Read Zeme Naga LUKA 10 Bible Online

LUKA 10 - Zeme Naga bible

LUKA 10

¹Aipau châng dege, Heguang ne kêdame riaksename je kelâng gai lu, pa tatwanggairabe namdi ge benai pebâm leine ge, pe sua ’mbe penui je hangna-na ze lang’ntua gai de lei.

²Zai penui je pa ne, “Helu gat ra kie-desang la lei, kane tâtewme cham lei; chidaze pe gu helu ge tâtewme je langpat kai ra helu ’mpaupeu dage kie zu lau.

³Tat chu lau; pie le lau, henei dung ruage melipoine ramme bambe gum ze ningnui je I langpat kai de lei.

⁴Rangkângrak du, zai chiaka du, zai pîchûp du mâ de pung se lau, zai ’mpuî’mmaî ge mî je du hebakellum pei se lau.

⁵Ningnui gutkai-kaibeki ge raîlangbe ge, ‘Aipauki ge peize desieyibe lungkahegeibe bam lau,’ ze acheu lau.

⁶Zai pe lungyi ze lungkahegeibe kau ziemmena chige bam dizai â ningnui ranggaibe samyibe pe dage ’nnai bam gu lei; kane chigum mak tizai â, chi samyibe ze ningnui dage wang gai gu lei.

⁷Zai chipauki ge ’nnai bam lau, penui ne gepei-peibe teu ze sak zeu, tâtewbe kau â, pehî ngaukezei de lei; heki kêdabe ge rêurua se lau.

⁸Ningnui namdi ge gut kai ze penui ne ningnui je ’nchâ bei tâne â ningnui suage teu ra kaipatkaibe ze teu bam lau;

⁹chi namdi ge ka’nrâme je tew’mmi ze penui je, ‘Hera gu heguangram ningnui dage wang’nna mui de lei,’ ze acheu lau.

¹⁰Kane namdi ge ningnui gut kai tânege zai penui ne ningnui je ’nchâ bei tânege chi namdi gu puidi ge tat lu ze,

¹¹‘Ningnui ram deiniamoîne anui pî ge kupbe ’nsangdu ningnui peireige anui ne gechung gai ’nde lei; acheusedu chi Hera gu heguangram â wang’nna mui de lei be chî le lau,’ ze acheu gai be lau.

¹²I ningnui je rang lei, chipau mai (samrambe mai) ge â chipau namdi peireige suadu Sodom peireige â gesutsêu bi du de lei.

¹³“Korazin, nang ning duângga gu lei! Beth-saida, nang ning duângga gu lei! Nang ge tâ-kedibe tewbe ramme ze Tira benai Sidon ge tew gai bei laîzai â, penai â miseigiriapaî bâ ze timbun ’nnuk lu ’ntau ze ’ndâ gene penui lungheli du de lei.

¹⁴Kane samrambe mai ge â ning peireige suadu Tira benai Sidon peireige â, lunsêu bi du de lei.

¹⁵Zai nang, Kaperna-um, ningchu tinggîm toachu chang gai be ra semei? Ningchu â Kechaiberam ge teikeu gai ’ndu lei.

¹⁶“Ningnui kuâ ka’ngkingbe kau ze a kuâ ka’ngking de lei; zai ningnui je tuâpatbe kau ze achu tuâpatbe chang de lei, zai achu tuâpatbe kau ze achu langgaipeu je tuâpatbe chang lei,” ze kacheu de lei.

¹⁷Riaksename ze penui suiyi je helatwang dai lu acheu sa ze, “Heguang gau, herasiabe ramme ’nsangdu ning ji gene anui kangge bam kam de lei!” kacheu de lei.

¹⁸Dadege pa ne penui je, “Tinggîm ’mbene tingkakepitbe gum ze Satan kêukeube I ngau lei.

¹⁹Pie le lau, henêu ramme benai heruimegapui ramme je kutgetie ra, zai mi teureipeu gu reziechibe je duî le ra, ningnui je I ne rezie pei gai de lei; zai mâ ne de ningnui je tew’nteu ra mak lei.

²⁰Acheuleusedu herasiabe ramme ningnui kangge bam kam de lei ze chi kacheube ne chige ningnui suiyi se lau; kane tinggîm ge ningnui ji rawgaibeibe ne ningnui suiyi’nta lau,” ze kacheu de lei.

²¹Chipau hî sing ge Herui Ka’nchibe gene pe suiyi’nta ze acheu sa ze, “A peu, ting benai kedei Wangpeu, nang ne airamme ze kaningchingme benai mâ-gechîme dagene tei’mbai nan ze chiramme ’ngngiêne ramme dage liâbeibe ze ningchu a suiyi lei; eu lei, a peu gau, aigumbe ze â ning ’nggia kedibe gene chang lei.

²²Mâgetaleine a peu ne achu pei gai ’nde lei; pe na châu mei be Bepeu runne chi zangno, mî de chî me lei, nune Bepeu châu mei be pe na benai mi-mige pe dage pa ne liâ ra kelânggaipeu runne chî lei,” ze kacheu de lei.

²³Chidadege pe gu kenieme lam pa ’nreiwang lu penui dage reine ze salia ze, “Ningnui ne ngaube (ge) ngaube mik ramme ze penui paurega lei!

²⁴Ningnui je I rang lei, kemeume benai heguangme misonggame ne ningnui kengaube ze ngau nei ze bam lei, zai penui chize ngau mak tai lei, zai chi ningnui keseube ze seu nei ze bam lei, zai penui ne chize seu mak tai de lei,” kacheu de lei.

²⁵Zai pie le lau, mige hingdechipeu pechu kedak ra sapchu lu acheu sa ze, “Geteiliapeu, ringbetunmakbe ngau ra hang I ’ndaikau tew ra lau?” ze kacheu de lei.

²⁶Isua ne pechu, “Hingde ge ’ndaikau raw gai lau? ’Ndaigum nang kiâ gai lau?” acheu bei de lei.

²⁷Dadege pa ne kak ze, “Tingwang ning Rapeu je ning lung leine ne, zai nang keringbe leine ne, zai ning ranchi leine ne, zai nang ka’nningbe leine ne hung ra lei; zai ning kining’mpeu je ningchu gum ze hung ra lei,” ze kacheu de lei.

²⁸Dadege pa ne pechu, “Nang kakbe sam ze tâu de lei; aize tew zu lau, dezai nang ring gu lei,” acheu bei de lei.

²⁹Kane pa pe runne pechu tew’nzei gai nei dege, Isua je, “Acheu zaine a kining’mpeu ze châu lau?” kacheu de lei.

³⁰Isua ne pe kuâ kak ze, “Hangkat Jerusalem gene Jeriko ’mbe tatkeu de lei, dadege hegasut-teume ruage pa tatdau gai lu penui ne pe paî gâutua nan ze bêu bei de lei, zai chaitena ze pechu sâudiak kai bei de lei.

³¹Zai tingkupeu hangkat ’nnummeluisui ze, chipau ’mpuîhimdi ge tatkeudau de lei; zai pa pechu ngau lu dege, ’mpuî’ntai ’mbene ’nriatat ti de lei.

³²Chipau luigum ze, Lebi’mpeu hangkat chipau bâm ge wang gai lu pechu ngau lu ze ’mpuî’ntai ’mbene ’nriatat ti de lei.

³³Kane Samaria’mpeu hangkat pa tebeîtewbe luage pa bambe bâm ge wang gai de lei; zai pechu pa ngau lu dege, ngau’nggia-desang di de lei,

³⁴dadege pe dage wang lu, pe jâm ramme ge taudui benai wain ruî gai lu dum gai de lei; dadege hekunmerângne ching ge pechu teichu gai lu, hesangki ’mbe pechu nguatat ze tinggeu gai de lei.

³⁵Zai bechai mai ge pa ne denari kena lupat lu, hesangki teipeu je pei gai lu pechu rang gai ze, ‘Pechu tinggeu’mmi lau; zai aipau peireige nang ne peisuâgai’ndibe leine â, I wang dai dezai ningchu peiruî dai gu lei,’ kacheu de lei.

³⁶Aime hangchum ruage ’ndaipeu je hegasut-teume ruage tatdaugaipeu hangge pe kining’mpeu-gesang hang nang ’nning gai lau?” ze acheu bei de lei.

³⁷Pa ne pechu, “Pechu ngauka’nggiabe teiliapeu ze de lei,” kacheu de lei. Dadege Isua ne pechu, “Tat ze chigum tew zu lau,” acheu bei de lei.

³⁸Chunage penui tebeîtatbe luage keloa kat ge pa gut kai de lei; zai ’mpuimi hangkat pe ji Marthale ne pechu ’nchâ ze pe ki ge rêu ra hang ku lei.

³⁹Zai pa pe kina hangkat Mari kacheupui bam lei, chipaupui ze Isua pî hiage ’ntau ze pa mâ-geteiliabe ’ngking bam de lei.

⁴⁰Kane Marthale â mâ’nggua’nsui di lei; dadege pa ne Isua dage wang lu pechu, “A Wang gau, a kinapui achu sâu gai bei ze mi runne mâ’nggua ra hangge nang ’nninghereu mak ti lau? Chidaze achu ’ngngâ ra hangge rang gai be lau,” kacheu de lei.

⁴¹Kane Heguangpeu ne pechu kak ze, “Marthale, Marthale! Nang â mâ-mâ misonggabe hangge ’nninghereu ze kahereu de lei;

⁴²mâ-ka’nnangbe kat la lei. Marile ne chi keyibe dam ze kelâng lu de lei, chize â, pe dagene lutat ra mak lei,” acheu bei de lei.