Read Zeme Naga MARKA 5 Bible Online

MARKA 5 - Zeme Naga bible

MARKA 5

¹Zai sungkling giam kat lam’mbe, Gerasinram ge penui wangchang de lei.

²Zai ’nnei gene zuapat gap dege, hangkat pe dage herui kahebâbe bambepeu, herawloa ’mbene patdau lei,

³herawloa ge bam-bampeu zeu; zai pechu hegeîria ne’nsangdu pigim lak ti bam de lei;

⁴pechu â hegeîria benai hegeî’ngkap ne pi gai ka’nsui da, kane hegeîria ramme ze pa ne chaktappriu nan, zai hegeî’ngkap ramme ze du tewbet kam nan tai lei; zai mî de pechu teigimchi lak lei.

⁵Kemuî-keba heraw ramme ge zai kedeiloa ramme ge ’nrung ze, zai tingchu ne pe runne pechu tewjâm ze bam lei.

⁶Dadege kedeu ’mbene Isua je pa ngau lu dadege pakzuawang lu, pechu kakellum lei;

⁷dadege pe rankai ’nrung ze, “Hei Isua, Hera Hulangpeu Na gau, Nang ze a hangge châu ze lau? Hera ji gene I ningchu kiam lei, achu tewsâ se lau?” kacheu de lei.

⁸Isua ne pechu, “Nang herui kahebâbe kau aipaupeu dagene zuapat te zu lau!” acheu bei dadegeu.

⁹Zai Isua ne pechu, “Ning ji ’ndaikau lau?” ze ka ’nneu lei. Pa ne, “A ji â Changsenângbe lei; anui misongga la daseu,” acheu kak lei.

¹⁰Zai chipauram gene pechu kelitua mak ra pa ne pechu kiâm-kadesang de lei.

¹¹Zai chunage chi peloa ’mpei ge kebakdung misongga ze deteu bam lei;

¹²zai chi herui kahebâbe ramme ne Isua je, “Kebakdung dage anui je lang gai be lau, chime lung ge anui gut ra pei lau,” ze penui kiam de lei.

¹³Dadege pa ne penui je lun bei de lei. Zai chi herui kahebâbe ramme zuapat lu, kebak ramme lungge gut ti de lei; zai kebak ramme riak chang na gum ze sungkling kung hekâutû ’mbe pak’nsukkeu ze sungkling ge kehakchat kam gai di de lei.

¹⁴Zai chi kebak reîme pakpat ze, namdi ge benai keloa ge chipau sam salia bei de lei. Zai ’ndaikau wangchang di mei be pie ra ziemmename zuawang de lei.

¹⁵Zai Isua tailam penui wang de lei, zai pe lung ge herasiabe chang-ne-chang bambepeu chige paî bâ lu, pe suî ’nchanghangwang dai ze ’ntaubambe ngau lu dege penui hing di de lei.

¹⁶Zai chi kengaume ne herui kahebâbe bambepeu benai kebakdung dage mâ-wangchangbe ze salia bei de lei.

¹⁷Dadege penui ne Isua je penui ram huâzie gene tatrimna de ra rangchu di de lei.

¹⁸Zai ’nnei ge Isua gut ra heka gai lage, chi tingtie ge herui kahebâbe bambepeu ne pe dage bam bam de ra Isua je kiam de lei.

¹⁹Kane Isua ne pechu pheu mak ze, pechu, “Ning ki lam tat chu lau, tat ze ning peireige Tingwang ne tâ ’ndaizeuge tew gai bei mei be benai ’ndaizeu ngau’nggia bei mei be rasam salia be lau,” acheu bei de lei.

²⁰Dadege pa ne tat ze Isua ne pe peireige ’ndaizeu tâtew gai bei mei be rasam ze Dekapolis ge saba gai bei ze, ziemmena leine ne ’nningdaulak ti de lei.

²¹Zai Isua ’nnei gene sungkling giam katlam kapat dai dege, baudime misongga pe taige buâwang de lei; zai pa â sungkling kung ge bam lei.

²²Zai ka’nduibeki ge besuitewme ruage mi hangkat pe ji Jairabe ne pechu ngau lu dege, pe pîkang ge ’ngkumkeu ze,

²³“A na heleu’mpui chaitena ze la de lei, wang ze pe peireige ning ba ne die gai lau, dezai pa yi du lei, zai ring dai du lei,” ze pechu kiam lei.

²⁴Dadege Isua ne pechu ngua lu tat ti de lei, zai baudime misonggame ne pechu hengeigetie ze pe chai suitat ti de lei.

²⁵Zai ’mpuimi hangkat kum kereu ze kena kahejaipui bam lei,

²⁶zai tew’mmichime gekieme ba kang gene pa hereulie-desang ze bam de lei, zai pe dage bambe leine tuâ kam gai bei ze, mâ de yi meraine siabi-bi di de lei.

²⁷Isua rasam pa seu lu dege baudime ruagene pe chai ’mbene hang lu ze pe paîri deî gai de lei.

²⁸Zai “Pe paîri leusedu I deî gai bei dezai I yi du lei,” ze pa ’nninggaibe ziegeneu.

²⁹Dadege luakatne pa kahejaibe ze sau di de lei; zai pe pum ge pe runne ne pa kahejaibe tew’mmi bei de lei be pa chî di de lei.

³⁰Zai Isua pe dagene tâtewchibe zuapat ti de lei be pa chîgap lu dege, baudime lam ’nreiwang pie ze, “Châu ne a paîri deî bei lau?” ze kacheu de lei.

³¹Dadege pe gu kenieme ne pechu, “Baudime ne ningchu hengeigetie bambe nang â ngaukâ lu sedu, ‘Châu ne achu deîtau lau?’ acheu zeu,” ze acheu bei de lei.

³²Zai pa â châu ne chipau tâ tew mei be chî ra heguarua bam lei.

³³Kane chi ’mpuimi ne pe peireige ’ndaikau wangchang di mei be chî lu dege, hingkedun di ze wang lu, pe suage ’ngkumkeu gai lu, mâ peling leine pechu salia bei de lei.

³⁴Zai pa ne pechu, “A na ’mpuimi gau, nang keneibe ne ningchu tew’mmi bei de lei; ning lung temichai ze tatchu lau, zai nang kahejaibe gene yi’nchi de zu lau,” acheu bei de lei.

³⁵Zai Isua sam sa lage, Jairabe ki gene hanggesame wang lu, “Ning na heleu’mpui â chai de lei. ’Ndaitew ra Geteiliapeu je nang deîhereusua dai ra lau?” kacheu de lei.

³⁶Kane Isua ne penui paugaibeibe sam mâ hangge de ’nning gai mak ze ka’nduibeki ge pemuitewpeu je, “Mâ de hing mak ze ’nnum’mmi bam lau,” acheu bei de lei.

³⁷Zai Peterbe, Jakobbe, zai Jakobbe kina Johanbe je runne zangno, kêdabe kau je pe chai sui ra lun mak te lei.

³⁸Zai ka’nduibeki ge pemuitewpeu ki penui wangchang dadege, ziemmename ne puîhap ’nrungriau-riau ze keleulia bambe Isua ngau de lei.

³⁹Zai pa zuagut lu, penui je, “’Ndaitew ze ningnui hapkeleulia ze bam lau? Napoine â chai me lei, kane jeikeu di lei,” acheu bei lei.

⁴⁰Dadege penui ne pechu ka’nnui de lei. Kane pa ne penui ’nteumena je hela ’mbe kelitua ’ndi lei, zai napoine pui benai pe peu, zai pe dage bamme je ngua lu, chi napoine bambe bâm ’mbe gut ti de lei.

⁴¹Zai pa ne napoine ba tei lu, pechu, “Talitha kumi,” ze kacheu de lei, chize â, “Heleumenapoine gau, I ne ningchu rang lei, chu de zu lau,” kacheu be lei.

⁴²Zai luakatne heleumenapoine zualepchu lu, tatrua di de lei; (pa â kum kereu ze kena kau de lei). Zai penui ’nningdaulak lap ti de lei.

⁴³Dadege Isua ne penui je aize mî de peize chî mak ra rang sing gai bei de lei, zai pechu mâ teu ra pei ra penui je rang gai bei de lei.