Read Zeme Naga MARKA 3 Bible Online

MARKA 3 - Zeme Naga bible

MARKA 3

¹Zai pa ka’nduibeki ge gut kadai de lei; zai chige hangkat pe ba katlam chaibepeu bam lei.

²Zai ’ntakbambe mai ge Isua ne pe ba katlam chaibepeu je tew’mmi gai gu mei be penui pechu rikpie bam lei, pe peireige kesia’ndam gai ra hangge zeu.

³Zai pa ne pe ba katlam chaibepeu je, “Ailia wang lau,” kacheu de lei.

⁴Dadege pa ne penui je, “’Ntakbambe mai ge keyibe tew ra mei, nune tewhereu ra mei, nune tew’nring ra mei, nune tewchat ra mei be hangge besie mei besie mak lau,” ze acheu bei de lei. Kane penui kuâneu mak bam di lei.

⁵Zai pe rata ne penui je pierua gai lu, zai penui lungchibe ziegene pe suisia di ze, chipau peu je, “Ning ba getuapat lau,” acheu bei de lei. Pa pe ba getuapat kai de lei, zai pe ba ze yi di de lei.

⁶Pharisaime zuapat lu, ’ndaigumbe tak gene pechu tew’nsia ra mei be hangge keluakkelet Herodbe kumme dage kahedei de lei.

⁷Dadege Isua pe gu kenieme je ngua lu sungkling ’mbe ’mbiatat ti de lei, zai Galili gene baudime misongga ze pe chai suitat ti lei;

⁸zai Judia gene du zai Jerusalem gene du Idumia gene, Jordan gene Tira benai Sidon gene du baudime misonggame pa tâtewbe rasam seu lu, pe dage zuawang de lei.

⁹Zai pe hangge ’nnei tinggeukuâ gai ra kenieme je pa rang gai de lei, baudime ziegeneu, makchai â, penui ne pechu tew’nsia gu daseu;

¹⁰misonggame je pa ne tew’mmi bei dadege herarît gechâm-châmbe bamme zene peize pechu deî gai ra pe tailam hengeiwang de lei.

¹¹Zai herui kahebâbe ramme pechu ngau tânege pe suage kâukeu ze, penui rankai ’nrung ze, “Nang â Hera Na lei,” acheu chêu lei.

¹²Zai pa ne penui je pa châu mei be sapakpat me ra diesing gai bei de lei.

¹³Zai pa ne ka’nchâme je pe lam wang ra kû gai bei de lei, dadege pe dage penui zuawang de lei.

¹⁴Dadege pe dage bam ra, zai Hera sam paurua ra lang gai ra,

¹⁵zai rezietei lu ze herasiabe je kelitua ra hangkereu-ze-kename pa ne sumgaime ze:

¹⁶Simonbe pa ne Peterbe ze kacheupeu;

¹⁷Zebedaibe na Jakobbe benai Jakobbe kinapeu Johanbe, pa ne Bo-anerjes (chize â, Tingcheibe name) acheu kupeu kena;

¹⁸Andriabe, Philipbe, Bartholomaibe, Mathaibe, Thomasbe, Alphaibe na Jakobbe, Thadaibe, zai Kanan’mpeu Simonbe,

¹⁹zai Juda-Iskariotbe pechu zuapeu, aime bau de lei. Dadege Isua kilûng ’mbe gut ti de lei.

²⁰Zai baudime chige wang’ndui gai dai bei dadege, Isua benai pe gu kenieme â mâ du teuchi lak tai de lei.

²¹Ziemmena ramme ne, “Pa â meluang di la de lei,” ze acheubeibe ziegene pe kiduîme chize seu lu dege, pechu ngua ra tat ti de lei.

²²Zai leisirawme Jerusalem gene wangkeume ne, “Pechu â Be-elzebul ne kangua de lei, zai herasiabe wangpeu gu rezie gene pa herasiabe ramme je kelitua lei,” ze kacheu de lei.

²³Dadege pa ne penui je pe dage kûwang lu, sam’nda ne penui dage sa ze, “’Ndaigum ze Satan ne Satan je kelituachi ra lau?

²⁴Heguangram kat zene pe runne pekarai hegei dizai â, chipau heguangram ze sapchi lak lei.

²⁵Heki-kelak kat zene pe runne pekarai hegei dizai â chipau kelak ze sapchi lak lei.

²⁶Zai Satan du pe runne pekarai hegei ze pâng dizai â, pa sapchi lak lei, kane tud kai de ra runne de lei.

²⁷Kane peranchipeu ki ge gut ze mî de pe gu kerua kehiautatchi lak lei, chi peranchipeu je pirai makchai aî; dezai pe ki ze kehiauchi duî zangnêu.

²⁸“Pelingsing ze ningnui je I rang lei, ziemmena gu hemui ramme benai penui ne Hera je sakahebâbe ramme leine ze lun dui lei;

²⁹kane mi-mige de Herui Ka’nchibe je saka’nsiabe kau â, mâtew-tewsedu kelunbe ngau mak lei, kane betundaimakbe hemui gene ’ngkui ze bam lei” — kacheu de lei.

³⁰“Pe dage herui kahebâbe la lei,” ze penui ne acheubeibe ziegeneu.

³¹Dadege pe pui benai pe kiname wang de lei; zai hela ge sap lu, pechu kû ra pe dage lang gai de lei.

³²Zai baudime ne pe taige ’ntauguâgit bam lei; dadege penui ne pechu, “Ning pui benai ning kiname hela ge ningchu peu la lei,” acheu bei de lei.

³³Dadege pa ne kak ze, “Châume ze a pui, zai a kiname lau?” acheu bei de lei.

³⁴Zai pe taige ’ntauguâme je pa heguarua gai lu, pa ne “Aige a pui benai a kiname â la de lei!

³⁵Mi-mige Hera ’nning tewbe kau ze a kinapeu da, zai a kinapui da, zai a pui de lei,” ze kacheu de lei.