Read Zeme Naga MARKA 4 Bible Online

MARKA 4 - Zeme Naga bible

MARKA 4

¹Zai sungkling kunghia gene pa mâ-geteiruachu kadai de lei. Zai pe taige baudime misongga ze wang’nduigit kai bei dege, sungkling ge ’nnei poine bambe ge pa â gut ze ’ntau di lei; zai baudime â ’nneigiam ge bam lei.

²Zai pa ne penui je sam ramme misongga ze sam’nda ne geteilia de lei, zai penui je pa geteiliabe ge acheu sa ze:

³“’Ngking le lau! Helei ka’nrukpeu helei ’nruk ra tat ti de lei.

⁴Zai pa ’nruk kai dege, helei gêsa â ’mpuî’ntai-taige keu gai de lei, zai ’nruine ramme ne wang ze chize teu ’ndi lei.

⁵Zai helei gêsa â tingchuterazeu kedei kahepeube ge keu gai lei, zai kedei kahepeu dadege luakatne puakchurâp ti de lei;

⁶zai naimik huchu ze naichiê ne pukî ’ndi de lei. Zai pema teringhi mak dege lai gai di lei.

⁷Zai helei gêsa â hetuzeu ge keu gai de lei, zai hetubang ramme chîngchu dege chi helei je zin nan ze, pebuî ’mbuî mak tai lei.

⁸Zai helei gêsa â kedei keyibe ge keu gai lei; chize puakpat ze, chîngchu lu, perachî misongga ’nchi ze, gêsa â bak himreu, zai bak riakseruk, zai bak haî kat pat lei,” kacheu de lei.

⁹Dadege Isua ne, “Mi-mige de seu ra pe kun bambe kau â, peize seu le lau,” kacheu de lei.

¹⁰Zai Isua pe runne bambe luage, pe taige bamme hangkereu-ze-kename zai penui dage bamme baudime ’nteumena ne sam’nda ramme tedeu ge pechu sam ka’nneu de lei.

¹¹Zai pa ne penui je, “Hera gu heguangram gu hekimsam ze â ningnui je pei gai ’nde lei, kane hela ge bamme hang â getaleine sam’nda ramme ge bam di de lei;

¹²chidezai penui ngau â ngau gu, kane ’nningchi ra mak, zai seu â seu gu, kane seuchi ra mak lei; maklaîzai â, penui ’nreiwang ze penui je lun gai bu de lei,” kacheu de lei.

¹³Dadege pa ne penui je, “Aipau sam’nda ze ningnui seuchi mak mei? Chigum dizai â, ’ndaigum ze sam’nda ramme leine ze ningnui seuchi le ra lau?

¹⁴Helei ka’nrukpeu ne sam ze ka’nruk lei.

¹⁵Zai ’mpuî’ntai-taige chize ’nrukkaibe ze â, aime de lei; sam ze penui seu dege, luakatne Satan wang lu penui dage sam ’nrukkaibe ze lutat ti de lei.

¹⁶Chipau luigum ze tingchuterazeu ge ’nrukkaibe ze du chigum chang lei, penui ne sam ze seu lu dege, luakatne penui suiyi-’nnang gai ze sam ze luteu de lei;

¹⁷zai penui runne ne pema teringhi mak lei, kane beting keduîne hang bam gai lei; zai chi sam ziegene kahereube mei, nune tewsabe mei wang bei dege, luakatne penui kâukeu gai di lei.

¹⁸Zai kêdabe ramme â hetuzeu ge ’nrukkaibe ramme ze de lei; penui ne sam ze seu lu,

¹⁹kane ai kedeirei gu ’nningkahereube ramme, zai keheube je ka’nchiebe zai mâkedabe merua ramme luneibe penui dage gut ze sam ze zin nan ze perachî ’nchi mak lei.

²⁰Kane kedei keyibe ge ’nrukkaibe ze â sam ze seu lu, luteu ze penui chî ’nchipat ze bak himreu, bak riakseruk, bak haî ngau de lei,” kacheu de lei.

²¹Dadege Isua ne penui je, “Hemibung ze pebâmrabe ge kai mak ze, ’ntui lungge mei, nune jeîkang ge mei ze kai ra hangge teiwang-wang mei?

²²Teilia ra runne zangno mâ de teibaibe ga lei; zai kebabe ge wang ra runne zangno mâ de ’ngkimrabe zat ga lei.

²³Mi-mige de seu ra pe kun bambe kau â, peize seu le lau,” kacheu de lei.

²⁴Zai pa ne penui je, “Ningnui keseube ge ’ngking’mmi le lau; ningnui ’ndeu lu peibe riâ gene ningnui hang du ’ndeu gai dai bu lei, zai chi suadu kie ze ningnui je kaisuâ gai bu lei.

²⁵Pe dage kebambe kau je â peisuâ gai bu lei; pe dage kegabe kau je â pe dage bambe ’nsangdu teitat ’ndu lei,” kacheu de lei.

²⁶Zai pa ne. “Hera gu heguangram â mige hangkat ne kedei ge helei ’nruk kai lu ze,

²⁷zai pa tingmuî benai tingbabe luage jeikau, zuachu ze, zai helei â chipau luage puakpat ze chîngchu ze bambe pa â chî mak ze bambe helî gum lei.

²⁸Kedei gene perunne ze raîlangbe ge perau ’ntuapat dezai pebuî ze pemi-gesang chang di de lei.

²⁹Zai pechêupum ze mei dadege â pa luakatne pe gu ’ngkuaine ne gatchu di de lei, hechit ting chang di dadegeu,” kacheu de lei.

³⁰Zai pa ne, “Hera gu heguangram je ’ndaikau ne anui teikedachi le ra lau, nune ’ndaikau gu sam’nda ne chize anui sa’ndachi le ra lau?

³¹Chize â ’nzeyichêu gum lei, chize â kedei ge linggaibe luage kedeirei ge helei ruage cheilangbe chang de lei;

³²sede ling gai bei ze chîngchu dege â mâ-kiak ramme ruage dilangbe chang di ze ’nruine ramme bekeî ge penui chippua gai lu lei,” kacheu de lei.

³³Aigumbe sam’nda ramme misongga ze penui suage pa salia de lei, penui seuchiduibe riâ geneu;

³⁴sam’nda tei mak ze penui suage mâ de pa sam salia mak lei; kane pe gu kenieme penui runne bambe luagene penui dage pa ne rangkeli gai bei de lei.

³⁵Chipau mai hegî dege, pa ne penui je, “Sungkling wîgiam ’mbe anui kapat kei lei,” acheu bei de lei.

³⁶Zai baudime je sâu gai nan ze ’nnei ge pa bambe luage, penui ne pechu nguatat ti de lei. Zai kêdabe ’nnei ramme du pechu nguaka’nzang de lei.

³⁷Zai natri chi-kadesangbe nupwang ze, hedui kagesuâkbe ne ’nnei ze nupgetie bei dege ’nnei ze hedui ne pui di de lei.

³⁸Kane pa â ’nnei mi ’mbe hekum ge ’ngkûm lu jeikeu di de lei; penui ne pechu ’ngkia ze, “Geteiliapeu gau, anui gaderabe ze nang ’nningtenang mak mei?” kacheu de lei.

³⁹Dadege pa chu lu, tingkai je pa ne ’ngngiam bei, zai sungkling je, “Sauzîng de zu lau!” acheu bei de lei. Zai tingkai sauzîng gai di de lei.

⁴⁰Zai pa ne penui je, “’Ndaitew ze ningnui hing lau? Ningnui keneibe ga mei?” acheu bei de lei.

⁴¹Zai penui hing’nteu nan ze, kat-kat je penui ’mpau ze, “Aipau peu ze châu rei se lau? Tingkai benai sungkling ’nsangnedu pe kuâ pheu bei zeu,” ze penui kacheu de lei.