Read Zeme Naga MARKA 8 Bible Online

MARKA 8 - Zeme Naga bible

MARKA 8

¹Chipau ting ge baudime misonggame wang’ndui dai lu ze, penui teu ra ga di dege, pa ne pe gu kenieme je pe dage kûwang lu, penui je,

²“Baudime je I ngau’nggia de lei, chuna a dage penui bambe hezie kechumne changdibe ziegene teu ra mâ de gadibe ziegeneu;

³’njei-herei ze penui ki lam’mbe penui je I lang gai ra dizai â, ’mpuîki ge penui kemei-mei gu de lei, zai penui ruage hanggesame â kedeu ’mbene zuawang daseu,” kacheu de lei.

⁴Dadege pe gu kenieme ne pechu kak ze, “Ai hênamkang ge hangkat ne ’ndaigum ze aime je tingku ne keichi ra lau?” kacheu de lei.

⁵Dadege pa ne penui je ’nneu ze, “Ningnui dage tingku ’ndaikie la lau?” ze kacheu de lei; penui ne “Sena,” kacheu de lei.

⁶Dadege baudime je kedei ge ’ntau ra pa ne rang gai bei de lei; zai chi tingku sena ze pa ne lu lu, Hera dage pe suiyibe sam pau gai lu, chize tiapâng lu, baudime je ’nzi gai ra pe gu kenieme dage pei gai bei de lei; zai penui ne baudime suage kai bei de lei.

⁷Zai penui dage hekâpoine kecheîne bam lei, zai chiramme hang ’nnam gai lu baudime je ’nzi gai ra rang gai bei de lei.

⁸Zai penui teu lu ’nggeu kam di de lei; chi teu’nsakpatbe padesuine ramme ’ntui sena ruipui lu lei.

⁹Zai chige chang medai riâ gum bam de lei.

¹⁰Zai pa ne penui je tat ra lang gai bei de lei; zai luakatne pe gu kenieme benai ’nnei ge keuchu gai lu, Dalmanutha bak ’mbe tat ti de lei.

¹¹Zai Pharisaime wang lu, pechu samtuchu di de lei, pechu kedak ra hangge tinggîm ’mbene dakka’nchetbe pe dage kie zeu.

¹²Dadege pa pe lung huaipun gai ze, acheu sa ze, “’Ndaitew ze aipau reheime ne dakka’nchetbe peu lau? Pelingsing ze ningnui je I rang lei, aipau reheime je dakka’nchetbe mâ de pei ra mak lei,” kacheu lei.

¹³Zai pa â penui je sâu gai nan ze ’nnei ge keuchu gai dai lu, kêdabe giam ’mbe kapat ti de lei.

¹⁴Zai chunage penui tingku pung’ngngaî ’ndi de lei; zai ’nnei lungge penui dage tingku kuak kat runne bam de lei.

¹⁵Zai pa ne penui je rang gai ze, “Pie le lau, Pharisaime benai Herodbe gu ’nduihî je ’ntîng le lau,” kacheu de lei.

¹⁶Dadege penui karai chize hekî ze, “Anui dage tingku gabe ziegene de lei,” kacheu de lei.

¹⁷Zai chize chî lu ze, Isua ne penui je, “’Ndaitew ningnui dage tingku gabe rasam ningnui kahekî lau? Ningnui ’nningchi mak kerei mei nune seuchi mak kerei lau? Ningnui lung ’ndamdei di de mei?

¹⁸Hemik bam lu ngau mak, zai hekun bam lu ningnui seu mak mei? Zai ningnui ’ngngaî ’ndi de mei?

¹⁹Chang-mengeume hangge tingku mengeu I tiapânggaibe luage, pemoîne ’ntui ningnui ’ndaikie ruipui lu lau?” acheu bei de lei. Zai penui ne pechu, “Kereu ze kena lei,” kacheu de lei.

²⁰“Zai chang-medaime hangge tingku sena I tiapânggaibe gene pa desuine ramme ningnui ’ntui ’ndaikie ruipui lu lau?” kacheu de lei. Zai penui ne pechu, “Sena” kacheu de lei.

²¹Dadege pa ne penui je, “Ningnui â seuchi mak bam rei mei?” kacheu de lei.

²²Zai penui Beth-saida ge wang de lei. Zai hanggesame ne hemikchitpeu je pe dage nguawang lu, peize pechu dei gai ra kiam de lei.

²³Zai pa ne pe mikchitpeu ba tei lu, keloa hela ’mbe pechu nguapat ti de lei; zai pa ne pe mik ge ’nchai’ntui gai lu, zai pe peireige pe ba die gai lu, pechu, “Nang mâ-ngau de mei?” ze ka’nneu de lei.

²⁴Dadege pa ne ’ngngangchu lu, acheu ze sa ze, “Ziemmename je I ngau la de lei; kane penui hingbang ramme tatbe gum lei,” kacheu de lei.

²⁵Chidadege pe mik kena ge pe ba kai kadai de lei; dadege pa rakgetîng gai dege rakpat ti ze mâgetaleine ngau’nchichiak ti de lei.

²⁶Dadege pa ne pe ki lam pechu tat ra lang gai bei de lei, acheu sa gai ze, “Keloa ge ’nsangdu gut kai se lau,” acheu zeu.

²⁷Zai Isua pe gu kenieme je ngua lu Kaisaria Philippi ge keloa ramme ge tat’nduâtat ti de lei; dadege pa pe gu kenieme je mâ-’nneu ze, “Miramme ne I châu lei ze kacheu lau?” ze kacheu de lei.

²⁸Dadege penui ne rang ze, “Baptistewpeu Johanbe lei, ze kacheu de lei; zai kêdabe kau ramme ne rang dege, Elijabe lei, kacheu de lei; zai kêdabe kau ramme ne rang dege, kemeume ruage mige hangkat lei, ze kacheu lei,” ze acheu bei de lei.

²⁹Dadege pa ne penui ne ’nneu ze, “Kane ningnui ne I châu lei ze kacheu lau?” ze kacheu de lei; Peterbe ne kak ze, “Nang â Krista lei,” ze acheu bei de lei.

³⁰Dadege pa ne penui je mî suage de pe rasam paurua mak ra rang gai bei de lei.

³¹Dadege pa ne penui je mâ-geteiliachu dai ze, ziemmena Na â kahereube zat misongga lie himchang gu lei, zai gechîngme benai tingkugechîngme zai leisirawme ne tuâpat kai ze tewchat ’ndu lei; zai hezie kechumne chângge chu dai gu lei, ze kacheu de lei.

³²Aize pa ne rang’nchichiak kai bei de lei. Dadege Peterbe ne pechu kûchâm lu ’ngngiam chu di de lei.

³³Kane kenieme tailam ’nreiwang lu pie gai lu ze, Peterbe je pa ne ’ngngiam ze, “Satan, a chai ’mbe tat lau! Nang â Hera lam bam mak ze ziemmena lam bam daseu,” acheu bei de lei.

³⁴Zai baudime benai pe gu kenieme je pe dage pa ne kûwang lu, penui je, “Mi-mige de a chai suirame â pe runne pechu ’nzâ mak ze pe gu heling pua ze peize a chai sui lau.

³⁵Mi-mige de pa keringbe tew’nringneibe kau â chize ga gu lei; zai mi-mige de a ziegene benai gospel ziegene pa keringbe tewka’nggabe kau â, chize ze tew’nring gai gu lei.

³⁶Ziemmena kedeirei leine lu kam lu sede, pa keringbe ga dizaine â pe hangge kegiebe ’ndaikau la lau?

³⁷Ziemmena pa keringbe hangge ’ndaikau ne hiaklebuibe la lau?

³⁸Mi-mige de ai kahemabe benai kahemuibe rehei ge achu benai a sam ramme je ka’ngngambe kau je â, ziemmena Na pe Peu pengêudibe ge angel ka’nchime benai wangkeu dezai pechu du ’ngngam gu lei,” kacheu de lei.