Read Zeme Naga MARKA 16 Bible Online

MARKA 16 - Zeme Naga bible

MARKA 16

¹’Ntakbambe mai kam gai dege, Mari Magdalinle, Jakobbe pui Marile, zai Solomile penui pechu ’nnuk kai ra hangge mâ-perîmyibe lui lu teiwang de lei.

²Zai ’ntakkak gu tingnaimikpui raîlangbe hechuasûn ge, naimik pat dege heraw ’mbe penui tat ti de lei.

³Zai penui karai kat-kat je, “Châu ne heraw-mui ge tingchukâng ze anui hangge kelatpat kai ra lau?” kacheu de lei.

⁴Zai ’ngngangchu pie gai dege, chi tingchukâng kelatpat ti laleube penui ngau de lei—chize di-kadesang dadegeu.

⁵Zai heraw lungge penui gut dege, rehang’mpeu hangkat paî kehâbe ne bâsup lu ze hezat’mbia pa ’ntaubambe penui ngau lu ’nningdaulaklu-lu bam de lei.

⁶Zai pa ne penui je, “Lu-lu bam se lau; Isua Nazareth’mpeu giagai’ndipeu je ningnui peu lau. Pa â chu dai de lei, pa â aige ’ngga de lei; penui ne pechu ’njeigaibe bâm ge pie gai ni lau.

⁷Kane tat ze pe gu kenieme benai Peterbe je, Galili ’mbe ningnui sua pa â raîtat te lei, ningnui je pa ranggaibe luigum ze chige ningnui pechu ngau gu lei, ze ranggai be lau,” kacheu de lei.

⁸Hingkakedunbe benai ningdaulakbe penui peireige wangchangdibe ziegene penui heraw gene zuapat lu, paktat ti de lei; penui kehingbe ziegene mi dage de mâ de sa mak lei.

⁹Zai chunage ’ntakkak gu tingnaimikpui raîlangbe mai ge, pa ne herasiabe hangsena je kelipatkaibeipui Mari-Magdalinle je pa hechuasûn liâ gai raî de lei.

¹⁰Tingtie Isua dage bamme, chi penui hap ze heu ze bambe luage pa ne tat ze penui je rang gai bei de lei.

¹¹Kane pa ring la lei, zai pa ne pechu ngau lu de lei be sam penui seu lu sedu penui ’nnum’mmi mak tai lei.

¹²Aipau chângge penui ruage hangna penai heram ’mbe tatpatbe luage kêdabe luîtak gene pa penai je lia de lei.

¹³Zai penai ne helatwang dai lu, kêdame suage salia bei da, kane penai je du penui ’nnum’mmi mak tai lei.

¹⁴Chipau chângge hangkereu-ze-katme penui mâ-teu ze ’ntau lage, pa ne penui je lia de lei, zai pa ne penui ’nnum’mmimakbe, zai penui lungchibe ziegene penui je ka’ngngiam de lei, pa chukadaibe chângge pechu kengaume je penui ’nnum’mmimakbe ziegeneu.

¹⁵Zai pa ne penui je, “Kedeirei leine ge tat ze sam keyibe ze ’ndamgai’ndibe zat leine dage paurua lau.

¹⁶’Nnum’mmi ze baptistewlube kau je â tew’nring gai bu lei; kane ’nnum’mmimakbe kau je â tew’ngkui gai bu lei.

¹⁷Zai ’nnumka’mmime je â ai ka’nchetbe ramme zene sui ze bam gu lei! A ji gene herasiabe ramme je penui kelitua gu, zai hekuâ karchibe ramme gene penui sam sa gu lei;

¹⁸penui ne henêu ramme kuaichu ze bam gu, zai mâ-mâ mi je tewchatrabe dui sak sede chiramme ne penui je tewhejam ra mak lei; hereu-teuneume peireige penui ne penui ba die gai gu lei, dezai penui yi du lei,” ze kacheu de lei.

¹⁹Dadege Heguang Isua penui je ’mpaugailube chângge tinggîm ’mbe pechu teichu di ze, Hera hezat’mbia ge ’ntau di de lei.

²⁰Zai penui zuapat ze pebâm’nsangne ge Hera sam pau gai de lei, zai Heguangpeu ne penui je nguatatew ze, paugaibeibe sam ze ka’nchetbe ramme zene tew’ntip kai bei de lei. Amen.