Read Zeme Naga MARKA 7 Bible Online

MARKA 7 - Zeme Naga bible

MARKA 7

¹Zai Pharisaime benai leisirawme hanggesame Jerusalem ’mbene wangkeume pe dage wang’nduigaibe luage,

²pe gu kenieme hanggesame â penui ba ’ntik mak, hebâ ze mâ teube penui ngau lu de lei.

³(Pharisaime benai Judame leine â penui gu gechîng-telungsie ze rei’mmi ze, penui ba ’ntik makchai â, mâ de teu mak lei;

⁴zai hechaiki ’mbene penui wang dezai penui runne tew’nchi le makchai â, mâ de penui teu mak lei; zai kêdabe penui gu gechîng-telungsie misonggabe ramme ze penui â tei’ntip ze, hepiak ramme, heli ramme, hetageîli ramme du hui ka’nsui lei.)

⁵Dadege Pharisaime benai leisirawme ne pechu ’nneu ze, “’Ndaitew ze ning kenieme gechîng-telungsie luigum ze lung mak ze, kane penui ba hebâ ze mâ teu lau?” kacheu de lei.

⁶Zai pa ne penui je, “Isaiabe ne ningnui helunglimpungme deu ge ranggaika’ntuabe sam ze tâutit te lei, chige: ‘Ai baudime ne penui mui ne achu hengêutew lei, kane penui lung â a dagene deu-sang-deu lei;

⁷Peruânggabe gene penui achu kellum ze, ziemmename maning tak zene keneibesie geteiliabe hangge chak kai ze mâ geteilia de lei,’ acheu ze raw gai gum zeu.

⁸Hera gu samde sâu nan ze ziemmename gu gechîng-telungsie ze ningnui ne tei’ntip-kadesang de lei,” acheu bei de lei.

⁹Dadege pa ne penui je, “Ningnui gu gechîng-telungsie ze tei’mmirabe hang ziegene Hera gu samde ze tuâpatkairabe hangge ningnui dage pezeu bam di de lei!

¹⁰Mosabe ne sa ze, ‘Ning pui benai ning peu ngeutew lau,’ zai ‘Pe peu je mei, pe pui je mei saka’nsiabe kau â, peize chai sing de lau,’ ze die gai ’ndi daseu;

¹¹kane ningnui ne sa ze, ‘Mi-mige ne pe peu je mei nune pe pui je mei ze, Nang a dagene ngau ra bambe ze â Korban de lei’ (chize â, Hera dage pei gai ’nde lei, kacheube) acheu rang gai dizai â,—

¹²pe peu hang mei nu pe pui hang mei mâge â tew gai ra ningnui ne pechu lun gai ta di de lei,

¹³chigum ze ningnui gechîng telungsie teitat bambe zene Hera gu sam ze kemaî’ngga kam nan tai de lei. Zai aigumbe zat ramme ningnui ne misongga tew de lei,” ze kacheu de lei.

¹⁴Zai pa ne baudime je pe dage kûwang dai lu ze, penui je, “Ningnui ’nteumena ne sam ’ngking lu ze chî’mmi le lau:

¹⁵hela ge bambe zat chi ziemmena dage gutkaibe zene pechu tewhebâchi lak lei; kane ziemmena dagene patbe zene pechu tewkahebâ lei.

¹⁶“Mi-mige de seu ra pe kun bam kau â, peize seu le lau,” kacheu de lei.

¹⁷Zai pa ziemmena ramme je sâu nan ze, kilûng gut dege, pe gu kenieme ne chipau sam’nda rasam pechu ka’nneu de lei.

¹⁸Dadege pa ne penui je, “Zai ningnui du chigum ze ’nningchi mak mei? Hela ge bambe ne ziemmena lung ge gut ze pechu tewhebâchilakbe ningnui ngau mak mei,

¹⁹chize â, pe lung ge mak ze pe bungpui ge gut ze tatpela bam mak mei?” (Aigum ze hetak leine â ’nchi lei ze pa ne ranglia’nchichiak kai bei de lei.)

²⁰Zai pa ne, “Ziemmena lung gene ’ndaikau pat mei be zene ziemmena je tewkahebâ lei.

²¹Helung ’mbene, ziemmena lung gene ka’nningbe kesiabe ramme, hangleutewbe, kahebâbe, kegîbe, kahemabe,

²²kadekumbe, helungriaksiabe, kechoabe, lungkaheruâbe, hemimeube, ketiakbe, gechîrettewbe, kemiebe pat lei.

²³Ai kesiabe ramme leine ze helung gene pat ze ziemmena je tewkahebâ lei,” kacheu de lei.

²⁴Zai chigene pa zuachu lu ze Tira benai Sidon huâzie ’mbe tat ti de lei. Zai heki kat ge pa gut lu, chige pa bambe peize mî de chî ra pa lunei mak lei; sede ’mbiachi lak ti de lei.

²⁵Kane ’mpuimi hangkat pe na ’mpuimi napoine herui kahebâbe bambepui ne pe rasam seu lu, wang ze pe pî kangge keikeu gai de lei.

²⁶Chi ’mpuimi ze â Grik’mpui, lungkeube gene Siro-phoinisia ge bampui lei. Zai pe na dagene heruisiabe kelitua gai ra pechu pa kiam de lei.

²⁷Zai pa ne chipau pui je, “Napoine ramme je peize ’nggeuraî le lau, napoine ramme gu tingku lu lu ze hetei ramme dage tuâ gai ’nde ra â tâu me lei,” acheu bei de lei.

²⁸Kane pa ne pechu kak ze, “Eu lei, Heguang gau, gesang de lei; acheuleusede mâ-teube-kaira kangge hetei ramme bambe ’nsangdu, napoine ramme gu tingku teuterakeube ramme kuaiteu-teu lei,” ze kacheu de lei.

²⁹Dadege pa ne chipaupui je, “Aipau sam nang sa gai ’nda ze wang dai zu lau, ning na dagene herui kesiabe ze zuapat te lei,” acheu bei de lei.

³⁰Zai pe ki lam tat ti de lei, zai herasiabe tat ti ze pe na jeî ge jei laleube ngau de lei.

³¹Zai pa Tiraram bak gene wang dai ze Sidon tat kai ze Galili sungkling ’mbe Dekapolisram bak gene tatpela ze tat ti de lei.

³²Dadege penui ne pe dage mi hangkat pe kun pang zai pe ladpatlakbe kau je nguawang de lei; dadege pe peireige pe ba die gai ra pechu penui ne kiam de lei.

³³Zai baudime ruagene pechu runne nguachâmpat lu, pe kun kena ge pe bakêrang ramme keriau gai lu, zai ’nchai’ntui gai lu, zai pe lei deîtau gai de lei;

³⁴zai tinggîm ’mbe Isua ne ’ngngangpie lu, kehuisiak kai lu ze pechu, “Ephphatha,” kacheu de lei, chize â “Lat kai be zu lau,” kacheube lei.

³⁵Zai pe kun kena lat kai bei, zai pe leiria heipat kai bei ze, ’nchichiak ze pa sam dam di de lei.

³⁶Zai mî dage de pau gai mak ra ranggetîng gai bei de lei, kane nam bei dege penui suigut ne pauranbi-bi bam lei.

³⁷Zai ’nningdaulak-desang di ze acheu sa ze, “Pa ne getaleine tew’mmi kam gai bei de lei; hekunpangbe kau je du pa ne seu ra tew gai, zai pekuâpetlakbe kau je du samsa ra tew gai bei de lei,” ze penui kacheu de lei.