Read Zeme Naga MARKA 6 Bible Online

MARKA 6 - Zeme Naga bible

MARKA 6

¹Zai chigene Isua zuapat ze, pe ram sing ’mbe wang di de lei; zai pe gu kenieme pe chai suitat ti de lei.

²Zai ’ntakbambe mai ge ka’nduibeki ge pa ne mâ-geteiliachu di de lei; zai geseume ruage gekieme ne ’nningdaulak ti ze, “Aipau peu ne airamme ze ’ndaigene pa ngau lu se lau? ’Ndaikau gu kaningchingbe pechu pei bei se lau? Zai pe ba gene daizeu ge tâ kedibe ramme tewlube zeu!

³Aipau peu ze hechingtâtewpeu mak ti lau, Marile na, zai Jakobbe, Josesbe, Judabe zai Simonbe sipeu, zai pe kinapui ramme â anui ruage bam mak ti lau?” ze penui kacheu de lei, zai pechu penui lunggailak ti de lei.

⁴Dadege penui je, “Kemeu’mpeu â pengêugabe kau mak lei, pedei kui ge, zai pe kibaume ruage, zai pe ki-kelak ge runne zangnêu,” acheu bei de lei.

⁵Zai chige tâ-kedibe pa tewchi lak tai de lei, kane ka’nrâme gechâmne runne peireige pe ba die ze zai penui je tew’mmigaibe runne lei.

⁶Zai penui ’nnummakbe ze pa ’nningdaulak ti de lei, zai keloa ramme ge tatrua ze pa mâ-geteilia ze bam de lei.

⁷Zai hangkereu-ze-kename je pe dage kûwang lu, penui je hangna-na tat ra lang gai chu di de lei, zai herui kahebâbe ramme peireige penui je rezie pei bei de lei.

⁸Zai pa ne penui tebeîtewbe ge hetui runne tei ra, mâkedabe tei me ra samdie gai bei de lei; zai tingku du, chiaka du, penui kiakâk ge rangkâng du pung mak ra samdie gai bei lei;

⁹kane kêrum kai ra, mechua kena kai me ra samdie gai bei de lei.

¹⁰Zai pa ne penui je, “Kilûng ge ningnui gut dezai ningnui rimna dai mak tâne chige ’nnai bam lau.

¹¹Zai mâ-mâ bâm ge ningnui je ’nchâ mak tizai â, zai ningnui sam ’ngking nei mak tizai â, ningnui tat dai dezai ningnui pîdei ge kedeiniamoîne kechungtua ne lau, penui hangge sakkitewbe chang le ra hangge zeu,” kacheu de lei.

¹²Chidadege penui tat ze ziemmename heliwang dai ra hangge pauruatat ti de lei.

¹³Zai penui ne herasiabe ramme misongga kelitua, zai ka’nrâme misonggame je taudui ’nnuk kai ze, penui je tew’mmi gai bei de lei.

¹⁴Aipau rasam ze heguang Herodbe seu lu de lei; Isua ji ze pebâm’nsangne ge chipakpattibe ziegeneu. Hanggesame ne, “Baptistewpeu Johanbe kechaibe gene chu kadai de lei, kacheu de lei; chipauziegene aipau rezie chibe ramme pa ge tatew ze bam de lei,” kacheu de lei.

¹⁵Kane kêdabe kau ramme ne, “Aize Elijabe lei,” kacheu de lei. Zai kêdabe kau ramme ne “Aize kemeu’mpeu hangkat te lei, ’ndâ gu kemeume ruage hangkat gum zeu,” kacheu de lei.

¹⁶Kane Herodbe aize seu lu dege pa ne, “Johanbe, pe peî I ne dâng’ndibepeu chu kadai de lei,” ze kacheu de lei.

¹⁷Chize Herodbe ne lang gai bei ze Johanbe je nîm ’ndi de lei, zai pe kinapeu Philipbe nâu Herodiale ziegene pechu kebangki ge kai ’ndi lei; pa ne chipaupui dage nguakelaktewbeibe ziegeneu.

¹⁸Johanbe ne Herodbe je, “Ning kinapeu nâu je lu ra hang aize ning hangge besie mak lei,” acheubeibe ziegeneu.

¹⁹Zai Herodiale ne Johanbe je ngaugailak ze pechu tewchat ra lunei di de lei. Kane pa tewchi lak lei,

²⁰Herodbe ne Johanbe je pa â katelingbe kau, zai ka’nchibe kau, zai pechu â reî’mmi’ndibe kau lei be chilube ziegene pechu hing dadegeu. Pa ne pe sam seu lu dege, pelung hereu-desang di lei; sede pe suiyi ze pechu ’ngking bei lei.

²¹Kane Herodbe ne pechu lungbe mai ge pe kumme benai tâ-muipuame zai Galili ge kanguame besuitewme hangge luube-bâm pa tewgaibe gene pedâuyibe kat ngau lu de lei.

²²Zai chige Herodiale na ’mpuimi ne gut ze lim gai ze pa ne Herodbe benai pechu mâ-nguateume suî tew’mmi bei de lei; dadege heguangpeu ne chi ’mpuimi napoine je, “Nang nei-neibe a dage kie lau, dezai I pei gai gu lei,” kacheu de lei.

²³Zai heguangpeu ne deseu gai ze, pechu, “Nang kie-kiebe I pei gu lei, a gu heguangram pa’mpi ’nsangdu, I pei gu lei,” kacheu de lei.

²⁴Dadege pa zuapat lu, pe pui je, “I ’ndaikau kie ra se lau?” kacheu de lei. Dadege pa ne “Baptistewpeu Johanbe peî ze kie zu lau,” acheu bei de lei.

²⁵Dadege pa heguangpeu dage kelua-desang ze gut lu acheu sa ze, “Baptistewpeu Johanbe peî hekuak ge kai lu, luakatne nang ne achu pei gai ra I lunei lei,” acheu bei de lei.

²⁶Dadege heguang pe duângga-desang di de lei; kane pa hatkai’ndibe benai pechu mâ-nguateume bambe ziegene ’mpuiminapoine dagene pe sam hatkaibe ze pa kuâklak ti de lei.

²⁷Zai luakatne heguangpeu ne hekêtkaime ruage sipai hangkat je pe peî ze teiwang ra samde pei bei de lei, pa tat ti ze kebangki ge pe peîdâng lu,

²⁸zai hekuak ge pe peî kai lu teiwang ze ’mpuiminapoine je pei bei de lei; zai ’mpuiminapoine ne chize pe pui dage pei gai bei de lei.

²⁹Zai Johanbe kenieme chize seu lu dege, penui wang ze, kechaipum lu lu, heraw ge bai gai ’ndi de lei, ze kacheube rasam bam bei dadegeu.

³⁰Zai apostolme Isua tailam helatwang dai lu pechu penui tâtewbe benai geteiliabe rasam leine pau gai de lei.

³¹Zai pa ne penui je, “Ningnui bau runne wang ze zîngbe bâm ge saunak kai le lau,” kacheu de lei. Misonggame ne tat-ze-wang ze bambe ziegene penui mâ-teurabe hang ’nsangdu pehî ka’nruabe ngau mak dadegeu.

³²Zai ’nnei gene zîngbe bâm ’mbe penui runne tat ti de lei.

³³Chunage misonggame ne penui tattibe ngau lu penui je chî di de lei, zai namdi gene penui pî ne paktat ze penui sua raî dai di de lei.

³⁴Zai Isua ’nneigiam kapatchang dege baudime misonggame je pa ngau lu dege, penui je pa ngau’nggia di de lei, penui â melireîpeu gabe meli ramme gum ze bambe ziegeneu, zai pa ne penui je misongga mâ-geteiliachu di de lei.

³⁵Zai rî-desang di dege pe gu kenieme pe dage wang lu, acheu sa ze, “Aize â hênam zîngbe bâm da, zai hegî du hegî de lei;

³⁶aime bau je ’mpat kai be lau, heram ge zai keloa ramme ge tat ze penui hangge mâ-teu ra luirabe hangge zeu,” kacheu de lei.

³⁷Kane pa ne penui je kak ze, “Ningnui ne penui je mâ-teu ra pei be lau,” acheu bei de lei. Dadege penui ne pechu, “Anui ne tat ze tingku denari haî na mî lui lu penui je teu ra pei be ra mei?” kacheu de lei.

³⁸Dadege pa ne penui je, “Ningnui dage tingku ’ndaikie la lau? Tat ze pie gai ni lau,” kacheu de lei, zai penui chize ngau lu dege, pechu, “Tingku mengeu benai hekâ kena la lei,” ze acheu bei de lei.

³⁹Dadege pa ne penui ’nteumena je pebau-bautew ze timpeizeu ge ’ntau kam gai ra rang gai bei de lei.

⁴⁰Chigum ze penui hangrengeume bau, haîme bau acheu ze pebau-bautew ze ’ntau gai de lei.

⁴¹Zai chi tingku mengeu benai hekâ kena pa ne tei lu tinggîm ’mbe ’ngngangpie lu, Hera dage pe suiyibe sam pau gai lu, tingku ze tiapâng lu baudime je ’nzi ra pe gu kenieme dage pei gai bei de lei, zai hekâ kena pa ne ’nteumena je ’nzi gai de lei.

⁴²Zai penui ’nteumena teu lu, penui lungwângchang kam di de lei.

⁴³Dadege penui ne tingku benai hekâ teu’nsakpatbe padesuine ramme ’ntui kereu ze kena ruipui lu de lei.

⁴⁴Zai tingku teume riak, pumsâng chang mengeu lei.

⁴⁵Kelua ze ’nnei ge chu lu pe sua raî ze giam katlam Beth-saida ’mbe tat ra pe gu kenieme je lang gai bei de lei, baudime je pa rimna ra sam sakakenuîbe kakge zeu.

⁴⁶Zai penui je rimnalube châng dege, kellum ra pa peloa ’mbe hang di de lei.

⁴⁷Zai hegî dege, ’nnei ze sungkling sunggangkelî ge bam di de lei, zai pa â pe runne ’nneigiam ge bam de lei.

⁴⁸Zai tingkai gui ze penui je nupgetie bei dege pe gu kenieme ’nnei chaîdau lak zai hereu-desangdibe pa ngau lu de lei. Zai hekuâlia ’nchet kechum gumbe hî ge sungkling ge penui tailam pe pî ne tatwang de lei. Zai penui je pa tat’nzûtat te ra tew de lei,

⁴⁹kane sungkling ge pa tatbe penui ngau lu dege, mâmiê hangge ’nning gai lu ze penui ka’nrung de lei;

⁵⁰penui ’nteumena ne pechu ngau lu hingdibe ziegeneu. Kane luakatne pa ne penui je ’mpaupat ze, “Ningnui lung di ze bam lau, aize I de lei, hing se lau” acheu bei de lei;

⁵¹zai ’nnei ge penui dage pa gut te lei, zai tingkai du sau gai di de lei. Zai penui ’nningdaulaklu-lu bam di de lei,

⁵²tingku ramme rasam ze penui chîdesi mak tai de lei, penui lung’ndamdei di zeu.

⁵³Zai sungkling penui kapat dege, Gennesaret ramdei penui wangchang de lei, chige ’nnei ze keî gai de lei.

⁵⁴Zai ’nnei gene penui zuapat dege baudime Isua je chîgap ti de lei.

⁵⁵Zai keloaning ramme leine ge pakruatat ze tewneume ramme je penui gu gu jeîsing ge kai lu Isua rasam seu-seube bâm ge puawangchu di de lei.

⁵⁶Zai pa tatkaibe leine ge keloa ramme ge mei, nune namdi ramme ge mei, nune heram ge mei, zai hechaiki bâm ramme ge ka’nrâme je kai lu ze pe paîri ’nsangdu peize penui ne deî gai ra pechu kiam de lei; zai pechu deîgailume leine je â tew’mmi bei de lei.