedâ gai le lau,” acheu bei de lei.

¹⁶Dadege pe gu kenieme zuapat ze namdi ’mbe tat ti de lei, zai pa ne penai je ranggaibe luigum ze dau de lei; zai chige Tat’ntuahengi hang penai pebâm kedâ gai de lei.

¹⁷Zai hegî dege kereu-ze-kename je ngua lu pa wang de lei.

¹⁸Zai mâ-teube-kaira ge penui mâ-teube luage Isua ne, “Pelingsing ze ningnui je I rang lei, ningnui ruage hangkat, achu nguateupeu ne achu zua gu lei,” kacheu de lei.

¹⁹Penui lunghereu chu di de lei, zai penui hangkat-kat ze pechu, “Chize I mei, I mei?” ze kacheu de lei.

²⁰Pa ne penui je, “Chize â kereu-ze-kename ruage hangkat, hepiak kat gene achu tingku ’ngua-sûmgaipeu ze de lei.

²¹Ziemmena Na â pe rasam hang rawgai’ndibe luigum ze tat lei, kane ziemmena Na je zua’ndipeu hangge mi duânggabe de lei! Chipaupeu je â lungkeu mak nung laîzai pe hang yi de lei,” kacheu de lei.

²²Zai penui mâ-teube luage, Isua ne tingku lu lu ’nnam gai lu, zai tiapâng lu penui je pei de lei, “Lu lu teu lau; aize a pum lei,” kacheu lei.

²³Zai pa ne hepiak lu lu, pe suiyibe sam pau gai lu dege, penui je pei lei, zai penui ’nteumena chize sak te lei.

²⁴Dadege pa ne penui je, “Aize samhatkaibe gu a jai ze misonggame hangge ruîpatkaibe lei.

²⁵Pelingsing ze ningnui je I rang lei, ai grepchî gu ze I sak dai ra mak lei, Hera gu heguangram ge chize I sakrechirabe mai wangchang mak tâne ai,” kacheu de lei.

²⁶Zai penui heleu kat tew gai lu dege, Olib Loa ’mbe penui tatpat ti de lei.

²⁷Dadege Isua ne penui je, “Ningnui ’nteumena kâutat kam du lei; ‘Melireîpeu je I ne lak ku, dezai meli ramme pakrarip kai du lei,’ acheu ze raw gai ’ndi daseu.

²⁸Kane achu kuakchulube châng dezai Galili ’mbe ningnui suage I ne râitat ku lei,” kacheu de lei.

²⁹Peterbe ne pechu, “Penui ’nteumena kâutat kam di sede I â kâu ra mak lei,” kacheu de lei.

³⁰Dadege Isua ne pechu, “Pelingsing ze ningchu I rang lei, nemai tingmuî ge ’nruirie kua kena makge luachum nang achu ’ngkim gu lei,” acheu bei de lei.

³¹Kane pa ne tingkisi ze sa ze, “Ningchu I nguachai sing gu lei, ningchu I ’ngkim ra mak lei,” kacheu de lei. Zai penui ’nteumena ne chigum kacheu kam lei.

³²Zai Gethsemane kacheube bâm ’mbe penui tat ti de lei; zai pa ne pe gu kenieme je, “I kakellumbe kakge aige ’ntaukua lau,” kacheu de lei.

³³Chidadege Peterbe, Jakobbe, zai Johanbe je ngua lu pe duângga ze pe lunghereu-desang chu di de lei.

³⁴Zai penui je, “A keringbe hereu-desang ze chai ra gum de lei; aige bam ze piekua lau,” kacheu de lei.

³⁵Zai kecheîne pa tat’ndeupat kai lu, kedei ge kâukeu gai lu kellum ze, chang dui bei zaine â chipau nehî pe dagene tei’mbia ’nde ra pa kie de lei.

³⁶Dadege pa ne, “Abba, a peu, ning dage mâgetaleine chang dui kam lei; a dagene aipau piak ze tei’mbia gai lau; acheuleusedu a suî’nning ne mak lei, kane ning suî’nning ne ra de lei,” ze kacheu de lei.

³⁷Zai pa wang dege, penui â jeikeu kam di laleube pa ngau de lei, dadege pa ne Peterbe je, “Simonbai, nang jeikeu di mei? ’Nchetkak kat de nang â piekua lak mei?

³⁸Piekua ze kellum bam lau, dezai keduaibe ge ningnui gut mak ra hangge zeu; herui â nei-sang-nei lei, kane hemeipum ne peran-ga lei,” kacheu de lei.

³⁹Zai pa tat dai lu, keraîbe sam luigum ze kakellum de lei.

⁴⁰Zai pa wang dai dege, penui jeikeudibe pa ngau kadai de lei, penui jeineu-desangdibe ziegeneu; zai pechu ’ndaikau samkak kai ra mei be penui chî ta di de lei.

⁴¹Zai pakechumbe wang dai dege penui je, “Chuna riâ du ningnui jeitemichai bam rei mei? Bui de lei; panehî wangchang de lei; zai ziemmena Na je â hemuime ba ge zua gai ’nde lei.

⁴²Chu le lau, anui tatchu kei lei; pie le lau, achu zuapeu wang’nna mui de lei,” kacheu de lei.

⁴³Zai pa sam sa lage, kereu-ze-kename ruage hangkat Judabe ze, tingkugechîngme, leisirawme zai gechîngme ne langgaibeime, hiazutkie benai hetui ramme teime baudime je ngua lu luakatne wang de lei.

⁴⁴Chunage kelutewgaipeu ne mâ-takge â chî ra tew gai ze acheu sa ze, “I ne keputkairapeu ze de lei; pechu nîm lu yine ze nguatatchu lau,” ze kacheu de lei.

⁴⁵Zai pa wang dege luakatne pe tailam wanggap lu ze pechu, “Geteiliapeu!” kacheu de lei.

⁴⁶Dadege penui bahuâ kai ze pechu nim de lei.

⁴⁷Kane chige sapme ruage hangkat ne pe gu hiazutkie tukhitpat lu, tingkudilangpeu gu kebang je bi bei de lei, zai pe kun bitak ’ndi de lei.

⁴⁸Dadege Isua ne penui je, “Hegasut-teupeu peireige gum ze hiazutkie benai hetui ramme tei lu achu nîm ra ningnui wang mei?

⁴⁹Patingnaigepat ningnui dage bam ze kellumki ge I mâ-geteilia bam bei, kane ningnui achu nîm mak zeu. Acheuleusede rawdiakkaibe leisi ka’nchibe sam peize tewpui gai be zu lau,” kacheu de lei.

⁵⁰Dadege kenieme ’nteumena pechu sâu gai nan ze pak kam di de lei.

⁵¹Zai rehang’mpeu hangkat betachiâmbe paî runne bâ gai lu, pe chai sui de lei, zai penui ne pechu nim de lei,

⁵²kane betachiâmbe paî sâu gai nan ze pumlâng paktat ti de lei.

⁵³Dadege penui ne Isua je tingkudilangpeu tailam nguatat ti de lei; zai tingkugechîngme, gechîngme zai leisirawme ’nteumena wangka’ndui de lei.

⁵⁴Zai Peterbe â kedeu ’mbene tingkudilangpeu ki tedirielung riâ pe chai suigutchang lei; zai hekêtkaime ruage pa ’ntau ze hemigûm bam lei.

⁵⁵Zai chunage tingkugechîngme benai samrambeki ge ’nteumena ne Isua je tewchatkairabe hangge sakki peu ze bam de lei; kane penui mâ de ngau mak lei.

⁵⁶Misonggame ne pe peireige karasa ne sakkitew da, kane penui sakkitewgaibe ze mâ de ’nzuâ mak lei.

⁵⁷Zai hanggesame ne sapchu lu, pe peireige karasa ne sakkitew ze acheu sa ze,

⁵⁸“Aipaupeu ne, ‘Aipau kellumki mi ba ne tewgaibe ze I tew’nsia ’ndu, zai hezie kechumne lung gene kêdabe mi ba ne tewmakbeki I tew gai gu lei,’ kacheu lei,” ze kacheu de lei.

⁵⁹Chigum sa gai sedu penui sakkitewbe ze mâ de ’nzuâ mak lei.

⁶⁰Dadege tingkudilangpeu ne penui zuilung gene sapchu lu, Isua je sam ’nneu ze, “Nang mâ de kak kai ra ga mei? Aime bau zene ning peireige sakkitewgaibe ze ’ndaikau lau?” kacheu de lei.

⁶¹Kane pe kuâneu mak ze mâ de kak mak bam lei. Zai tingkupeu ne pechu ’nneu dai ze, “Nang ze Suanggai-ze-bambepeu Na Krista de mei?” kacheu de lei.

⁶²Dadege Isua ne, “Eu lei, chize I de lei, zai ziemmena Na Tâtewchipeu hezat’mbia ba ge ka’ntaube benai tinggîm kemâu gene wangkeube ningnui ngau gu lei,” acheu bei de lei.

⁶³Dadege tingkudilangpeu ne pe puâ hit ze, “’Ndaikau hang anui sakki ramme hang ka’nnang rei lau?

⁶⁴Pa ne Hera je saka’nsiabe ningnui seu de lei. Ningnui ’ndaikau ’nning gai lau?” ze kacheu de lei. Zai penui ’nteumena ne pa chai ra chau’ngkui gai bei de lei.

⁶⁵Zai hanggesame ne pechu ’nchai’ntui chu di de lei, zai pe ju dum lu, zai pechu lakgetie ze pechu ’nnui ze, “Rang lau!” kacheu de lei. Zai hekêtkaime ne pechu kagepei de lei.

⁶⁶Zai Peterbe â ’ngkang ’mbe tedirielung ge bam lage, tingkudilangpeu guâ ka’ngguame ’mpuimi ruage hangkatpui wang de lei;

⁶⁷zai Peterbe hemigûm bambe ngau lu, pechu pie gai lu, acheu sa ze, “Nang du Nazareth’mpeu Isua dage bam de lei,” kacheu de lei.

⁶⁸Kane pa ’ngkim ze, “Nang rangbe ze I â chî de chî mak, zai ’nning du ’nningchi me lei,” kacheu de lei. Zai teririe kemui ki ’mbe pa zuapat ti de lei.

⁶⁹Zai chi ka’ngguapui ne pechu ngau lu, pe taige sapme dage, “Aipaupeu ze penui ruage hangkat te lei,” acheu sachu kadai lei.

⁷⁰Kane pa ’ngkim kadai de lei. Zai mâtiegemakse chige sapme ne Peterbe je, “Nang du penui ruage hangkat sing lei; nang â Galili’mpeu daseu,” kacheu de lei.

⁷¹Kane pe runne pechu chiang ze deseutew ze, “Pe rasam ningnui sapeu je I â mâ de chî me lei,” acheu bei de lei.

⁷²Chidadege luakatne ’nruirie ze pakenabe kua gai ’ndi de lei. Dadege Isua ne pechu, “Nruirie kua kena makge nang achu luachum ’ngkim gu lei,” kacheube sam ze Peterbe ’nningdau di de lei. Dadege pa pe lung hereu-desang di ze hap ti de lei.