Read Zeme Naga LUKA 1 Bible Online

LUKA 1 - Zeme Naga bible

LUKA 1

¹Misonggame ne anui dage mâ-mâ tewpuigai’ndibe rasam ramme tei’ndui ze teleu ra misonggame ne ’nninghereu ze tâtewgai’ndibe ziegene,

²bepîbang gene ngau sing chîsinglume benai Hera gu sam tâ ka’ngguame, chime bau ne anui je chiramme peigaibe luigum ze,

³mâ-mâ pelane pie’mmiwang gai lu I du, nang Theophilas yilangbe, ning hangge mâ-mâ pesin-prin tatkeudibe rasam ramme raw’nchichiak kai ra ’nning’nzei gai de lei,

⁴dezai ningchu mâ-mâ paugaibe zat ramme ge gesang-peling nang ne chî le ra hangge zeu.

⁵Judia gu heguang Herodbe ne kaheguangbe ting ge tingkupeu hangkat pe ji Zekariabe bam lei, pa â Abijabe penui baukattew ze bam lei; zai pe nâu Elizabethle ze â Aaronbe chapui lei.

⁶Penai hangna ze Hera mikngau ge teling ze bam lei, zai Tingwang gu samde ramme deu ge benai hingde tewgaibe ramme ge hetiâk ga ze lung bam lei.

⁷Kane Elizabethle â nakampui dadege, penai na ga lei, zai penai hangna chîng de chîng di de lei.

⁸Pe kiangname ne tâ’ngguarabe tingkak ge, Hera masuage pa tingku tâ ’nggua lage,

⁹tingkume gu tâtewbe sietak luigum ze hedachak kai dege, Zekariabe ne kellumki lungge gut ze mâ-perîmyibe rû ra chang di de lei.

¹⁰Zai baudime haimena â mâ-perîmyibe rube luage, hela ge kellum-kuâ ze bam lei.

¹¹Zai mâ-perîmyibe rube herâtewbe bâm hezat’mbia ge, Tingwang gu angel’mpeu liâ ze sap bam lei.

¹²Zai Zekariabe ne chize ngau lu dege, pa bamhereu di, zai hing di ze pe dage kau gai de lei.

¹³Kane angel’mpeu ne pechu, “Zekariabai hing se lau, nang kakellumbe kuâ ze seuchang lu de lei, ning nâu Elizabethle zene ning hang ’ngngiêne ’mpeumi lungkeu gai gu lei, zai pe ji â Johanbe ze nang ’ntak kai ra de lei.

¹⁴Zai nang â hesuiyibe benai helungsuika’ntabe ngau gu lei, zai pechu lungkeube ze misonggame ne penui suiyigaihâ gu lei;

¹⁵pa Tingwang mikngau ge kedibe kau chang gu, zai wain benai hezau pa sak ra mak lei, zai pa â pe pui lung gene ’nsangdu Herui Ka’nchibe zene puigit bam gu lei.

¹⁶Zai Israelme chaname misonggame je Tingwang penui Rapeu lam’mbe pa ne ngua’nreiwang gai gu lei.

¹⁷Zai Tingwang suage Elijabe gu herui, zai tâtewchibe gene pa tat ze bam gu lei, zai bepeume lung tak ramme ze hename lam tei’nreiwang gai gu lei, zai hekuâpheumakme je katelingme gu kaningchingbe lam ge tei’nreiwang gai gu lei, Tingwang hangge pezat teleukua’ndibe ze teleu ra hangge zeu,” ze kacheu de lei.

¹⁸Dadege Zekariabe ne angel’mpeu je, “’Ndaigum ze aize I chî ra lau? I â kechipau de da, zai a nâu du chîng de daseu,” ze kacheu de lei.

¹⁹Dadege angel’mpeu ne pechu kak ze, “I Gabrielbe lei, Hera masuage sappeu zeu; aize samkeyibe ning dage salia ra hangge achu lang gai lei.

²⁰Zai pie le lau, chiramme wangchangrabe chi a sam ze nang ’nnum’mmi mak daze airamme wangchang mak tâne nang ning kuâneupat lakzîng ze bam gu lei” ze kacheu de lei.

²¹Zai baudime Zekariabe je kuâ bam lei, zai pa kellumki ge bamtiedibe ze penui ’nningdaulak ti de lei.

²²Zai pa hela ’mbe pat dege, penui dage nguasamsachi lak tai de lei, zai kellumki ge keliâbe pa ngau de lei be penui chî di de lei; zai penui je pa hebadam ne ka’mpau de lei, zai pa pe kuâ patlak ti bam de lei.

²³Zai pa pe gu tâ’ngguarabe tingkak gu ze kam gai dege pe ki lam’mbe tat ti de lei.

²⁴Zai chipau châng dege, pe nâu Elizabethle ’mpung di de lei, zai kêu mengeu riâ ’mbai ze bam lei; zai acheu sa ze,

²⁵“Miramme ruagene I a dêusia bambe ze tew’ngga ra hangge Tingwang ne achu ’nggia ze aigum ze a peireige tâtew gai bei de lei,” ze kacheu de lei.

²⁶Zai hekêu paserukbe ge Hera dagene angel’mpeu Gabrielbe je lang gai de lei, Galili gu namdi kat Nazareth ge

²⁷leusang ka’nchipui, Josepbe Dabidbe kiria’mpeu nâu hang rangchakkai’ndipui dage zeu.

²⁸Zai pa ne pe dage wang lu pechu, “Kellum, Hei, nang ka’nggiabe ngaulupui, Tingwang ning dage la lei!” kacheu de lei.

²⁹Kane pa chipau sam seu lu dege, pe lunghereu-desang di ze aigum rechâgaibe sam ’ndaikau hang chang gu mei be ’nning gai di de lei.

³⁰Dadege angel’mpeu ne pechu, “Hing se lau, Marile gau, Hera masuage nang ka’nggiabe ngau lu de lei.

³¹Zai pie le lau, nang ’mpung gu, zai ’mpeumi napoine hangkat lungkeu gu lei, zai pe ji â Isua ze, nang ’ntak kai ra lei.

³²Zai pa â kedibe kau chang gu, zai pechu â Hulangbe Na ze kû gu lei; zai Tingwang Hera ne pechu pe peu Dabidbe gu heguang-bamrak ze pei gai gu lei,

³³dezai Jakobbe kiria peireige pa ne betingbeta samram ze bam gu lei; zai pe gu Heguangram â betun gai ra mak lei,” kacheu de lei.

³⁴Zai Marile ne angel’mpeu je, “Chize ’ndaigum changchi ra lau, I a napeu ga zeu?” kacheu de lei.

³⁵Dadege angel’mpeu ne pechu, “Herui Ka’nchibe ning peireige wangkeu gu, zai Hulangpeu gu tâtewchibe ne ningchu sung gu lei; chipauziegene chi napoine nang lungkeurabe ze â, Hera Na ze kû gu lei.

³⁶Zai pie le lau, ning sipui Elizabethle zene du chîng di zaine ’mpeumi napoine ’ngngiêne pe gumpui ge pung la de lei; chi nakampui kacheupui gu chuna paserukbe kêu chang de lei.

³⁷Hera dage mâ de changlakbe bam ra mak daseu,” kacheu de lei.

³⁸Dadege Marile ne, “Pie le lau, I â Tingwang lun tewpui de lei; ning sam ranggaibe luigum ze peize a dage wangchang lau,” kacheu de lei. Dadege angel’mpeu pechu put kai nan ze tat ti de lei.

³⁹Zai chipau ting ge Marile chu lu ze, peloaram Judia gu namdi ’mbe kelua ze tat ti de lei.

⁴⁰Zai Zekariabe ki ge pa gut lu, Elizabethle je rechâ gai de lei.

⁴¹Zai Elizabethle ze Marile ne pechu rechâgaibe kuâ seugap lu dege, pe bungpui gene ’ngngiêne ’ndiechu di de lei; dadege Elizabethle â pe lung ge Herui Ka’nchibe ne pui di de lei.

⁴²Dadege pe rankai sa ze, “Mpuimi ruage ningchu â suang ze bam gu lei, zai ning gu henarak rachî je suang bam gu lei!

⁴³Zai ’ndaigumbe ziegene ai a dage wangchang lau, a Wangpeu pui zene achu ’ngkiâmiebe zeu?

⁴⁴Pie le lau, nang ne achu rechâgaibe kuâ seugap dege, a gu henarak gene ’ngngiêne pe suiyi ze ’ndiechu lei.

⁴⁵Zai Tingwang dagene pechu mâ-ranggaibe ze tewpui gai gu lei be ’nnumka’mmipui je peize suang bam lau,” ze kacheu de lei.

⁴⁶Zai Marile ne, “A keringbe ne Tingwang je suang’ndi gai de lei,

⁴⁷Zai a lung zene achu tewka’nringpeu, Hera dage pe suiyigaihâ lei,

⁴⁸pe luntewpui kecheilungpungbe pa ngau lu de lei. Zai pie le lau, chuna gene seu ze reheime leine ne achu helungkatemipui ze kû gu lei;

⁴⁹a hangge tâtewchipeu ne mâ-kedibe ramme tew gai bei de lei, zai pe ji â ka’nchibe lei.

⁵⁰Zai Pechu hingme leine peireige â reheipiakeu tâne pa ka’nggiabe bam bam gu lei.

⁵¹Pe ba ne pe ranchi tewlia lei, zai pa ne penui lungge gechîrettewbe ka’nningme leine je tewtimrarip kai bei lei,

⁵²pe ranchime je penui gu heguang-bamrak gene pa ne chakkeu ’nde lei, zai kechei-luilungpungme je pa ne teichu’ngngu gai ’nde de lei,

⁵³Ka’njeime je â, mâ-keyibe ne ’nggeu ra pa ne tew gai bei de lei, zai keheume je â penui barua lang gai ’nde lei.

⁵⁴Pa ka’nggiabe chibam ra hangge pe guâ ka’ngguapeu Israelbe je pa ne ’ngngâ bei de lei,

⁵⁵anui paume zai Abrahambe, zai pe chaname dage sam ranggaibe luigum zeu,” kacheu de lei.

⁵⁶Zai Marile kêu chum riâ pe dage bam gai lu dege, pe ki lam tat dai di de lei.

⁵⁷Zai chunage Elizabethle hena lungrabe ting chang di de lei, zai pe na ’mpeumi napoine lungkeu de lei.

⁵⁸Dadege pe ramname benai pe kiriame ze Tingwang ne pechu ’nggia-ka’ndibe chî lu ze penui suiyigaihâ de lei.

⁵⁹Zai hezie padesatbe mai ge, ’ngngiêne je rumgeten ra hangge penui wang de lei; dadege penui ne pe ji hang pe peu Zekariabe ji luigum ze ’ntak kai ra lunei de lei,

⁶⁰kane pe pui ne. “Mak lei, pe ji â Johanbe ze ’ntak kai ra de lei,” acheu bei de lei.

⁶¹Dadege penui ne pechu, “Ning kibaume ruage aipau ji ze lume mî de ga gerei zeî lau,” kacheu de lei.

⁶²Dadege napoine ji hang pe peu ne ’ndaikau ’ntak kai nei mei be ’nneu ze penui ne pechu hebadam ne ’mpau gai de lei.

⁶³Dadege rawrabe kuak pa kie lu, pa ne chige “Pe ji â Johanbe lei,” ze raw gai de lei, dadege penui ’nteumena ’nningdaulaklu-lu bam di de lei.

⁶⁴Dadege luakatne pe mui latpat kai bei, zai pe leiria heipat kai bei de lei, zai sam sapat ze Hera je toa di de lei.

⁶⁵Dadege pe ramname leine hing di de lei, zai chipau rasam ramme ze Judia bak leine ge salumteu ze tat ti de lei.

⁶⁶Chize seume leine chiramme penui lung ge kai gai de lei, acheu sa ze, “Aipau napoine ze ’ndaigumbe zat changrabe kau se lau?” ze acheu zeu. Tingwang ba ne pe dage bam bam bei de lei.

⁶⁷Zai pe peu Zekariabe â Herui Ka’nchibe ne pui ze bam di de lei, zai acheu sa’ntua gai ze,

⁶⁸“Israelbe Rapeu Tingwang je peize toa bam lau, pe gu ziemmename dage pa ne ’ngkiâmie ze ripat kai bei,

⁶⁹zai pe gu tâka’ngguapeu Dabidbe kiria ge anui hangge tewka’nringbe meli’nsei kie getuachu gai bei de lei,

⁷⁰’ndâge pe gu kemeume ka’nchime mui gene pa ne ranggaibe gum zeu,

⁷¹anui reime benai anui je ngaugailakme leine ba gene anui je tew’nringpat kai be ra hangge zeu;

⁷²dezai anui paume je ka’nggiabe samhatkaibe ze tewpui gai be ra, zai pe gu samhatkaibe Ka’nchibe ze chibam ra,

⁷³anui peu Abrahambe je pa sam deseugai’ndibe ze,

⁷⁴mi teureime dagene meupatkaibeime, chi anui zene hing mak ze pe guâ ’nggua le ra pei gai ra hangge zeu,

⁷⁵anui keringbe ting tâluî ge pe masuage ka’nchibe katelingbe gene bam lu zeu.

⁷⁶Zai nang, ’ngngiêne, ningchu â Hulangpeu gu kemeu’mpeu ze kû gu lei; nang ne Tingwang suage pe gu ’mpuî kedâkua ra tat’ntua gu daseu,

⁷⁷pe gume hangge penui hemui kelunbe gene tewka’nringbe chî ra pei gai ra,

⁷⁸kehu ’mbene anui peireige tingnaimikpui bapat dezai, anui Rapeu ’nggia keyibe gene

⁷⁹kemuîbe ge benai kechaibe kezui ge bamdime dage kebabe pei gai ra, desieyibe lungkatemibe ’mpuî ge anui je nguatat kai ra hangge zeu,” ze kacheu de lei.

⁸⁰Zai chi ’ngngiêne ze chîngbi-bi-chu ze herui lam ge pe ranchibi-bi di de lei. Zai Israelme dage pechu liâ mak tâne hênamkang ge bam bam di lei.